ओली बाः, जनान्दोलन व चाउचाउया विज्ञापन

छगू कार्टुन । निम्ह नेता आमने सामने । निम्हं नेतातय् लिउने फैतय् बथां । थुकी छगू सन्देश नं घानातःगु दु । फैतय् ल्याः प्रशस्त मात्राय् दुगुलिं थुगुसी मोहनिया इलय् लाया अभाव जुइमखु, भाः नं गाक्कं दनी । थय्क स्वयेबलय् थ्व कार्टुनयात गुलिसिनं अनर्थ नं तायेकेफु ।

कार्टुन नं कविता थें खः, तप्यंक अर्थत छ्यायेत स्वयेबलय् अनर्थ खने दयेफु । तर उकिया सांकेतिक अर्थ लाये फयेकेमाः । व अर्थपूर्ण जुइ । मर्मस्पर्शी जुइ । कार्टुन जुइ । व्यंग्यात्मक जुइ । सामान्य माध्यमं उले मफुगु कटु यथार्थयात उलेत व्यंग्यात्मक अभिव्यक्ति अनिवार्य जुइ ।

व्यंग्यं सम्बन्धित पक्षयात तं वयेका बीफु । तर विवेकशील जुयाः व्यंग्ययात थुइकेमाः । थ्वं मनूयात नुगलय् आत्मज्ञान थनाबी । न्ह्यलं चायेका बी । थौं नं झीत शहीदत लुमनी । शहीद गंगालाल श्रेष्ठ, शहीद दशरथ चन्दयात स्यायेच भचाखुसिइ यंकी । इमिसं छातिइ गोली फइ ।

अबलय् इमिगु लिउने लखौं जनताया भौतिक उपस्थिति मदु । अथे हे शहीद शुक्रराज शास्त्री जोशी व शहीद धर्मभक्त माथेमां फाँसीया खिपः थःगु गपतय् फइ । इमि लिउने नं लखौं जनता मुंगु मदु । इमिसं शुन्य सन्नाटाय् थःत बलिदान बियाः देय् व जनताया निंतिं क्रान्तिया छेडन यात ।

देय्यात निरंकुश जहानिया शासनपाखें मुक्ति बिल । देय् व जनताया निंतिं मृत्युवरण याःबलय् शहीदतसें याकः याकः हे छाति फल, गःपः बिल । तर थौं इमिसं बिउगु शहादतया क्रान्तिया लिउ वर्तमान भविष्यया करोडौं जनतां जय जयकार याइ । शहीदतय् जय जयकार याकेत गनं नं मनूत मुना हयेमाःगु मदु ।

प्रधानमन्त्री ओलीया छगू सभाय् ‘ओली बाः, जिन्दावाद’ धकाः गगनभेदी सः थ्वयेकल । जनताया छेँय् छेँय् थःत बुइकूपिं सक्कलि अबुपिं ‘बाःपिं’ वृद्धाश्रमय् च्वं वने मालाच्वंगु दु । लखौं ल्याय्म्हत विदेशय् । अशक्त ज्याथजिथिपिं हाःनाः मदयाः छेँय् छेँय् निरीह जुयाच्वन । देशय् मांअबुपिनि हालत थथे ।

ख्यानाः हयेमाःगु मदु । स्वतस्फूर्त, नतमस्तक जुयाः शहीदप्रति जनतां नमन याइ । तर । थौं देशय् निम्ह नेतात आमने सामने दनाच्वंगु दु । राजनीतिक हाँक बियाः । निम्हेसिनं थाय् थासय् सभात यानाच्वंगु दु । मनूत मुंकेगु प्रतिस्पर्धाय् अनेक हर्कत यानाच्वंगु दु । ‘वयागु सभाय् झिद्वः हे मनू मदु ।

जिगु सभाय् झिगू लाख जनता दु ।’ निखलकं नं थःथःगु दम्भ क्यनाच्वंगु दु । डम्फु थानाच्वंगु दु । थःथःगु पक्षय् वःपिंत सभाय् नेतातय् इशाराय् लाना थायेकेगु, नारा लगे याकेगु यानाच्वंगु दु । प्रधानमन्त्री ओलीया छगू सभाय् ‘ओली बाः, जिन्दावाद’ धकाः गगनभेदी सः थ्वयेकल ।

जनताया छेँय् छेँय् थःत बुइकूपिं सक्कलि अबुपिं ‘बाःपिं’ वृद्धाश्रमय् च्वं वने मालाच्वंगु दु । लखौं ल्याय्म्हत विदेशय् । अशक्त ज्याथजिथिपिं हाःनाः मदयाः छेँय् छेँय् निरीह जुयाच्वन । देशय् मांअबुपिनि हालत थथे । आः ओली ‘बाः’ धकाः जनतायात ककु सुक्क हाले मायेकाच्वन ।

ओली ‘बाः’ । सदावहार ‘बाः’ । गबलें बुढा मजुइपिं बाः । थौंया देय्या नेतात । वृद्धाश्रमय् जनताया बौपिंत जक जुइ । राजनीतिक ‘बाः’पितं मखु । अजम्बरी ‘बाः’पिंत ला राणा प्रधानमन्त्री चन्द्रशम्शेरं सिंहदरवार दयेकाथकूगु दु । थः निरंकुश उत्तराधिकारीतय्त गास, बासया व्यवस्था याना थकूगु दु ।

राणाकालय् नं सिंहदरवाराश्रमया निंतिं ल्वापु जू । घात प्रतिघात जू । राणा खलकय् ए. बी. सी धकाः वर्गाीकरण यात । लिपा राणा खलः दुने हे स्ववंशीय काटमार जुइ । ठीक देशय् थौं नं राणा वर्गीकरणया भूत नेकपा दुने दुबिउगु दु । कथित छगू पार्टी दुने हे शक्तिया संघर्ष न्ह्याःगु दु ।

नेकपाया निम्ह प्रमुख नेतामध्ये ओली देशया ‘बाः’ जुइत स्वयाच्वंगु दुसा मेम्ह नेता प्रचण्ड देय्या अजम्बरी राजनेताया पदय् अडिग जुयाच्वंगु दु । चन्द्रशम्शेरया उत्तराधिकारी जुयाः सिंहदरवार कब्जा यायेगु निम्ह नेता दथुया ल्वापु खः थौंया राजनीतिक मूलधारया गन्तव्य ।

निगुलिं पक्षं जनतायात थःथःगु पक्षय् सालेत जनतायात फै खंकाच्वंगु दु । थौं देय्या पीडित जनतां वाः चायेकाच्वंगु दु ।
मेम्ह कथित नेता डा. बाबुराम भट्टराई नं गनं ध्याकुंचाय् ती हू हाः थें ‘आः देशय् मेगु जनआन्दोलन अनिवार्य जुइ । आः मनूतय्सं ज्यान बीत तयार जुइमाल’ हाला हयाच्वंगु दु ।

अथे हे मेम्ह नेता प्रचण्ड नं मांशाहारी जनयुद्धया पुनरावृत्तिया निंतिं वकालत यानाच्वंगु दु । जनतायात थौ नेतातय्सं जनआन्दोलनया विज्ञापन चाउचाउया विज्ञापन थें यानाः जनतायात व्यापारिक शोषण, दोहन यायेत स्वयाच्वंगु दु ।
राजनीतिक उपभोक्तावाद न्ह्याकेत स्वयाच्वंगु दु ।

थन छता खँ लुमनी । छम्हेसिनं स्तरहीन अं दोकय् तयाः मीत स्वयाच्वन । सुना नं न्याः मवः । अले वं व अं टोकरीइ तयाः ‘माल्दा, माल्दा’ धकाः ततसलं हाल । अं तुरन्त हे चुल । डा. बाबुराम ! थज्याःगु कथित माल्दा जनआन्दोलनया विज्ञापन यानाः जनतायात ध्वं लाये गात ।

डा. बाबुरामं थः राजनीतिक सहयात्री प्रचण्डयात अर्बौं तका ध्यबा नल धकाः आरोप यात । हाकनं हालय् प्रचण्डलिसे छगू हे मञ्चय् च्वं वइ । प्रचण्डं बाबुरामया धुमधाम प्रशंसा याइ । इमिगु मित्रताया खँ जुल । देशय् थौं देश व जनताया निंतिं राजनीति जुयाच्वंगु मदु । खः । थौं देय्यात जनआन्दोलन माः ।

आवश्यक । थुकी निगू मत दइमखु । तर देय्यात माःगु जनआन्दोलन देय् व जनताया निंतिं जुइगु अग्र्यानिक जनआन्दोलन खः । जनताया मस्तय्त थःगु स्वार्थया निंतिं ह्वानाः याइगु विषाक्त, अखाद्य, दूषित विकासे जनआन्दोलन मखु ।

विकासे जनआन्दोलनया बजाः दयेफु । तर स उपभोक्तातय्त फाइदा याइमखु । उकिं थौं जनयुद्ध ला माःगु दु, क्रान्ति ला माःगु दु । कथित जनआन्दोलन क्रान्तिया खिलाफय् ।