कुमारी माजु नं अनलाइन क्लासय्

येँ – थौंकन्हय् कोरोना महामारीया कारणं स्कुलत बन्द जुयाच्वंगु दु । उकिं विद्यार्थीतय्सं अनलाइन क्लास कायेगु यानाच्वंगु दु । वहे कथं थौंकन्हय् लाय्कू कुमारी माजु नं अनलाइन क्लासपाखें हे आखः ब्वनेगु यानाच्वंगु दु । वसपोल स्वयम्भूइ च्वंगु मैत्री बोर्डिङ स्कुलय् २ तगिमय् ब्वनाबिज्याइम्ह विद्यार्थी खः । वसपोल कुमारी जुयाबिज्याये न्ह्यः हे उगु स्कुलया विद्यार्थी खः ।

न्हापा न्हापा वसपोलयात उगु स्कुलया शिक्षकपिं हे कुमारी छेँय् वयाः आखः ब्वंकीगु खः । तर थौंकन्हय् स्कुल बन्द जुयाच्वंगुलिं वसपोल नं मेपिं विद्यार्थी थें अनलाइन क्लासपाखें आखः ब्वनेगु यानाच्वंगु खः ।

कोरोना मदुगु इलय् न्हिंन्हिं सुथय् ९ बजेनिसें १२ बजे तक दर्शनया ई खः । न्हिनय् १२ निसें ४ बजे तक वसपोलया आखः ब्वनीगु ई खः । उकिं उगु इलय् दर्शन बी मखु । थौंकन्हय् धाःसा कोरोना संक्रमणया कारणं मेमेगु धार्मिकस्थलत बन्द जुयाच्वं थें कुमारी छेँ नं बन्द जुयाच्वंगु दु ।

न्हिंन्हिं नित्य पुजाया लागिं धाःसा तलेजु भगवतीया पुजारीं वसपोलया पुजा याइ । सुथय् ९ बजेनिसें १० बजे तक हिन्दू पुजारी कर्माचार्यपाखें व वयां लिपा बौद्ध धर्म माने याइपिं वज्राचार्यपाखें वसपोलया नित्य पुजा जुइ । पुजा लिपा ११ बजेनिसें १२ बजे तक वसपोलया भोजनया ई खः ।

येँय् आः तक ग्वःम्ह कुमारी दत धइगु यकिन जानकारी मदुसां आःयाम्ह कुमारी ५५ नम्बरय् लाःगु खँ धायेगु याः । ९० सालया तःभुखाय् लिपा कुमारीको गणना तयेगु शुरु जूगु खः धाइ । येँ महानगरपालिकां कुमारीलाई थौंकन्हय् लय् ५० हजार तका भत्ता स्वरुप बीगु याना वयाच्वंगु दु ।