वज्राचार्य अध्ययन मण्डलया ४५ दँ बुदिं हन

येँ(नेपालभाषा टाइम्स)÷ वज्राचार्य अध्ययन मण्डलया ४५ क्वःगु बुदिं म्हिगः छगू ज्याझ्वःयासें हन । अति पुजनीय महागुरु पं. बद्रीरत्न वज्राचार्यं नीस्वना बिज्याःगु अध्ययन मण्डलया पीन्यादँ बुदिं अध्ययन मण्डलया पदाधिकारी व वसपोलया उत्तराधिकारी शिष्यपिंपाखें वसपोलया किपाय् स्वां देछासे त्वाःदेवाय् मत च्याकाः ज्याझ्वः उलेज्या याःगु खः ।

अध्ययन मण्डलया नायः कर्णेल ई. सानुराजा वज्राचार्यया सभापतित्वय् वसपोल पं. बद्रीरत्न गुरुजुया शिष्यलिसें उत्तराधिकारीकथं कयातःम्ह प्रा. डा. नरेशमान वज्राचार्यंया प्रमुख आतिथ्यताय् जूगु खः । ज्याझ्वलय विशेष पाहांकथं येँ देय्या झिंच्यागू विहारया देय् थाय्पा मूल चक्रेश्वर मोहनरत्न वज्राचार्य झायादीगु खः । मूपाहां प्रा. डा. वज्राचार्यपाखें त्रिरत्न शरण गमन यानाबिज्यासें न्ह्याःगु ज्याझ्वलय् अध्ययन मण्डलया छ्याञ्जे धनकाजी वज्राचार्य लसकुस यानादीगु खः ।

ज्याझ्वलय् लुम्बिनी विश्वविद्यालयया पुलांम्ह उपकुलपति प्रा.डा. हृदयरत्न वज्राचार्य, नेवाः न्ह्यलुवा मल्ल के. सुन्दर, नेपालभाषा केन्द्रीय विभागया प्रमुख सह प्रा. राजनलाल जोशी, वसपोल बद्री गुरुजुया शिष्या प्रा. डा. वज्राचार्यं नेवाः बौद्ध धर्म, गुरुजुपिंत तत्कालीन इलय् राज्यपाखें जूगु उत्पीडनलिसें उकिया विरुद्ध पं. वज्राचार्यं यानाबिज्याःगु संघर्षया थीथी पक्षयात कयाः नुगःखँ तयादीगु खः ।
देय् दबूया संरक्षक लिसें नेवाः न्ह्यलुवा मल्ल के. सुन्दरं थौंया इलय् वज्राचार्यत कर्मकाण्डय् जक सीमित जुइ मजिउ धासें आः थुकी हे जक लिकुनाच्वनेगु ई नं मखु धयादिल ।

नेपालभाषा केन्द्रीय विभागया प्रमुख सह प्रा .डा. राजनलाल जोशीं वज्राचार्य समुदाय स्वयम छगू विश्वविद्यालय खः धासें थुगु समुदायात न्ह्याकेत ज्वःमदुगु योगदान बियादीपिं अतिकं नांजाःपिं सुरत वज्र, लिला वज्र थेंज्याःपिं जक मखु स्वयम पं. बद्री गुरुजु थेंज्याःपिनिगु तकं छुं हे अभिलेखीकरण याये मफुगु विडम्बना खः धयादिल ।

मूपाहां प्रा. डा. वज्राचार्यं अध्ययन मण्डलया नीस्वनाया इतिहास कनादिसें पं. बद्रीरत्न वज्राचार्यं अध्ययन मण्डल नीस्वनेगु जक मखु उकियात क्रियाशील याना तयेगु निंतिं यानादीगु संघर्ष खँ कनादिसें वसपोल छम्ह अन्याय, अत्याचार, उत्पीडन सह याये मफुम्ह व्यक्तित्व जूगु खँ कनादिल ।

उगु हे ज्याझ्वलय् भाषा आयोगया दुजलय् नियुक्त जुयादीम्ह सुरेश मानन्धर व बागमति प्रदेशया संस्कृति, पर्यटन व सहकारी मन्त्री शैलेन्द्रमान वज्राचार्ययात मूपाहांपाखें खादा क्वखायेकाः भिंतुना देछासे हनेज्या नं याःगु खः ।

ज्याझ्वलय् पुलांम्ह मन्त्री भिमसेनदास प्रधान, नेवाः देय् दबूया नायः पवित्र वज्राचार्य, धर्मोदय सभाया महासचिव सागरमान वज्राचार्य, समाजसेवी महेन्द्र शाक्यपिनिगु उपस्थिति दुगु खः ।
उगु इलय् ज्याझ्वःया सभानायः कर्णेल ई. वज्राचार्यं पं. बद्रीरत्न अनुसन्धान वृत्तिया घोषणा यानादीगु खः। वय्कलं वज्राचार्य समुदायया थीथी पक्षय् अनुसन्धान यायेत नेपालभाषाय् स्नातकोत्तर यानाच्वंपिनिगु निंतिं अध्ययन मण्डलपाखें थ्व विद्वत वृत्ति प्रदान यायेगु घोषणा यानादीगु खः ।

सम्बन्धित बुखँ

LEAVE YOUR COMMENTS