पत्रकारतय्त बीगु पेन्सनया कार्यविधि संशोधन यायेत माग
येँ (नेपालभाषा टाइम्स)÷ नेवाः पत्रकार राष्ट्रिय दबूया काभे्र जिल्लाया साधारण सभा क्वचाःगु दु । दबूया केन्द्रीय साधारण सभा थ्व हे वइगु फागुन ५ गते यायेगु क्वःजिउ कथं आः थीथी शाखाया साधारण सभा जुयाच्वंगु खः ।
वंगु शनिवाः बनेपाय् जूगु काभ्रे शाखाया साधारण सभाया उलेज्या यासें दबूया केन्द्रीय नायः नृपेन्द्रलाल श्रेष्ठं समावेश सञ्चार, मातृभाषा पत्रकारिता व पत्रकारतय् क्षमता वृद्धि यायेमाःगु खँय् बः बियादिल । व्यावसायिक पत्रकारिताया आवश्यक जूगु खँ न्ह्यथँसें वय्कलं थुकिया निंतिं संस्थागत रुपं न्ह्याः वनेत अपिल नं यानादीगु दु ।
थ्वहे झ्वलय् वय्कलं २०८१ सालया बुद्धजयन्ती निसें न्हापांम्ह मातृभाषी पत्रकार धर्मादित्य धर्माचार्यया सछिदँ बुन्हिया लसताय् दबूपाखें दछियंकं थीथी ज्याझ्वः यानाः हनेगु खँ कनादिल ।
ज्याझ्वलय् न्ववानादिसें वरिष्ठ पत्रकार मोहन दुवालं पत्रकारतय्त बीगु धयातःगु पेन्सनया कार्यविधि संशोधन यायेमाःगु माग यानादिल । वय्कलं धयादिल, ‘जिं जनमत साहित्यिक पत्रिकालिसे नेपाल समाचार पत्र न्हिपति ताःई ज्या याना । पत्रकारिताय् हे जीवनया प्यंगू दशक बिते याना । थुकी जितः गौरव ताः, तर जि पत्रकार खः धयागु प्रमाणित यायेत धाःसा सम्बिन्धित वडा कार्यालयया सिफारिस माःगु जुयाच्वन । थ्व तसकं गलत कार्यविधि खः । ’
पत्रकार राष्ट्रिय दबू काभ्रे जिल्ला शाखाया अध्यक्ष सोमकाजी शाक्यया सभापतित्वय् जूगु साधारण सभा जूगु खः ।
LEAVE YOUR COMMENTS