भाषा कानुनय् ढिलासुस्ती

येँ (नेपालभाषा टाइम्स)- बागमति प्रदेश सरकारं नेपालभाषा व तामाङ भाषायात सरकारी ज्याखँया भाषा कथं मान्यता बीत कानुन पारित याःगु दछि दयेत्यनं नं कानुन कार्यान्वयन यायेगु ज्याय् धाःसा ढिलासुस्ती जुयाच्वंगु दु । कानुन पारित याःगु छुं ई लिपा हे बागमति प्रदेशया तत्कालीन सरकार क्वःदलाः न्हूगु सरकार वःगु व सरकारय् सचिव नियुक्ति यायेगु ज्या लिबाःगु कारणं कानुन कार्यान्वयन नं लिबाः वंगु खँ धाःगु दु ।
सरकारयात कानुनया कार्यान्वयन याकनं याकेत इनाप यासें वंगु सोमवाः नेवाः देय् दबू, तामाङ घेदुङ व भाषा आयोगया दुजःपिं वनाः इनाप याःगु खः । वय्कःपिंसं प्रदेशया मुख्यमन्त्री बहादुर सिंह तामाङ, संस्कृति मन्त्री विमल ठकुरी व मुख्य सचिव डा. हरि कुमार लम्सालयात नापलानाः भाषा सम्बन्धी कानुन कार्यान्वयनया ज्या याकनं न्ह्याकेत इनाप याःगु खः । उगु इलय् तत्कालीन संस्कृति मन्त्री लिसें सांसद शैलेन्द्र वज्राचार्य नं दीगु खः ।

भाषा सम्बन्धी कानुन कार्यान्वयन यायेगु लागिं प्रदेशया संस्कृति मन्त्रालयं छगू कार्यदल दयेकाः प्रतिवेदन नं तयार याःगु खः । उकी कानुनयात गुकथं कार्यान्वयन यायेगु धइगु विवरण प्रतिवेदनय् उल्लेख यानातःगु दु । थ्व प्रतिवेदन मन्त्रिपरिषद्पाखें पारित यानाः ज्या न्ह्याकेमाःगु खःसा आः तक मन्त्रिपरिषद्य् पेश हे मजूनि । आः प्रदेशया मुख्य मन्त्री तामाङ लिसें मुख्य सचिव लम्सालं थुकियात याकनं मन्त्रिपरिषद् यंकेगु बचं बियादीगु दु ।

सरकारं आःयात प्रदेशया संसद सम्बन्धी गतिविधि नेपालभाषा व तामाङ भाषां अनुवाद यायेगु लागिं अधिकृतस्तरया निम्ह कर्मचारी नियुक्त यायेगु निर्णय धाःसा यायेधुंकूगु दु ।

सरकारी ज्याखँया भाषा सम्बन्धी कानुनया आधारय् थीथी ज्या यायेगु लागिं थ्व स्वयां न्ह्यःया संस्कृति मन्त्री शैलेन्द्र वज्राचार्यं नेवाः देय् दबू व तामाङ घेदुङयात छगू छगू करोड बजेट तया थकूगु खः । देय् दबू, घेदुङ व भाषा आयोगया दुजःपिंसं थ्व बजेट नं याकनं निकासा यायेत प्रदेश सरकारयात इनाप याःगु दु । देय् दबू व घेदुङं थ्व बजेट छु छु ज्याय् खर्च यायेगु धकाः छगू प्रस्ताव नं तयार यायेधुंकूगु दुसा उकुन्हु संस्कृति मन्त्रालयय् उगु प्रस्ताव नं दर्ता याःगु खः ।

मन्त्री नापलायेगु लागिं देय् दबूया शान्तलाल श्रेष्ठ, सत्यनारायण श्रेष्ठ, घेदुङया सिन्चु ब्लोन, जगत दोङ व भाषा आयोगया सुरेश किरणपिं झाःगु खः ।