काेभिड खाेप बिइगुली ज्यष्ठ नागरिकतयत बेवास्ता, सरकार असंवेदनशील

येँ – सरकारं कोभिड १९ विरुद्धया खोप बिउबलय् अन्तर्राष्ट्रिय मापदण्ड कथं मबिउगु धाःसें विरोध जूगु दु । विश्व स्वास्थ्य संगठनं न्हापां स्वास्थ्यकर्मी व फ्रन्टलाइन च्वनाः ज्या याःपिं कर्मचारी धुंकाः ज्येष्ठ नागरिकतय्त खोपय् प्राथमिकता बिइमाःगु मापदण्ड दयेकातःगु खःसां नेपालय् धाःसा थ्व मापदण्ड कथं खोप मबिउगु खँ विज्ञतय्सं हे धयाहःगु दु ।

भारतं ग्वाहालि कथं बिउगु १० लाख खोप सरकारं न्हापां ला मापदण्डकथं स्वास्थ्यकर्मी व फ्रन्टलाइनय् च्वनाः ज्या याःपिंत हे बिउगु खःसां थ्व लिपा धाःसा ज्येष्ठ नागरिकतय्त बीमाःगु खोप पाः मिचे यानाः पत्रकारतय्त, विदेशी नियोगया कर्मचारीतय्त व सरकारी कर्मचारीतय्त बिउगु खः ।

थ्व धुंकाः नं ज्येष्ठ नागरिकतय्त मबिसे वंगु आइतवाः निसें बैंक कर्मचारी, स्थानीय तहया निर्वाचित जनप्रतिनिधि, सीमा सुरक्षा पोष्टय् खटे जुयाच्वंपिंत खोप बिइगु सुरु याःगु खः । डब्ल्यूएचओया मापदण्ड कथं ज्येष्ठ नागरिकतय्त वास्ता मयासें सरकारं पहुँच दुपिंत जक खोप बियाच्वंगु सः तच्वया वःगु खः ।

त्रिभुवन विश्वविद्यालयया पुलांम्ह उपकुलपति केदारभक्त माथेमां धयादीगु दु, ‘संसार न्यंकभनं हे ज्याथजिथिपिं, उकिसनं असक्ततय्त प्राथमिकता बियाः खोप बी । तर झीथाय् धाःसा अझ नं ज्याथजिथिपिनि पाः वःगु मदुनि । सरकार तसकं असंवेदनशील खनेदत । शायद सरकारं खोपय् नं राजनीतिक लबः कायेत स्वःगु जकं खः ला ?’

पहुँच दुपिं न्ह्याम्हेसिनं खोप कयाच्वंगु धासें वय्कलं थःत नं ग्वःगु थासं खोप कायेत मिले यानाबी धकाः खँ वःगु खःसां थःम्हं मकयागु खँ धयादीगु दु ।

‘ज्याथजिथिपिं न्ववाये मफु, अथे जूगुलिं न्ह्यागु याःसां जिउ धकाः तायेकूगु थें च्वन’ वय्कलं धयादीगु दु, ‘जिं हे म्हो उमेरयापिं मनूत, गुपिं थीथी पहुँचवाला थासय् च्वनाच्वंपिं खः, उमिसं खोप कया वयेधुन धाःगु न्यना, थ्व ला फ्रन्टलाइन ज्या याइपिं धयागु नामय् धाँधली यानाः ज्याथजिथिपिंत ह्ययेकेत स्वःगु खनेदु ।’

तर स्वास्थ्य तथा जनसंख्या मन्त्रालयया अधिकारीतय्सं धाःसा थःपिंसं प्राथमिकता मिचे मयानागु व ज्येष्ठ नागरिकतय्त नं फागुनया अन्तपाखे खोप बीगुतयारी जुयाच्वंगु खँ धाःगु दु । सरकारी अधिकारीतय्सं याकनं हे २० प्रतिशत जनसंख्याया निंतिं खोप वयेत्यंगुलिं फागुनया २३–२४ निसें ज्येष्ठ नागरिकतय्त खोप बीगु सुरु जुइगु खँ धाःगु दु ।

सरकारं गठन यानातःगु कोभिड १९ समितिया विज्ञ समितिं दयेकूगु मस्यौदाय् न्हापांगु चरणय् हे स्वास्थ्यकर्मीत लिसें ७५ दँ स्वयां च्वय्यापिंत खोप बीगु, निगूगु चरणय् ५५ निसें ७४ दँ उमेर समूहयापिं सकलें व ४० निसें ५४ दँ उमेर समूहयापिं दीर्घरोगीतय्त खोप बीगु धयातःगु खः । लिपा सरकारं थुकियात परिमार्जन यानाः निगूगु चरणय् ५५ दँ स्वयां च्वय्यापिं सकसितं खोप बीगु धाःगु खः । सरकारं थःम्हं हे दयेकूगु मस्यौदाय् तकं निगूगु चरणय् ज्येष्ठ नागरिकतय्त खोप बीगु धाःसां आःतकं मबिउनिगुलिं विरोध जूगु खः ।

सम्बन्धित बुखँ

LEAVE YOUR COMMENTS