ने. सं. ११४३ तछलाथ्व दशमी -

शान्तिपूर्ण सत्ता हस्तान्तरण अस्वीकार

एजेन्सी – अमेरिकी राष्ट्रपति भ्रमणय् प्रतिबन्ध डोनाल्ड ट्रम्पं शान्तिपूर्ण रुपं सत्ता हस्तारण यायेत अस्वीकार यानादीगु दु। राष्ट्रपति ट्रम्पं वइगु नोभेम्बर महिनाय् जू वनाच्वंगु राष्ट्रपति पदीय निर्वाचनय् थः पराजित जुल धाःसा शान्तिपूर्ण रुपं सत्ता हस्तान्तरण यायेत अस्वीकार यानादीगु खः ।

राष्ट्रपति ट्रम्पं उकथंया आशय ह्वाइट हाउसय् जूगु पत्रकार सम्मेलनय् व्यक्त यानादीगु खः । पत्रकार सम्मेलनय् छम्ह पत्रकारं ‘यदि निर्वाचनय् डेमोक्रेटया उम्मेदवार जो बाइडेन निर्वाचित जुल धाःसा छिं शान्तिपूर्ण रुपं सत्ता हस्तान्तरण यायेत प्रतिवद्ध दु ला?’ धकाः न्यंगु न्ह्यसःया लिसलय् ट्रम्पं उकथंया आशय व्यक्त याःगु खः ।

लिसें मतपत्रप्रति नं थःगु संशय व्यक्त यासें राष्ट्रपति ट्रम्पं धकाःगु दु, ‘ठीक जू, छु जुइ जिमिसं नं स्वयेगु जुइ । लिपा छिकपिंसं नं सीका हे दी ।’ ट्रम्पं मतपत्रप्रति संशय व्यक्त यासें मतपत्र छगू विपद जूगु व थ्वप्रति जिगु न्ह्याबलें गुनासो नं दुगु धाःगु खः ।

‘मतपत्रपाखें छुटकारा प्राप्त जुइवं देशय् शान्ति वइगु, तर गुगुं हालतय् नं सत्ता हस्तान्तरणया सवाल वइमखु, बरु निरन्तरता प्राप्त जुइ’ ट्रम्पं देय् ब्वलनाच्वंगु दंगा फसादयात दृष्टान्त बिसें धाःगु दु । कोरोना भाइरस संक्रमणया कारणं मतदातायात सुरक्षित यायेगु निंतिं अमेरिकाया आपालं राज्यय् ‘मेल इन भोटिङ’ अर्थात हुलाकपाखें मतदान यायेगु व्यवस्था यायेत्यंगु दु। राष्ट्रपति ट्रम्पं थुकियात नं तप्यंक हे अस्वीकार याःगु दु। थनिं प्यदँ न्ह्यः चुनाव जूगु इलय् नं ट्रम्पं थःगु पराजययात तप्यंक हे अस्वीकार याःगु खः ।