संघ–प्रदेशया प्रहरी अन्यौल

प्रदेशया प्रहरी वयेवं समायोजनय् जटिल जुइगु बिचाः

येँ – प्रदेश नम्बर २ या प्रदेश सभां प्रदेश प्रहरी सम्बन्धी विधेयक पारित यायेवं आः संघ व प्रदेश दथुइ प्रहरी सेवायात कयाः कचवं पिहां वइगु सम्भावना ब्वलंगु दु । प्रदेश २ या संसदं पारित याना हःगु प्रदेश प्रहरी सम्बन्धी विधेयकयात प्रदेश प्रमुखं प्रमाणीकरण यायेवं थ्व जटिल न्ह्यसः ब्वलंगु खः ।

प्रदेश सम्बन्धी थ्व विधेयक प्रमाणीकरण जुइवं आः प्रदेश सरकारं प्रहरी भर्ना काये फइगु जूगु दु । २ नम्बर प्रदेश सरकारं आः प्रदेशया लागिं प्रहरी भर्ना प्रक्रिया शुरु समेत यायेत्यंगु खँ धाःगु दु । छुं जुयाः प्रदेशं थःगु हे लागिं प्रहरी भर्ना काल धाःसा संघ (केन्द्र) अन्तर्गत लानाच्वंगु नेपाल प्रहरी छु जुइ धइगु न्ह्यसः पिहां वःगु दु ।

प्रदेश सरकारं थःपिनि लागिं प्रदेश प्रहरी भर्ना याये दइ धकाः संविधानय् उल्लेख यानातःगु दु । तर उकिया व्यवस्थापन गय् यानाः जुइ धइगु खँ धाःसा संघीय प्रहरी ऐन वयेधुंकाः जक निर्धारण जुइमाःगु खः । संघीय प्रहरी ऐन वये न्ह्यः हे २ नम्बर प्रदेशं थःगु हे प्रहरी शक्ति खडा यायेत्यंगुलिं थ्व अन्यौल पिहां वःगु खः ।

प्रदेश सरकार गठन जुइधुंकल कि केन्द्रया प्रहरीयात हे प्रदेशय् नं समायोजन याना यंकेगु प्रस्ताव न्ह्यःने वयाच्वंगु दु । तर थ्व खँ नं संघीय प्रहरी ऐनं हे निर्धारण यानातःगु दु । आः प्रदेशत थःपिंसं हे थःपिनि प्रहरी शक्ति खडा यात धाःसा कन्हय् संघया प्रहरीतय्त गय् यानाः समायोजन यायेगु धइगु न्ह्यसः पिहां वःगु दु ।

२ नम्बर प्रदेशं धाःसा केन्द्र सरकारं आः तक नं संघीय प्रहरी ऐन मदयेकूगु कारणं वयात पी फइ मखु धासें थःपिनिगु ऐन पारित याःगु दु । प्रदेश सरकार थःपिंसं हे प्रहरी ऐन पारित यायेत्यंगु खँय् सत्तारुढ दल नेकपाया अध्यक्ष पुष्पकमल दाहालं ‘केन्द्रयात ओभरटेक यात धाःसा दुर्घटना जुइफु’ धकाः छुं ई न्ह्यः ख्याच्वः बियादीगु खः । तर वय्कलं ख्याच्वः बियादीसां केन्द्रय् संघीय प्रहरी ऐन तर्जुमा यायेगु ज्याय् धाःसा खास हे चिउताः मतःगु द्वपं प्रदेश २ या नेतातय्सं बियाच्वंगु दु ।

कर्मचारी समायोजनय् सरकार लिचिउगु द्वपं
सरकारं कर्मचारी समायोजन अध्यादेश पारित यायेधुंकाः यदि कर्मचारी खटे यानागु थासय् मवन धाःसा कारबाही यायेगु ख्याच्वः बिउगु दु । तर स्थानीय निकायया कर्मचारीं धाःसा सरकारया उगु ख्याच्वःयात वेवास्ता यानाः आन्दोलनयात निरन्तरता बीगु खँ धाःगु दु ।

स्थानीय निकाय कर्मचारी आन्दोलनया हरिकुमार श्रेष्ठं शुक्रवाः च्वनीगु कर्मचारी संगठनया बैठकं आः गज्याःगु आन्दोलन यायेगु धइगु खँ क्वःछीगु जानकारी बियादिल । वय्कलं सरकारं थःपिनि मागयात सम्बोधन यायेगु स्वयां नं दमन यानाः न्ह्याःवनेत स्वयाच्वंगु द्वपं बियादीगु दु ।

वय्कलं आः जुइगु आन्दोलन फयांफछि जनतायात दुःख मबीगु कथं जुइ धासें यदि सरकारं थःगु आन्दोलनयात वेवास्ता यात धाःसा देय्न्यंकंया नगरपालिका ठप्प यायेमाःलीगु ख्याच्वः नं बियादिल ।

सम्बन्धित बुखँ

LEAVE YOUR COMMENTS