ने. सं. ११४४ कौलाथ्व तृतीया -

छाय् पिहां वल थ्व अडियो टेप ?

अन्ततः सञ्चारमन्त्री गोकुल बास्कोटाया राजीनामा

येँ – सेक्युरिटी प्रेस न्यायेगु लागिं स्वीस एजेन्टलिसे ७० करोड तका कमिसन कायेगु धकाः जूगु खँल्हाबल्हा सार्वजनिक जुइवं सञ्चारमन्त्री गोकुल बास्कोटां राजीनामा बियादीगु दु । स्वीस कम्पनीया नेपाः एजेन्ट विजयप्रकाश मिश्रं कमिसन बारे सञ्चारमन्त्री बास्कोटालिसे जूगु खँल्हाबल्हाया अडियो क्लिप सञ्चार माध्यमय् छ्वया बीवं थ्व खँ सार्वजनिक जूगु खः ।

स्वीस कम्पनीया नेपाः प्रतिनिधिं २७ अर्ब तकां नेपालय् सेक्युरिटी प्रेस न्यायेगु सहमति जुइधुंकूगु खःसा लिपा वनाः सञ्चारमन्त्री बास्कोटां स्वीस कम्पनीयात त्वःताः जर्मन कम्पनीयाके ४० अर्ब तकां सम्झौताया तयारी यायेवं मिश्रं अडियो क्लिप सार्वजनिक याःगु खँ धाःगु दु ।

जर्मन कम्पनीलिसे म्हिगः सम्झौता यायेगु तयारी जुयाच्वंगु खःसा अडियो क्लिप सार्वजनिक जुइवं थ्व सम्झौताया ज्या नं स्थगित जूगु दु । थ्व प्रकरण बारे मन्त्रीया क्लिप पिहां वयेवं संसदया सार्वजनिक लेखा समितिं जर्मन कम्पनीलिसे जुइत्यंगु सम्झौता स्थगित यायेत निर्देशन बिउगु खः ।

जर्मन कम्पनीलिसे जूगु सहमति कथं सञ्चारमन्त्री बास्कोटायात ४ अर्ब ८० करोड तका कमिशन वयेमाःगु खः । तर स्वीस कम्पनीया नेपाः एजेन्ट मिश्रं जर्मन कम्पनीपाखें उगु प्रेस न्यात धाःसा नेपाःयात १२ अर्ब तका घाटा जुइ धासें अडियो क्लिप सार्वजनिक याःगु खँ धाःगु दु ।
म्हीग बहनी ‘हाम्रो कुरा’ नांगु अनलाइनपाखें थ्व अडियो सार्वजनिक जुइवं न्हिछिं थुकिया बारे चर्चा जूगु खः ।

थ्वहे घटनायात कयाः म्हिगः सदनय् विपक्षी कांग्रेसं अवरोध यायेवं सदन समेत आइतवाः तकया लागिं स्थगित यायेमाःगु खः । लुमंकेबहः जू, पूर्व सभामुख कृष्णबहादुर महरा व रोशनी शाही सम्बन्धी काण्ड नं दकलय् न्हापां थ्वहे ‘हाम्रो कुरा’ अनलाइनं हे सार्वजनिक याःगु खः ।

घटना सार्वजनिक जुइवं म्हिगः हे सुथय् नेकपाया निम्ह अध्यक्षपिं प्रधानमन्त्री केपी ओली व पुष्पकमल दहाल दथुइ बालुवाटारय् सहलह जूगु खः । दाहालं सञ्चारमन्त्रीयात राजीनामा याकेमाःगु सुझाव बीवं प्रम ओलीं बास्कोटायात बालुवाटारय् सःताः राजीनामा याकूगु खः ।
सञ्चारमन्त्री बास्कोटां राजीनामा बीधुंकूसां थ्व कमिशनया खेलय् प्रधानमन्त्रीया नं ल्हाः दयेमाः धासें गुलिसिनं प्रधानमन्त्रीं समेत राजीनामा बीमाः नं माग याना हःगु दु ।

म्हिगः सिहंदरवारय् पत्रकारतलिसे खँ ल्हासें नेपाली कांग्रेसया सांसद गगन थापां ‘म्हिगः सार्वजनिक जूगु अडियो ला प्रधानमन्त्रीं लछि न्ह्यः हे न्यनेधुंकूगु खँ सार्वजनिक जूगु दु, यदि अथे खःसा प्रधानमन्त्रीया नं थुकी संलग्नता दयेमाः, उकिं प्रमयात नं शंकाया घेराय् तयाः स्वयेमाः’ धइगु बिचाः तयादीगु खः ।

मेखे समाजवादी पार्टीया नेता डा. बाबुराम भट्टराईं थ्व प्रकरणय् सञ्चारमन्त्री जक मखु प्रधानमन्त्री नं संलग्न जूगु दु धासें थ्व मामिलायात संसदय् हयाः सहलह यायेमाःगु बिचाः तयादीगु दु । वाम राजनीतिक नेता डा. सुन्दरमणि दीक्षितं सञ्चारमन्त्री गोकुल बास्कोटां पदं राजीनामा बियाः जक मगाः, वय्कःयात कारवाही यायेमाः धकाः समेत माग यानादीगु दु ।

थ्वहे झ्वलय् राजीनामा बियादीम्ह सञ्चारमन्त्री बास्कोटां थःगु बारे न्ह्यसः ब्वलंगुलिं यानाः नैतिकताया आधारय् राजीनामा बियागु खँ धयादीगु दु । वय्कलं थम्हं छुं द्वंकूगु मदु धासें अभियोग लायेवं अपराधी मजुइगु खँ नं धयादीगु दु ।

# मुख्यम्ह मनू मेम्ह दनि ः
थ्वहे झ्वलय् थुगु प्रकरणय् दथुइ च्वनाः खँ मिले याःम्ह मेम्ह मुख्यम्ह मनू विकल पौडेल धाःसा कन्हय् अमेरिकापाखे वनेगु तयारी यानाच्वंगु खँ सीदुगु दु । पौडेल सरकारया मुद्रण कोषया अध्यक्ष खः । सेक्युरिटी प्रेस न्यायेगु लागिं मन्त्री बास्कोटा व स्वीस एजेन्ट नापलाके बिउम्ह मुख्य मनू पौडेल खः । कमिशनया तःधंगु भाग थ्वयाथाय् नं थ्यनीगु खँ धाःगु दु ।

जिमिगु ल्हाः मदु ः स्वीस दूतावास

सञ्चारमन्त्रीया थ्व काण्डय् नेपाःस्थित स्वीस दूतावासं म्हिगः छगू प्रेस विज्ञप्ति जारी यासें सञ्चारमन्त्री गोकुल बास्कोटाया अडियो प्रकरणय् थःपिनि गुगुं नं कथंया संलग्नता मदुगु स्पष्ट याःगु दु । दूतावासं सञ्चारमन्त्री बास्कोटायात नापलायेगु खँ मजूगु व भविष्यय् नं नापलायेगु योजना मदुगु खँ धाःगु दु ।

विज्ञप्तिइ स्वीस कम्पनीया स्थानीय एजेन्ट धकाः धयातःम्ह मनू लिसे थःपिनि छुं कथंया स्वापू मदुगु खँ नं स्पष्ट याःगु दु । थ्वहे झ्वलय् सीदु कथं स्वीस कम्पनीया नेपाःया एजेन्ट धकाः दावी याम्ह विजयप्रकाश मिश्रयात प्रहरीं मालाच्वंगु दु ।

थ्व कमिशनया खँय् मन्त्री बास्कोटा दोषी खःसा थुकिया मेगु पक्ष जुयाच्वंम्ह मिश्र नं दोषी हे जुइ धासें वयात प्रहरीं मालाच्वंगु खँ धाःगु दु । मिश्रं सञ्चारमन्त्री बास्कोटालिसे दत्या न्ह्यः जूगु संवादया टेप आः वयाः सार्वजनिक याःगु खः ।