जुकरबर्ग थःगु गल्ती स्वीकार यात

फेसबुकया संस्थापक मार्क जुकरबर्गं छगू राजनीतिक परामर्शदाता कम्पनीं लाखौं फेसबुक प्रयोकर्तातय् विवरण काःगु खँय् घटनाय् थःगु कम्पनीया गल्ती जूगु स्वीकार याःगु दु । राजनीतिक लाभया निंतिं केम्ब्रिज एनालिटिकां गलत ढंगं फेसबुक प्रयोगकर्तातय् सुचं खुयाकाःगु द्वपं लानाच्वंगु दु ।केम्ब्रिज एनालिटिकां न्यागू करोड फेसबुक प्रयोगकर्तातय् विवरण संकलन याःगु व उपिं मध्ये यक्वसिनं थःगु विवरण बीत सहमति मप्वंकूगु खँ पिहांवःगु दु । केम्ब्रिज एनालिटिकां थ्व विवरण अमेरिकी राष्ट्रपति चुनावय् डोनाल्ड ट्रम्पया चुनावी अभियानय् ग्वाहालि यायेत छ्यःगु खः ।थ्व प्रकरण लिपा फेसबुक संस्थापक जुकरबर्गं थःगु कम्पनीया गल्ती दुगु स्वीकार याःगु खः । वय्कलं आवंनिसें स्वंगू पक्षं एप मार्फत फेसबुक प्रयोगकर्तातय् जानकारी कायेफइगु ज्याय् कडाइ यायेगु प्रतिबद्धता नं प्वंकादीगु दु ।प्रयोगकर्तातय् विवरणया संरक्षण यायेगु जिम्मा थःगु जूगु स्वीकार यासें फेसबुकय् जूगु छुं नं कथंया गल्तीया निंतिं थः जिम्मेवार दुगु खँ वय्कलं धयादीगु दु ।
जुकरबर्ग एप दयेकूगु कम्पनी एलेक्जेन्डर कोगन, केम्ब्रिज एनालिटिका व फेसबुक दथुइ छु जूगु खः व विश्वासघात सरह हे जूगु खँ नं धयादीगु दु । वय्कलं फेसबुक प्रयोगकर्तातय् जानकारी कायेगु धयागु प्रयोगकर्तातय्त विश्वासघात हे जूगु खँ धयादीगु खः ।