निगमया मेगु विमान साउन ११ गते वइगु

येँ – नेपाल वायु सेवा निगमं न्यायेत्यंगु मेगु वाइड बडी विमान साउन ११ गते येँय् थ्यनीगु जूगु दु । मकालु नां बियातःगु थ्व विमान थौंकन्हय् फ्रान्सय् उडान परीक्षण जुयाच्वंगु खँ निगमं धाःगु दु ।‘नाइन एन एएलजेट कलसाइनया थ्व विमान नेपाः दुत हयेगु निंतिं फुक्क तयारी जुइधुंकूगु खँ निगमया प्रवक्ता रवीन्द्र श्रेष्ठं कनादीगु दु ।

विमान कायेत नेपाःया छगू पुचः शुक्रवाः फ्रान्सपाखें वंगु दुसा निगमया महाप्रबन्धक सहितया छपुचः थौं आइतवाः उखे वनेत्यंगु दु । वाइड बडी ए ३३०–२०० सिरिजया थ्व विमान आः फ्रान्सया तुलुज शहरं ब्वयेकाः येँय् हइ । निगमया न्हापांगु वाइडबडी विमान अन्नपूर्ण वंगु असार १४ गते येँय् थ्यंकः हःगु खः ।

निगमं थुपिं विमान छगःया १० करोड ४८ लाख अमेरिकी डलर पुलाः न्याःगु खः । थ्व निगलं विमानया सिट क्षमता २७४ गू दु । न्हापां येँय् थ्यंगु अन्नपूर्ण वइगु साउन १८ गते निसें कतारया दोहाय् व्यावसायीक उडान सुरु यायेत्यंगु दु । आः वयेत्यंगु विमानं नं न्हापां पुलांगु हे गन्तव्यय् उडान याइसा लिपा बुलुहुं न्हूगु गन्तव्य उडान याइगु खँ निगमं धाःगु दु ।

अन्तर्राष्ट्रिय नियम कथं न्हूगु विमानं न्हापां पुलांगु हे गन्तव्यय् निं ब्वेकेमाः ।प्रवक्ता श्रेष्ठं विमान ब्वयेकेगु निंतिं पाइलटया व्यवस्था जुइधुंकूगु खँ कनादीगु दु । वय्कलं धयादीगु दु, ‘वाइड बडी ब्वयेकेगु निंतिं पाइलट तयार जुइधुंकूगु दु । पाइलटत नं येँय् वयेगु क्रम सुरु जूगु दु । मेगु वाइड बडी विमानया निंतिं नं याकनं हे पाइलटया व्यवस्था जुइ ।’