भीडभाड पनेत कडा निर्देशन

येँ – कोरोना संक्रमण तीव्र रुपं न्यना वनाच्वंगुलिं गृह मन्त्रालयं सार्वजनिक थासय् नीन्याम्ह स्वयां अप्वः मुनीगु ज्याझ्वः पनेगु निर्णय याःगु दु । सोमवाः मन्त्रीस्तरीय निर्णय यासें सार्वजनिक स्थलय् भीड जुइगु ज्याझ्वः गृह मन्त्रालयं पनाबिउगु खः ।

गृहया निर्णयय् धयातःगु दु, ‘सार्वजनिक थासय् राजनीतिक लगायत अप्वः मनू उपस्थित जुइगु प्रशासनिक, सामाजिक लिसें अज्याःगु प्रकृतिया ज्याझ्वः मयायेत आह्वान याना । अत्यावश्यक नियमित ज्याझ्वःया हकय् स्थानीय प्रशासनया अनुमति कयाः व्यवस्था मिले यायेगु, मेगु सुचं मवःतले सार्वजनिक थासय् नीन्याम्ह स्वयां अप्वः मुनी कथं मेला, भेला व महोत्सव ग्वसाः मयायेगु÷मयाकेगु ।’ उकथं हे जिल्लां थःथःगु जिल्ला व स्थानीय तहया अवस्थाया विश्लेषण यानाः परिस्थितिजन्य लचकता वा कडाई याये फइगु खँ नं धाःगु दु ।

गृह मन्त्रालयं थः मातहतया सुरक्षा निकाय व प्रशासन कार्यालययात उगु निर्णय कार्यान्वयन याकेत निर्देशन नं बिउगु दु । कोभिड–१९ संकट व्यवस्थापन समन्वय केन्द्र (सीसीएमसीसीं) आइतवाः उगु निर्णय कार्यान्वयनय् यंकेत गृह मन्त्रालययात सिफारिस याःगु खः ।

उकथं हे होटल, रेष्टुरेन्ट, सिनेमा हल, रंगशाखा, हवाई यात्रा, पार्क आदि थेंज्याःगु सार्वजनिक थासय् दुहां वनेत कोरोना विरुद्धया खोप कयातःगु कार्ड वा कार्डया फोटो क्यनेमाःगु व्यवस्था यायेत नं निर्देशन बिउगु दु । वइगु माघ ७ गतेनिसें सार्वजनिक सेवा कायेत खोप कार्ड अनिवार्य यायेत नं गृह मन्त्रालयं निर्देशन बिउगु दु ।

उकथं हे शिक्षा मन्त्रालयं थनिंनिसें माघ १५ गते तक विद्यालय बन्द यायेगु निर्णय याःगु दु । सीसीएमसीसीं वार्षिक विदाय् मिले यायेगु कथं माघ १५ गते तक कक्षा बन्द यायेगु निर्णय याःगु खः । थुकिं यानाः आः हानं विद्यार्थीतय्गु अनलाइन कक्षा चले जुइगु अनुमान याना हःगु दु ।

विदाया हे इलय् १२ निसें च्वय्या फुक्कं उमेर समूह व पूर्ण खोप काये ल्यं दनिपिं शिक्षक, कर्मचारी व अभिभावकपिंत खोप उपलब्ध याकेत नं मन्त्रालयं इनाप याःगु दु । विश्वविद्यालय व शैक्षिक प्रतिष्ठानया पूर्वनिर्धारित सेमेस्टर व वार्षिक परीक्षा जनस्वास्थ्य व सुरक्षाया मापदण्ड पालन जुइ कथं सञ्चालन यायेत नं शिक्षा मन्त्रालयं निर्देशन बिउगु दु ।

संक्रमितया ल्याः धमाधम हे अप्वः
कोरोनापाखें संक्रमितया ल्याः नेपालय् थ्यंमथ्यं च्याद्वः थ्यंगु दु । स्वास्थ्य तथा जनसंख्या मन्त्रालयया सोमवाःया तथ्यांक कथं सोमवाः सक्रिय संक्रमितया ल्याः ७८५५ थ्यंगु दु । नीप्यघौ दुने ११ हजार ४२९ म्हेसित याःगु परीक्षणय् १४४६ म्हेसित संक्रमण पुष्टि जूगु दु । ८९६५ पीसीआर परीक्षणय् १३५७ म्हेसित संक्रमण पुष्टि जूगु दुसा २४६४ एन्टिजेन परीक्षणय् ८९ म्ह संक्रमण खनेदुगु खः ।

वंगु नीप्यघौया दुने निम्ह सीगु दुसा २५५ म्ह वासः यानाः डिस्चार्ज जूगु दु । उकथं हे २ लाख १० हजार ५९४ म्हेस्या कोभिड विरुद्धया खोप काःगु खँ मन्त्रालयं धाःगु दु । देय्न्यंकं ११३ म्ह क्वारेन्टाइनय् दु ।

सम्बन्धित बुखँ

LEAVE YOUR COMMENTS