अर्जेन्टिनाय् कोपा अमेरिका मयाइगु

एजेन्सी- अर्जेन्टिनाय् कोपा अमेरिका फुटबल धेंधेंबल्लाः मजुइगु जूगु दु । धेंधेंबल्लाः सुरु जुइत झिंस्वन्हु जक ल्यं दनिबलय् आइतवाः दक्षिण अमेरिकी फुटबल कन्फेडेरेसनं अर्जेन्टिनाय् धेंधेंबल्लाः मयायेगु क्वःछिउगु खः । अर्जेन्टिनाय् खने दयाच्वंगु कोभिड–१९ या संक्रमणयात ध्यानय् तयाः थन धेंधेंबल्लाः मयायेगु क्वःछिनागु खँ कन्फेडेरेसनं धाःगु दु ।

झिगू दक्षिण अमेरिकी देय्तय्सं ब्वति काइगु थ्व धेंधेंबल्लाः थुगुसी जुन १३ निसें जुलाइ १० तक अर्जेन्टिना व कोलम्बियाय् यायेगु क्वःछिनातःगु खः । कोपा अमेरिकन फुटबलया १०५ दँया इतिहासय् न्हापांखुसी थथे निगू देशय् मंकाः कथं ग्वसाः ग्वयेत्यंगु खःसां कोलम्बियाय् विपक्षीतय्सं यानाच्वंगु प्रदर्शनया कारणं वंगु झिन्हु न्ह्यव जक थन धेंधेंबल्लाः मयायेगु क्वःछिउगु खः । तर आः अर्जेन्टिनाय् नं कोभिड संक्रमण अप्वया वयेवं थन नं मयायेगु क्वःछिउगु खः ।

कन्फेडेरेसनं धेंधेंबल्लाः हे स्थगित धाःगु मदुनि । कन्फेडेरेसनं पिकाःगु चिहाकःगु वक्तव्यय् आः मेमेगु देशं वयाच्वंगु प्रस्तावया अध्ययन जुयाच्वंगु व याकनं हे छु यायेगु निर्णय सार्वजनिक जुइगु खँ धयातःगु दु ।