‘आःया आन्दोलन प्रतिगमन विरुद्ध खः’

येँ – नेकपाया अध्यक्ष पुष्पकमल दाहालं पार्टी दुनेया आःया ल्वापू अग्रगमन व प्रतिगमन दथुइया ल्वापू जूगु खँ धयादीगु दु । म्हिगः येँय् ग्वसाः ग्वःगु एकीकृत अखिल नेपाल शिक्षक संगठनया न्हापांगु राष्ट्रिय परिषदया बैठकय् न्ववायेगु झ्वलय् वय्कलं उगु खँ धयादीगु खः । वय्कलं धयादिल, ‘आः ल्वापू पदया नितिं मजूसें अग्रगमन व प्रतिगमनया दथुइ जुयाच्वंगु खः ।’

वय्कलं न्ह्यः धयादी, ‘जिमिगु ल्वापु पदया निंतिं मखु, विचार, सिद्धान्त, प्रणालीया निंतिं खः; तर प्रतिक्रान्ति यायेत क्रान्तिकारी विचारयात ज्याख्यलय् मवकेगु कुतः याइगु, क्रान्तिकारी विचारयात निस्तेज यायेगु,क्रान्तिकारी नेतृत्वयात गुलि फु उलि बदनाम यायेफत धाःसा प्रतिक्रान्तिया आधार तयार जुइ, थ्व खँयात झीसं थुइकेमफुत धाःसा झीसं लडाई त्याके फइमखु, अथे जुयाः थ्व पदया ल्वापू मखु, अग्रगमन व प्रतिगमनया ल्वापू खः ।’

आः थःपिं प्रतिगमन विरुद्ध जनताया पक्षय् वनाच्वनागु धासें दाहालं ओली जनतांपाखे तापाना वनाच्वंगु दावी नं यानादिसें धयादी, ‘जिपिं जनताया पक्षय् वना, जिमिसं संघीय लोकतान्त्रिक गणतन्त्रया पक्षय् वना, संविधानया पक्षय् वना, सतकय् जिमित गर्व दु, तर प्रधानमन्त्री केपी ओली लोकतन्त्र, संघीयता, जनतापाखें तापाक वनाच्वंगु दु, संविधानयात घात यायेगु कथं कुत्सिन मनशायं वनाच्वंगुलिं प्रम ओली बुइधुंकूगु दु ।’

वंगु पुस ५ गतेनिसें प्रतिगमनया विरुद्धया ल्वापु शुरु जूगु व आः प्रतिगमन बुइगु लकस ब्वलनाच्वंगु दावी नं दाहालं यानादीगु दु । वय्कलं धयादी, ‘पुस ५ गते निसें प्रतिगमनया विरुद्धय् लडाई शुरु जुल, जिमिसं सतकय् वयेमाः धकाः सतकय् वयाः, आः न्हूगु लकस ब्वलनाच्वंगु दु, हाकनं नेपाःमि जनतां त्याइगु व प्रतिगमनकारी बुइगु लकस ब्वलनाच्वंगु दु’ दाहालं धयादी ।

उगु हे ज्याझ्वलय् न्ववायेगु झ्वलय् नेकपाया वरिष्ठ नेता माधव नेपालं न्हून्हूगु अवतार वल धाःसा देय् हे मदइगु खँ धयादीगु दु । वरिष्ठ नेता नेपालं धयादी, ‘आःया ल्वापू केपी ओली लिसे मखे, ओली प्रवृत्ति विरुद खः, तर जिमिके नं केपी ओली प्रवृत्ति हे दत धाःसा जिपिं व ओलीया दथुइ छुं बिस्कं खने दइमखु, ओलीया हे लँपुइ वना धाःसा जिपिं नं ओलीया हे अवतारय् थ्यनी ।’

सम्बन्धित बुखँ

LEAVE YOUR COMMENTS