नेवाः भाय् मृत जुइगु संकेत खने दत- जोशी

थिमि- शताब्दीपुरुष सत्यमोहन जोशीं वर्तमान स्थिति कायम हे जुयाच्वन धाःसा नेपालभाषा आः मृत जुइगु संकेत खने दुगु खँ कनादीगु दु । मध्यपुर थिमिइ ‘दबुलि नेपाल’ नांगु संस्थां लछियंकं याःगु भारतीय नेवाःतय्त नेपालभाषा, नेपाल लिपि व नेपाल संस्कृति स्यनेकने ज्याया प्रतिवेदनात्मक स्मारिका विमोचन व हने ज्याझ्वलय् मूपाहां कथं न्ववासें वय्कलं थ्व खँ कनादीगु खः ।

भाजु जोशीं संस्कृत भाषाय् नं महाकाव्य दु, उपाध्याय महाउपाध्याय दु तर भाषा ल्हाइपिं सुं हे मदुगु कारणं व भाय् मृत भाषा जूगु खः धासें जनगणना कथं नेवाःतय्सं झन् झन् भाषा त्वःता वनाच्वंगुलिं नेपालभाषा नं मृतभाषा जूवनेफु धयादिल ।

ज्याझ्वलय् वय्कलं ख्वपया तिलकप्रकाश कायस्थयात हिरानरसिं लुमन्ति साहित्यिक सम्मान, मध्यपुर थिमिया कृष्णलाल गोजाश्रेष्ठयात आशानरसिं लुमन्ति सम्पदा संरक्षण सम्मान, किपूया बीरप्रसाद भन्सारीयात तेजकृष्ण लुमन्ति संगीत सम्मान, येँया शरद कसाःयात हरिकृष्ण लुमन्ति लिपि अभिलेख सम्मान व यलया चन्द्रमाया बज्राचार्य ‘सुर्ज’यात नानिमैंया लुमन्ति ल्वहंमूर्ति सम्मान लःल्हानादीगु खः । दातातपाखें उमित झिद्वः झिद्वः तका दां सिरपा नं लःल्हानादीगु खः । ज्याझ्वलय् विशेष पाहां मध्यपुर थिमि नपाया मेयर मदनसुन्दर श्रेष्ठं दोसल्लां न्ययेका सम्मान यानादीगु खः ।

ज्याझ्वलय् ख्वपया न्हू प्रतिभा म्वाहालि बादक मय्जु रोशिका जधारी व मध्यपुरया लिपि विशेषज्ञ बिकी बज्राचार्ययात नं प्रतिभा सिरपा लःल्हाःगु खः । विशेष पाहां थिमि नपाया मेयर मदनसुन्दर श्रेष्ठं थिमिया थीथीं झिगू ननि वनेगु गल्लि तब्या यानाः आः झिगू ननिया छगू विशेष सम्पदास्थल निर्माण यायेत्यनागु जानकारी बियादिल । नेवाः गुथि येँया अध्यक्ष पवित्र बज्राचार्यं सरकारं गुथि विधेयक हयाः नेवाः संस्कृति सखाप यायेत्यंगु द्वपं बियादिल ।
इन्जिनियर सन्तोष प्रजापतिया सभापतित्वय् सुरेन्द्रबिक्रम प्रजापतिं लसकुस यानाः न्ह्याकूगु उगु ज्याझ्वलय् संस्थाया संरक्षक गणेशराम लाछिं सम्मान व प्रतिभा सिरपाया बारे थःगु नुगःखँ कनादीगु खः ।

सम्बन्धित बुखँ

LEAVE YOUR COMMENTS