शेयर बजाः थहां वंसां कारोवार रकम म्हो

येँ – मंगलबाः शेयर बजारय् सामान्य सुधार खनेदुगु दु । थ्व वालय् नं कारोवार सुरु जूगु न्हि आइतवाः निसें हे बजाः कुहां वनाच्वंगु खःसां मंगलवाः धाःसा सामान्य सुधार खनेदुगु खः । सामान्य सुधार जूसां बजारय् कारोवार रकम धाःसा थहां वनेफुगु मदुनि । कारोवार रकम थहां मवंगु व बजारय् खनेदुगु सुधार नं सामान्य जक जूगुलिं लगानीकर्ता धाःसा निराश हे जूगु दु ।

लगानीकर्तातय्ं सरकारया नीतिया हे कारणं बजार थहां वने मफयाच्वंगु खँ धाःगु दु । मंगलवाः शेयर बजाः मुक्कं २.४० अंकं थहां वनाः ११३४.७९ अंकय् थ्यंगु दु । कारोवार रकम धाःसा मुक्कं १६ करोड ५२ लाख जक जूगु दु । गुकी १५५ गू कम्पनी ६ लाख ५४ हजार कित्ता शेयर न्यायेमी जूगु खः ।

छुं ई न्ह्यव तक ५० करोडया कारोवारयात औसत कथं कायेगु यानाच्वंगु खःसा आः उकिया बछि बराबरया नं कारोवार जुयाच्वंगु मदु । मेखे म्हिगः फुक्कं कम्पनीतय् शेयर कारोवार नं मजुल । सुचीकृत जुयाच्वंगु गुलिखे कम्पनीतय्सं नवीकरण शुल्क बुझे मयाःगुलिं नेपाल
स्टकं अज्याःगु कम्पनीतय् कारोवार नं रोक्का यानातःगु दु ।

मंगलवाः दकलय् अप्वः नबिल बैंकया कारोवार जूगु खः । नबिलया जक १ करोड ३२ लाख तकाया शेयर न्यायेमी जुल । कारोवार दांया ल्याखं प्रभु बैंक निगूगु थासय लात । प्रभूया १ करोड ३ लाखया कारोवार जूगु खः ।

मंगलवाः ११ समूहया कारोवार न्यागू समूहया उपसुचक कुहां वःगु दुसा खुगूया थहा वंगु खः । दकलय् अप्वः वाणिज्य बैंक समूहया उपसुचक ०.४३ प्रतिशतं थहांवंगु दुसा अन्य समूहया दकलय् अप्वः ०.५४ प्रतिशतं कुहां वंगु दु ।