दबुलिं थुमित चिइकेमाः

थौं देय्या सम्पूर्ण राजनीति बेठेगान नेकपा पार्टीया कलहसं केन्द्रीत जुयाच्वंगु दु। देशय् नेकपां अत्याधिक बहुमत प्राप्त यात । आः देशय् राजनीतिक स्थिरता वइ । देय् विकासया लँय् न्ह्याः वनी । राजनीतिक वृत्तं आंकलन याःगु खः । शासनशक्तिइ वसेंलि स्वयम नेकपां थःत विश्वय् हलचल हःगु कम्युनिस्ट सरकार धकाः दावा याःगु नं खः । गर्व याःगु खः । तर दुर्भाग्यवस एमाले व माओवादी जानाः दयेकूगु नेकपा दुने थौं थज्याःगु आत्मघाती कलह ब्वलंगु दु व कलहया लिच्वः सम्बन्धित पार्टीइ जक मखु स्वयम देश व जनताया वर्तमान भविष्यय् तकं बांमलाक लानाच्वंगु दु ।

नेकपायात थौं बेठेगान पार्टी धकाः थ्व अर्थय् धाये फयाच्वंगु दु कि पार्टीया विभाजित खेमातमध्ये गुगु आधिकारिक धइगु हे ठेगान मदु। विभाजित पक्षतसें छगुलिं मेगुयात नक्कलि धयाच्वंगु दु। थःगु आधिकारिकता प्रमाणित यायेत निगुलिं पक्षं जनता सामू शक्ति प्रदर्शन क्यनाच्वंगु दु। विभाजित दलया निगू पक्षया ल्वापुं अन्ततः छु रुप काइगु खः? चिन्ताया विषय जनतां खंकाच्वंगु दु ।

वंगु ०६३ सालया जनआन्दोलन राजसंस्थाया विरोधय् गणतन्त्रया निंतिं जूगु खः । अबलय्या संघर्ष राजसंस्था व जनताया दथुइ जूगु खः । राजसंस्थायात अन्त्य यायेत जनता छप्पँ जुइ । विभाजित खनेमदु। तर थौंया राजनीतिक आन्दोलन जनताया शासक दलया पुचः दथुइ जुयाच्वंगु दु। प्रधानमन्त्री ओलीया विरोधय् निर्णायक जनआन्दोलन यायेगु प्रचण्डं घोषणा याःगु दु। अझ प्रचण्डया पुलांम्ह सहयात्री डा. बाबुराम भट्टराई नं प्रधानमन्त्री ओलीया विरोधय् अविलम्ब जनआन्दोलन यायेमाः ।

०६३ सालया जनआन्दोलन राजसंस्थाया विरोधय् गणतन्त्रया निंतिं जूगु खः । अबलय्या संघर्ष राजसंस्था व जनताया दथुइ जूगु खः । राजसंस्थायात अन्त्य यायेत जनता छप्पँ जुइ । विभाजित खनेमदु ।

सः थ्वयेकाच्वंगु दु। नेकपा दुनेया निगू धारया ल्वापु जक खंका च्वंपिंत थौं प्रचण्डं इलय् व्यलय् न्ह्यथनीगु जन आन्दोलनं देय्या राजनीतिं गम्भिर मोड काये फुगु अनुमान, शंका याये मायेका बिउगु दु। छखेर विस्थापित संसद पुनःस्थाापना जुइमाः, प्रचण्डया जोडदार माग दुसा, घोषित तिथिइ न्हूगु जनादेशया निंतिं चुनाव जुइ, जुइ । थुकी सँ छपु नं उखेथुखे जुइमखु। केपी ओलीं उद्घोष यानाच्वंगु दु। वर्तमान देय्या संविधानं प्रमयात संसद विघटन यायेगु अधिकार मदु। प्रधानमन्त्रीया संसद विघटनया पलाः गैरसंवैधानिक खः । थ्व लित कायेमाः । अधिकांश कानूनविद्तय् राय दु। तर प्रधानमन्त्रीं छाय् गैरसंवैधानिक पलाः छित ? छाय् थम्हं छिउगु पलाखय् अडिग जुयाः न्ह्याः वनेगु साहस यात ? थ्व राजनीतिक रहस्यया विषय जुयाच्वंगु दु ।

खतुं संवैधानिक ब्याख्या याइगु संस्था सर्वोच्च न्यायालय खः । सर्वोच्च न्यायालयय् वंगु मुद्दायात पिनें प्रभावित याये मजिउ धाइ । तर थ्व मान्यताया ठीक विपरित थौं सर्वोच्चय् वनाच्वंगु संवैधानिक प्रश्नया विषयय् पिनें सम्बन्धित विभाजित पक्षतय्सं तीव्र रुपं प्रभावित यानाच्वंगु दु। प्रचण्ड पक्षं अदालतं ओलीया पक्षय् निर्णय बिउसा देशय् भयङ्कर आन्दोलन जुइ, ‘ननभेज’ अर्थात रक्तपातपूर्ण आन्दोलन । ख्याच्वः बियाच्वंगु दु। मेखेर ओलीं चुनाव जुइ, जुइ । थुकी धुक्क जुयादिसँ । विपक्षीतय्त उत्तेजित यानाच्वंगु दु ।

अझ प्रम ओलीया गृहमन्त्री रामबहादुर थापा बादलं ‘ननभेज’ आन्दोलन याये धाइपिंत चिडियाखानाय् स्वथना बी धकाः ख्याच्वः बिउगु दु। दुने अदालतय् सम्बन्धित मुद्दायात कयाः बहस । पिने अदालतया सम्भावित लिच्वःयात कयाः थःथःगु पूर्व योजना खुल्लमखुल्ला व्यक्त यानाच्वंगु दु। सर्वोच्चं थ्व अदालतया मानहानी खः धकाः नवाये फुगु राजनीतिक परिस्थित नं देशय् मदु। विडम्बना ! देय् या थांया रुपय् दुगु संवैधानिक अ·तय् संस्थागत व्यक्तित्व विकास स्वतन्त्रकथं जुइ मफुत । सदां राजनीतिक हस्तक्षेपं ग्रस्त जुल । राजनीतिक कठपुतली यानाबिल । उकिं देशय्दे शया, जनताया पक्षय् दनीगु संस्थात शक्तिहीन जुल । थज्याःगु अवस्थाय् सर्वोच्चया मनोबल गन गुथाय् लाइगु खः ? जनतां विश्वास याये फइगु अवस्थाय् मदु ।

सर्वोच्चं न्ह्यागु हे निर्णय बिउसां, देशय् राजनीतिक जटिल अवस्था वयेफु। तनाव सृजना जुइफु। तर गुगुं नं राजनीतिक कर्मया उद्देश्य देय् व जनताया निंतिं जुइमाः । देय्या रुपान्तरणया निंतिं जुइमाः । थःथःगु व्यक्तिगत महत्वकांक्षा पूर्ति यायेत सिधासाधा जनतायात फसे यानाः राजनीतिक द्वन्द्व, ल्वापु सृजना यानाः देय् व जनताया हित जुइमखु। थःथःगु पक्षय् जनताया भेलाया प्रतिस्पर्धा यानाः जनसमर्थनया दावा यानां छु याये ? जनताया हित, कल्याणया निंतिं जनताया भेला, समर्थन जुइमाः ।

थःथःगु निकृष्ट राजनैतिक स्वार्थया निंतिं जनतायात गुगु दुरुपयोग यानाच्वंगु दु व एकदम जनविरोधी ज्या खः । थौंया महत्वकांक्षी नेतातय्सं जनतायात देय्या निंतिं मखु थःथःगु स्वार्थया निंतिं छ्यला वयाच्वंगु दु। थुपिं दबुलिइ दत्तले थथे जुयां तुं च्वनी । थुमित चिइेकमाः ।

सम्बन्धित बुखँ

LEAVE YOUR COMMENTS