सहिद गंगालाल श्रेष्ठ व दशरथ चन्दप्रति श्रद्धाञ्जली

येँ- सहिद सप्ताहया झ्वलय् म्हिगः सहिद गंगालाल श्रेष्ठ व सहिद दशरथ चन्दयात श्रद्धाञ्जली देछायेगु ज्याझ्वः जुल । थनया शोभाभगवतीइ निम्हं सहिदया झ्वाताय् स्वां देछासे श्रद्धाञ्जली देछायेगु ज्या जूगु खः ।

येँ महानगरपालिकापाखें सहिद सप्ताह अन्तर्गत प्यम्ह सहिदया झ्वाताय् स्वां देछानाः श्रद्धाञ्जली सभा यायेगु ज्याझ्वःकथं सहिद गंगालाल श्रेष्ठ व सहिद दशरथ चन्दं सहादत प्राप्त याःगु शोभाभगवतीइ उगु ज्याझ्वः जूगु खः ।

थुगुसीया सहिद सप्ताह अन्तर्गत वंगु माघ १० गते सहिद शुक्रराज शास्त्री जोशीं सहादत प्राप्त याःगु टेकुइ श्रद्धाञ्जली सभा याःगु खः । अनंलि माघ १३ गते सहिद धर्मभक्त माथेमां अमरत्व प्राप्त याःगु सिफलय् श्रद्धाञ्जली सभा याःगु म्हिगः निम्ह सहिदं सहादत प्राप्त याःगु शोभाभगवतीइ उगु ज्याझ्वः जूगु खः ।

येँ महानगरपालिकापाखें दँय्दसं १०४ दँ या जहानिया राणा शासनपाखें देय् व जनतायात मुक्त यायेत थःगु प्राण आहुति बिउपिं नापं थीथी व्यवस्थाया हिउपाःया निंतिं थःगु प्राण बलिदान बिउपिं ज्ञात अज्ञात सहिदया सम्मानय् थुकथं सहिद सप्ताह हना वयाच्वंगु दु ।

सहिदया झ्वाताय् स्वां देछायेगु ज्याझ्वः लिपा सभायात संबोधन यानादिसें येँ महानगरपालिकाया प्रमुखलिसें सहिद सप्ताह मूल समारोह समितिया संयोजक विद्यासुन्दर शाक्यं सुयात नं व्यक्तिगत रुपं चोट लाकेगु ज्या मयासें मुक्कं देय्यात हे मुक्तिया लँपु क्यंपिं प्यम्ह महान सहिद आम नेपाःमिया लुमन्तिइ न्ह्याबलें नं दयाच्वनी धयादिल ।

जहानिया राणा शासनपाखें देय् जनतायात मुक्त यायेत थःगु ज्यानतकं बलिदान बिउपिं महान सहिदपिंसं गबलें नं अप्पां कयेकेगु, ल्वाभः छ्यलेगु वा घातक व विस्फोटक पदार्थया प्रयोग मयाः धासें येँ महानगर प्रमुख शाक्यं धयादिल, ‘यदि उगु इलय् वय्कःपिंसं नं उकथं हे ल्वाभः प्रयोग याःगु खःसा गुलि मनूतय् ज्यान वनीगु खइ, गुलि घाःपाः जुइगु खः । तर वय्कःपिंसं अथे यानामदी । वय्कःपिनिगु सः हे ल्वाभः स्वयां सशक्त जुयाबिल । गुकिं यानाः देश विदेश तरंगित जूगु जक मखु, हिउपाः हयेगु म्हगस पूवन ।’

जहानिया राणा शासनया विरोध याःगु व जनतायात थःपिनिगु विरोधय् ल्ह्वनेगु ज्या याःगु धासें गंगालाल श्रेष्ठ व दशरथ चन्दयात वि.सं. १९९७ माघ १५ गते शोभाभगवतीइ गोलीं कयेकाः स्याःगु खः । येँ मनपां सहिद दिवसया हे झ्वलय् थगुने शोभाभगवतीइ निम्हं सहिदया पूर्णकदया झ्वाता पलिस्था याःगु खः ।

सहिद सप्ताहया लिपांगु दिं थौं माघ १६ गते शान्ति वाटिकाय् मुनाःप्यम्ह सहिदया किपालिसें नेपाल प्रहरी, सशस्त्र प्रहरी, नेपाली सेनाया ब्याण्ड सहितया नसंचा उलाः लैनचौरस्थित सहिद सहिद पार्कय् वनाः श्रद्धाञ्जली देछायेगु ज्याझ्वः तयातःगु दु ।

सम्बन्धित बुखँ

LEAVE YOUR COMMENTS