ने. सं. ११४४ ञलाथ्व नवमी -

भारतया बाँधं नेपालय् डुबान, भारतं दयेकूगु अवैध संरचना चीकेत सरकारयात उजं

येँ (नेपालभाषा टाइम्स) – प्रतिनिधिसभाया राज्य व्यवस्था तथा सुशासन समितिं नेपाःया सीमाय् भारतं दयेकूगु सतक, बाँध व तटबन्धं यानाः हे नेपालय् खुसिबाःया समस्या वयाच्वंगु जूगुलिं अज्याःगु संरचना तत्काल चीकेत माग याःगु दु ।

नेपाःया सीमा लिक्क वयाः भारतं यकःति रूपं बाँध, सतक व तटबन्ध दयेकूगु कारणं तराईया जिल्ला डुबानय् लानाच्वंगु जूगुलिं अज्याःगु संरचना चीकेत पहल यायेत नं राज्य व्यवस्था समितिं सरकारयात निर्देशन बिउगु दु । समितिं थ्व स्वयां न्ह्यः नं सरकारयात निक्वः तक थज्याःगु निर्देशन बीधुंकूगु दु। सोमवाः समितिं याःगु बैठकयया निर्णय न्यंकुसें समितिया सभापति शशी श्रेष्ठं न्हापा बियागु निर्देशन कार्यान्वयन यायेत नं निर्देशन बियादीगु खः ।

सरकारयात बिउगु निर्देशनय् धयातःगु दु, ‘खुसिबाः, चलः, डुबान, कटान, मलखं कइगु लगायत विपत्तिं जुइगु जनधनया जोखिम व क्षति म्हो यायेत व व्यवस्थापनया सन्दर्भय् थ्व स्वयां न्ह्यः थीथी मितिइ समितिं बिउगु निर्दे शन कडाइपूर्वक कार्यान्वयन यायेगु, याकेगु।’

उकथं हे राज्य व्यवस्था समितिं खुसिबाः व डुबानं पीडित व प्रभावितयात बीगु क्षतिपूर्ति व राहत ध्यबा अप्वयेकेत नं सरकारयात निर्देशन बिउगु दु। खुसिबालं प्रभावित क्षेत्रय् वासः यायेगु व्यवस्था मिले यायेत, सरुवा ल्वय् व महामारी न्यंके मबीत, विपदया इलय् जुइ फइगु आपराधिक व मिस्तय्त जुइफइगु मिसा हिंसा व दुव्यवहार पनेत माःगु सुरक्षा व्यवस्था यायेत नं सरकारयात निर्देशन बिउगु दु ।

राज्य व्यवस्था समितिया बैठकय् उपस्थित जुयादीम्ह गृहमन्त्री रामबहादुर थापां भारतीय हस्तक्षेपया कारणं तराई क्षेत्र डुबानय् लाःगु खँ धयादीगु दु। म्हिगः समितिया बैठकय् न्ववायेगु झ्वलय् वय्कलं भारतं सीमा क्षेत्रय् सतक थेंज्याःगु बाँध दयेकूगुलिं नेपाःया भूमि डुबानय् लाःगु धासें अज्याःगु गतिविधिपाखें नेपाःया सार्वभौमसत्ताय् तकं हस्तक्षेप जूगु बिचाः तयादीगु खः ।

गृहमन्त्री थापां धयादिल, ‘राजनीतिक रूपं धायेबलय् भारतं नेपालय् यानाच्वंगु हस्तक्षेप हे खः, उमिसं थःगु हित जक स्वल, नेपाःया हितयात ध्यान मबिल ।’

गृहमन्त्री थापां सीमा क्षेत्रय् दयेकूगु बाँध व संरचना चीकेत कुतः यानागु खःसां नं सार्थक मजूगु खँ धासें भारतीय प्रधानमन्त्री नेपाः वःगु इलय् थ्व सम्बन्धी सम्झौता जूगु खःसां उकिया पाय्छि कथं कार्यान्वयन मजूगु खँ कनादिल ।