प्रव्रज्या संवर बारे प्रवचन

येँ- शाक्य वज्राचार्य जातिया प्रव्रज्या संवर विषययात कयाः छगू प्रवचन ज्याझ्वः जुल । उगु जाति दुने जुइगु प्रव्रज्या संवरय् परम्परगत ज्ञानया म्हो जुया वंगु व थुकिं चुनौति वयाच्वंगु खँय् सरोकारवालातय्सं चिउताः प्वंकूगु दु ।

जिसि आजु गुथि, रत्नकेतु महाविहार झ्वाःबहाःया ग्वसालय् बरे छुइगु अर्थात प्रव्रज्या संवर धइगु छु ? छाय् याइ ? गुकथं याइ ? धइगु विषयय् जूगु प्रवचन ज्याझ्वलय् थःगु नुगःखँ तयादिसें प्रा. डा. नरेशमान वज्राचार्यं परम्परागत ज्ञानया म्हो जुया वनाच्वंगुलिं परम्परायात निरन्तरता बीगुलिइ चुनौति नं वयाच्वंगु खः धयादिल ।

लुम्बिनी बौद्ध विश्वविद्यालयया पुलांम्ह उपकुलपति तकं जुयादीम्ह बौद्ध विद्वान प्रा. डा. वज्राचार्यं आजीवन जिम्मेवारी बहन यायेगु प्रतिवद्धतालिसें सदस्यता प्राप्त यायेगु हे ‘बरे छुइगु’ परम्परा खः धयादिल । लिसें वय्कलं झिगू शील पालना यायेगु समाधी (ध्यान) यायेगु व प्राप्त ज्ञानया चिन्तन मनन यानाः साक्षात्कार यायेगु नापं बौद्ध विद्यार्थी जीवन यापनया अभ्यास शुरु यायेगु हे प्रव्रज्य संवर खः धयादिल । नेपाल सरकारया पुलांम्ह सहसचिव लिसें समितिया सह संयोजक आनन्दरत्न वज्राचार्यं प्रव्रज्या संवर बारे शैक्षिक ज्याझ्वःया अभाव महसुस यासें थुकथंया ज्याझ्वः यानागु जानकारी बियािदल ।

प्रा. डा. गौतमरत्न वज्राचार्यं लसकुस यानादीगु ज्याझ्वलय् गुथिया न्याम्ह थाकुलि अशोकरत्न वज्राचार्य, प्रा. डा. गौतमरत्न वज्राचार्य, मोहनमानन्द वज्राचार्य, सानुराजा वज्राचार्य व नरेन्द्र वज्राचार्य लगायतया उपस्थिति दुगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन