चन्द्र सूर्य पुस्तकालयं स्वर्ण महोत्सव हन
यल (नेपालभाषा टाइम्स)÷ यलया कुतिसौगःया चन्द्रसूर्य पुस्तकालयं थीथी व्यक्तित्वपिंत सम्मान यासें चन्द्र सूर्य स्वर्ण महोत्सव हंगु दु । महोत्सवया झ्वलय् रक्तदान, भजन, साहित्य, निःशुल्क स्वास्थ्य शिविर सम्बन्धी थीथी ज्याझ्वःनापं साइकल ¥याली, ब्याडमिन्टन कासाया ग्वसाः ग्वःगु खः ।
ज्यापु प्रज्ञा भवनय् जूगु समापन समारोहय् ज्याझ्वःया मूपाहां प्रतिनिधि सभा सांसद प्रेमबहादुर महर्जनं चन्द्र सूर्य स्वर्ण स्मारिका विमोचन यानादीगु खःसा चन्द्र सूर्य पुस्तकालयया संस्थापक पदाधिकारी, थीथी ज्याझ्वलय् योगदान यानादीपिं पदाधिकारी, दुजःपिंत हनेज्या यानादीगु खः ।
ज्याझ्वःया निगूगु ब्वय् लोकंह्वाःपिं कलाकारपिंपाखें म्ये व हुलाप्याखं न्ह्यब्वःगु खः । ख्यालि जुजु मदनकृष्ण श्रेष्ठं प्रेम महर्जनं च्वयादीगु, रत्नशोभा महर्जनं हालादीगु व सुमन कपालीं संगीत तयादीगु चन्द्र सूर्य पुस्तकालयया म्ये उलेज्या यानादीगु सांस्कृतिक ज्याझ्वलय् नरेन्द्र प्यासी व सुरजवीर बज्राचार्यया सः, प्रेम महर्जनया च्वसाः व सुमन कपालीया संगीत दुथ्याःगु लागूऔषध दुब्र्यसनविरुद्ध जनचेतना बीगु ‘देय्या लागि’ म्येया नं उलेज्या जूगु खः । सांस्कृतिक ज्याझ्वलय् रत्नशोभा महर्जन, सुरजवीर बज्राचार्य, रीता महर्जन, भूपेन्द्र बज्राचार्य, रविन्द्रवीर शाक्य, जितेन्द्र नकर्मीपिंसं म्ये हालादीगु खःसा सक्षम महर्जन, लूनिभाः महर्जन, कृपा महर्जन, कृतिश महर्जन, आर्यान महर्जन, इभा महर्जन, एन्जेल महर्जन, निर्भीक महर्जन, रचना कारञ्जित महर्जन, काब्या महर्जन, सुमिना महर्जन, मरिमय, सारा, स्वप्निका, स्वनियां हुलाप्याखं न्ह्यब्वयादीगु खः । हुलाप्याखं राजु महर्जन, गृष्मा महर्जनं स्यनादीगु खः ।
चन्द्र सूर्य पुस्तकालयया अध्यक्ष राजेश चित्रकारया सभापतित्वय् जूगु समापन समारोहय् विशेष पाहाँ कथं प्रदेश सभा सांसद रामकृष्ण चित्रकार, पाहाँ कथं यल महानगरपालिका वडा ८ या अध्यक्ष बाबुरत्न महर्जन, वडा १२ या अध्यक्ष नारायणलाल अवाले, संस्थापक अध्यक्ष रत्नमान चित्रकार, सल्लाहकार अध्यक्ष सनप्रकाश चित्रकारपिं झायादीगु खः ।
ज्याझ्वलय् शताब्दीपुरुष सत्यमोहन जोशीयात लुमंकसें वय्कःया किपातय् स्वां देछाःगु खः ।
LEAVE YOUR COMMENTS