पूर्वतयारीया अभावय् जूगु क्षति

छवाः तक वःगु वाफसं देय्न्यंकं स्वीनिम्ह मनूया ज्यान वंगु दुसा आः तक सीपिं स्वयां बछि धइथें मनूत बेपत्ता जुयाच्वंगु दु । थ्व ल्याखं आः स्वयां सीपिनिगु ल्याः अप्वयेफुगु सम्भावना दनि । नेपाः हिमाल, पहाड व तराई यानाः विषम भौगोलिक बनोट दुगु देय् खः । अथे जुयाः नं थन वा वइगु इलय् पहाडय् लः मुना च्वनी मखु ।

लः सलल बाः वनाः तराईया मैदान तक थ्यंकाःलि जक वयागु गति म्हो जुइ । पहाडय् वा वयेवं खुसि घनघोरनक्सां बाः वइ । उकिं थाय् थासय् चलः वनीगु, छेँ चुइकीगु वा बुँ स्यंकीगु खँ धाःसा नियमित आकस्मिकता हे खः । असार श्रावण महिनां दँय्दसं थ्व भयानक स्थिति लिसा कयाच्वंगु दु ।

अथेनं मनूत खुसि जःखः वा तराई लागाया उर्बर स्थानय् च्वनेगु धाःसा त्वःतूगु मदुनि । पहाडय् चलः वयाः वा खुसि बाः वयाः चुइके फइगु जोखिम दुसा तराई लागाय् फुक्कं लः छथाय् हे वनीगु कारणं जलमग्न जुयाः मनूतय् ज्यान वनीगु जोखिम दु । थथे स्वयेगु इलय् झीथाय् विषम भौगोलिक स्थिति जूगु कारणं हे नं दँय्दसं आपालं आपाः नोक्सान जूगु वा धनजनया क्षति जूगु खनेदु ।

थज्याःगु खँय् ध्यान तयाः सरकारं यदि इलय् हे उचित व्यवस्था यायेफत धाःसा व थेंज्याःगु बांलाःगु उपाय मेगु छु जुइ ? गबले खुसि बाः वइ, वयां लिपा हे तिनि झीथाय् सेना, प्रहरी व नेपाल स्काउट लगे यानाः उद्धार व राहतया ज्या सुरु जुइ ।

उद्धार व राहतया अभियान न्ह्याकूगु हे शक्तिं न्हापा हे उचित रुपं खुसिबाः नियन्त्रण यायेगु कथं खुसि त्यलाः छेँ मदंकेगु स्वत धाःसा, बस्ती गज्याःगु थासय् दयेके जिउ वा मजिउ धइगु वाःचायेके फत धाःसा वा स्वच्छ सफा व उचित धरातलय् निर्माण यायेगु नापं नयेगु, च्वनेगु व द्यनेगु सुरक्षित थासय् यायेमाः धइगु प्रशिक्षण बियाः सही थासय् बस्ती दयेकेगु ज्या याये फत धाःसा अज्याःगु दुर्घटना म्हो याये फइ ।

समाज परिवर्तन यायेत न्ह्यचिलाच्वंगु थीथी राजनीतिक पार्टी नं वा वयाः खुसि बाः वयाः दुर्घटना व मृत्युया घटना जुयाःलि हे जक उद्धारया लागिं न्ह्यचिलेगु यानाच्वंगु दु । उकिया नं छुं अर्थ मदु । उकिं नं उद्धार व राहत स्वयां न्हापा हे हेलिकोप्टर उचित थासय् तये माःसां, सेना व प्रहरी थेंज्याःपिं थीथी जनशक्तियात अग्रिम रुपं परिचालन यानाः रोकथाममुलक रुपं ज्या याना क्यनेमाःगु खनेदु ।

झीथाय् नं पहाडी लागाय् न्ह्याबलें चलः वनाच्वनीगु व तराई लागाय् असार श्रावणं खुसि बाः वयाच्वनीगु कारणं अन जःखः च्वनेबहः मजू धइगु सन्देश जक बांलाक प्रवाह जुल धाःसां आपालं सुधार जुइफइ ।

थज्याःगु ज्याय् नेपाल स्काउट, रेडक्रस वा थीथी सामाजिक संघ संस्थायात परिचालन यायेगु खःसा झीथाय् दँय्दसं जुयाच्वंगु मनूतय् ज्यान वनीगु ल्याः म्हो याये फइ । चेतनामुलक ज्या यानाः सूचना व सञ्चारया लागाय् आमूल परिवर्तन हये फत धाःसां नं खुसिया जःखः च्वंपिं मनूत इलय् खुसिबाः वयेवं मेथाय् चिला वने फइ ।

छुं ई न्ह्यः आः लखौं लखया ल्याखय् एसएमएस सेवा मार्फत् खुसिबाः वःगु सुचं बीगु प्रविधि विकास यायेधुंकाः छुं भचा जूसां राहत चूलाःगु महसुस जूगु दु । थज्याःगु ज्याय् मेपिनिगु तुलनाय् झीगु देस अझ हे लिउने लानाच्वंगु खनेदु ।

समुद्र जःखः लानाच्वंगु देसय् इलय् ब्यलय् समुद्री छाल वइगु थासय् थीथी कथं सुचं प्रवाह यानाः अन च्वंपिं मनूतय्त छाल वये न्ह्यः हे मेथाय् सारे यानाः उमिगु ज्यान बचे याइगु झीसं सिउ । झीथाय् नं पहाडी लागाय् न्ह्याबलें चलः वनाच्वनीगु व तराई लागाय् असार श्रावणं खुसि बाः वयाच्वनीगु कारणं अन जःखः च्वनेबहः मजू धइगु सन्देश जक बांलाक प्रवाह जुल धाःसां आपालं सुधार जुइ फइ ।

थज्याःगु इलय् नेपाल सरकारं थः लिक्क लानाच्वंगु थीथी शक्तियात परिचालन यानाः नं जनताया सुरक्षाया लागिं ध्यान तयेमाःगु खनेदु । मखुत धाःसा थुगुसी थ्वःम्ह मनू खुसिबालं चुइकाः ज्यान वन, थगुने थुलि वंगु खः धकाः मूल्यांकन यानाः आकिवंया लागिं ज्यान वनीपिनिगु ल्याः पियाच्वनेगु बाहेक मेगु ज्या छुं जुइ मखु ।

धः, लँ व भवनत उचित रुपं दयेकाः उकिं सुयातं हे नोक्सान मजुइगु लकस ब्वलंके फत धाःसा शायद छुं नं हन्ताः जुइ मखु जुइ । थज्याःगु धारणायात उचित स्थान बियाः चेतना शक्तिया विकास यायेफत धाःसा थ्व इलय् नं थप क्षति जुइगुपाखें बचे जुइत आपालं ग्वाहालि जुइगु खनेदु ।

बजेट सिधयेकेगु ल्याखं वा बजेट लिहां वनी धकाः असारं धः म्हुयाः लँ दयेकेगु नक्कली निर्माणया कारणं नं झीथाय् आपालं आपाः दुर्घटनां धनजनया क्षति जुयाच्वंगु दु । थज्याःगु गलत प्रबृत्तियात सुधार यानाः नगरपालिका, गाविस वा स्थानीय निकायपाखें निर्माण ज्या न्ह्याकेगु इलय् नोक्सान म्हो जुइगु उपाय मालेमाः ।

असारं खुसिबाः वइगु इलय् ताँ दयेकेगु प्रबृत्ति झीथाय् दनि । थुकी ख्वप नगरपालिकां आः हे जक भीमसेन ख्यः वा गय्भिंद्यःथाय् दयेकाच्वंगु ताँ खुसि बालं चुइकाच्वंगु घटना दसु जूगु दु । थज्याःगु नोक्सान जुइगु वा खुसिबाः वइगु इलय् निर्माण याये मजिउगु छुं नं चीज निर्माण यायेगु वा याकेगु ज्या याये मजिउ धइगु नं थ्व इलय् बिचाः यायेमाःगु खनेदु ।

सारा जनतां सराः बीकथं लँय् निर्माण सामग्री द्व“चिना तयेगु अले उकिं हे थीथी कथं मेपिंत मछिंकेगु ज्या नं याये मजिउ । थथे सरकार यदि कडा नक्सां गैर जिम्मेवार पूर्वक असारे निर्माण याइपिंत कडा कारवाही यायेगु ज्याय् न्ह्यचिलाः नोक्सान जुइगु इलय् हे क्यने थें ज्या याकेगु मजुल धाःसा उकिं नं झीत फाइदा हे जुइ ।

नापं असार धइगु वा वइगु ई जूगु ल्याखं थ्व इलय् भ्वाथःगु छेँय् च्वने मजिउ, भ्वाथःगु छेँ जःखः वने मजिउ व दुने फुगु व दुनेत्यंगु छेँ जःखः मवनेगु, खुसि जःखः मवनेगु व चलः वनीगु सम्भावना दुगु थासय् वर्षातया इलय् भ्रमण मयायेगु पाठ जक बांलाक स्यने फत धाःसां थन आपालं नोक्सान जुइगु वा धनजनया क्षतिपाखें बचे याये फइगु खनेदु ।

मखुत धाःसा थौं गथे स्वीनिम्ह सित, झिंन्हय्म्ह बेपत्ता धकाः झी समाचार न्यनाच्वनागु वाय् ब्वनाच्वनागु खः, कन्हय् हाकनं थज्याःगु हे अशुभ समाचार न्यनेगु व ब्वनेगुपाखें झी तापाये फइ मखु । उकिं सरकारं उद्धार व राहत स्वयां पूर्व तयारीइ ध्यान तयेमाःगु खनेदु ।

सम्बन्धित बुखँ

LEAVE YOUR COMMENTS