म्याद फुइधुंकूगु सामान न्हूगु स्टिकर तःपिंत ज्वन

येँ (नेपालभाषा टाइम्स) – प्रहरीं कलंकीया छखा छेँय् चकलेट व ट्यांग (जुस पाउडर) या गोदामय् छापा मारे याःगु दु। महानगरीय अपराध महाशाखाया पुचलं कलंकीया गणेशमान सिंह कलेज जःखः चकलेट व जुसया गोदामय् छापा मारे यानाः नियन्त्रणय् काःगु खः । प्रहरीया कथं म्याद मदयेधुंकूगु सामान मियाच्वंगु सुचंया आधारय् गोदामय् छापा मारे याःगु खः ।

प्रहरीं गोदामया सञ्चालक भारतीय नागरिक रौनक गोत्रा व आइएन डिस्ट्रिब्युटर्सया सञ्चालक पुष्पादेवी अग्रवालयात ज्वंगु दु। प्रहरीया कथं गोत्रायात कलंकी व अग्रवालयात पुतली सतकं ज्वंगु खः । प्रहरीया कथं न्याकू क्वथाय् म्याद फुइधुंकूगु स्निकर ब्राण्डया चकलेट, ओरियो ब्रान्डाया बिस्कुट, ट्यांग जुस पाउडर तयातःगु लुइकूगु दु। म्याद फुइधुंकूगु सामानय् नक्कली स्टिकर दयेका न्हूगु मिति तयेगु निंतिं गोदाम दुने हे न्याम्ह मजदुरयात तयातःगु खः । अज्याःगु स्टिकर छापे यायेगु मेसिन समेत अन तयातःगु खः ।

ज्वंपिंत जनस्वास्थ्य व खाद्य तथा गुणस्तरय् गम्भीर अपराध याःगु द्वपनय् माःगु अनुसन्धान यानाः कारबाही प्रक्रिया न्ह्याइगु खँ प्रहरीं धाःगु दु ।