सक्वय् माधवनारायणया धलं दनेगु शुरु

येँ (नेपालभाषा टाइम्स) – सक्वय् थनिंनिसें श्री माधवनारायणया धलं दनेगु ज्या न्ह्याःगु दु। दँय्दसं पोहेलाथ्व पुन्हि (मिलापुन्हि)निसें सिल्लाथ्व पुन्हि (सीपुन्हि)तक थन श्री माधवनारायणया धलं दनेगु लिसें नारीखुसिइ तःधंगु मेला जुइ ।

थ्व झ्वलय् धलं दनीपिं व्रतालुपिंत म्हिगः चि भ्वय् नकेगु लिसें जल कायेकेगु ज्या जूगु खः । लछियंकं धलं दनेगु झ्वलय् धलं दनीपि व्रतालुपिंसं चि त्वःतेमाःगु नियम दु। थथे चि भ्याः याये मजिउगुलिं धलं दने छन्हु न्ह्यः व्रतालुपिंत चि भ्वय् नकेगु चलन दु। म्हिगः माधवनारायणया मूर्तियात थुगुसीया कजिया छेँय् हयाः विशेष पुजा यासें धलं दनीपिं व्रतालु सकसितं चि भ्वय् नकूगु खःसा वयां लिपा नारी खुसि लिक्क च्वंगु द्यः तयेगु फल्चाय् द्यः बिज्याकूगु खः ।

न्हापा लिपा सलंसः धलं दनीपिं दइगु थन थुगुसी कोरोना संक्रमणयात ध्यानय् तयाः न्यय्म्हेसित जक धलं दंके बीगु श्री माधवनारायण स्वस्थानी व्रत तथा शालीनदी उधार समितिं जानकारी बिउगु दु। २० दँनिसें ५० दँ दुपिंत जक धलं दंकेगु नापं धलं दनेत वइपिंसं थःगु नां दुथ्याकेगु झ्वलय् अनिवार्य रुपं पीसीआर परीक्षण यानाः उकिया नेगेटिभ वःगु रिपोर्ट व एक्स-रे रिपोर्ट समितिइ पेश यायेमाःगु व्यवस्था याःगु दु ।

समितिं कोरोना संक्रमणया जोखिमयात ध्यानय् तयाः याःगु व्यवस्थाकथं धलं दनीपिं सकसिगुनं रिपोर्ट नं नेगेटिभ वःगु जानकारी बिउगु दु। धार्मिक संस्कृति, परम्परालिसें जनस्वास्थ्ययात नं ध्यानय् तयाः थुगुसी धलं दनेगुलिइ न्हूकथंया व्यवस्था यानागु समितिया नायः मिजेन्द्रकाजी श्रेष्ठं कनादिल । माधवनारायणया धलं दनीपिंसं कडा नियमया पालना यायेमाः ।

लछियंकं धलं दनेगु झ्वलय् न्हियान्हिथं सुथ न्हापां नारीखुसिइ म्वःल्हुइमाःगु, लाकां न्ह्याये मजिउगु, मेपिंत थी मजिउगु, परदेश यात्राय् वनेबलय् नं लाकां न्ह्याये मजिउगु, मिसापिं सक्वया ध्वाखा प्यंगू ध्वाखा दुने व मिजंपिं माधवनारायण द्यःनापं धलं दनेगु थासय् हे च्वनेमाःगु कडा नियम दु ।

थ्व हे झ्वलय् थनिंनिसें लछियंकं छेँय्छेँय् श्री स्वस्थानीया बाखं कनेगु नं शुरु जूगु दु। इहिपा जुइधुंकूपिं मिसापिंसं भाःतया ताःआयुया कामना व इहिपा मजूनिपिंसं भिंम्ह भाःत लायेमा धइगु ल्याखं स्वस्थानी व्रत नं च्वनेगु चलन दु । स्कन्द पुराणकथं सत्ययुगय् भगवान विष्णुया सल्लाहकथं हिमालय पर्वतया म्ह्याय् पार्वतीं महाद्यः भाःत लायेमा धकाः फिया शिवलिंग दयेकाः व्रत च्वंगु व पार्वतीया मनोकांक्षा पूरा धइगु विश्वास श्री स्वस्थानीया बाखनय्ध यातःगु दु ।

सम्बन्धित बुखँ

LEAVE YOUR COMMENTS