३३ दँ लिपा मंकाः खलःया स्वक्वःगु तःमुँज्या रमेशमान पिया न्हूम्ह नायः

येँ (नेपालभाषा टाइम्स)- नेपालय् पहिचानया आन्दोलन थनेगु ज्याय् अग्रणी भूमिका दुगु नेपालभाषा मंकाः खलःया नेतृत्व न्हूगु पुस्ताय् हस्तान्तरण दु । म्हिगः जूगु मंकाः खलःया स्वक्वःगु (विधिवत संस्था दर्ता धुंकाःया न्हापांगु) तःमुँज्यां मंकाः खलःया दुजः लिसें भाषा आन्दोलनया नांजाःम्ह हस्ती भाजु रमेशमान पियायात न्हूम्ह नायः कथं ल्यःगु खः ।

तःमुँज्यां खलःया न्वकु पदय् बालकृष्ण प्रजापति–यात ल्यःगु दुसा छ्यांज्ये राजा शाक्य, दांभरि अमेश वज्राचार्य व मू दुजलय् ज्ञानेन्द्र मानन्धर, माधव स्यस्यः, प्रतापमान शाक्य, महेशमान डंगोल व रविन साय्मि निर्वाचित जुयादीगु खः ।

मंकाः खलःया थ्व तःमुँज्या ३३ दँ लिपा जूगु खः । थ्व स्वयां न्ह्य मंकाः खलःया न्हापांगु तःमुँज्या स्वयम्भू आनन्दकुटी विद्यापीठय् जूगु खःसा वयां लिपा ने.सं. १११२ य् निक्वःगु तःमुँज्या राष्ट्रिय सभागृहय् जूगु खः । म्हिगःया स्वक्वःगु तःमुँज्या धाःसा थनया विजेश्वरी ससुख्वातय् च्वंगु मंकाः खलःया थःगु हे दबूछेँय् जूगु खः ।

ने.सं. १०९९ य् पद्मरत्न तुलाधरया अध्यक्षताय् नीस्वंगु नेपाल मंकाः खलः निक्वःगु तःमुँज्या लिपा थीथी कारणं यानाः निष्क्रिय जुयाच्वंगु खःसा स्वदँ न्ह्यः संस्थापक न्वकु दुर्गालाल श्रेष्ठयात नायः दयेकाः संस्थायात विधिवत् दर्ता याःगु खः । म्हिगःया तःमुँज्या लिपा मंकाः खलःया संस्थापक पुस्तां बिदा कयाः पूवंक हे न्हूगु पुस्तायात नेतृत्व हस्तान्तरण यायेगु ज्या जूगु खः ।

तःमुँज्याय् मूपाहां कथं न्ववासें नेवाः न्ह्यलुवा मल्ल के. सुन्दरं मंकाः खलः नेपालय् भाषा व जातिया आन्दोलन शुरु याःगु ऐतिहासिक संस्था जूगु जुयाः आः वइगु न्हूगु नेतृत्वं थ्व संस्थाया आन्दोलनकारी भूमिकायात कायम हे याना तयेमाःगु खँ कनादिल । वय्कलं कनादिल, ‘मंकाः खलः धइगु आन्दोलनया प्रतीक खः, थ्व संस्था आः नं आन्दोलनकारी हे जुइमाः ।’

निर्वाचित लिपा थःगु नुगःखँ तसें न्हूम्ह नायः रमेशमान पियां संस्थाया आन्दोलनकारी छबियात यथावत् ल्यंकाः वित्तीय अनुशासन, पारदर्शिता व सांगठनिक संरचनायात क्वातुकाः संस्था न्ह्याकेगु बचं बियादिल ।

ज्याझ्वलय् दांभरि गणेश साय्मिं खलःया ल्याःचाः न्ह्यब्वयादीगु खःसा छ्यांज्ये राजा शाक्य (पुष्पानन्द शाक्य) या प्रतिवेदन रमेशमान पियां न्ह्यब्वयादीगु खः । लिसें मंकाः खलःया संस्थापकपिनि हामा पुचः दयेकेगु व ज्यासना पुचःया ल्याः ७ निसें १३ म्ह तयेगु कथं विधान नं संशोधन याःगु खः ।

न्हूगु नेतृत्व ल्ययेगु लागिं रामशरण डंगोलया अध्यक्षताय् निर्वाचन पुचः गठन यानाः निर्वाचनया ज्या न्ह्याकूगु खः ।