थुगुसी दागिं यंकि दह तक वनीगु

येँ – थुगुसी यँयाःबलय् पिहां वइम्ह दागिं येँय् चाःहिले सिधयेकाः तप्यंक थानकोटस्थित यंकि दह (इन्द्र दह) नं वनीगु जूगु दु। दागिं येँया थःने क्वःने चाःहिलाः अनं तुंथानकोटया यंकि दह वनीगु चलन न्हापा दुगु खः । तर थनिं २५-३० न्ह्यवंनिसें दागिं यंकि दह वनेगु चलन धाःसा दिनाच्वंगु दु । क्वःनेपाखे कुमारी सालीबलय् याः न्यायेवं मरु त्वालं दागिं पिहां वइ । इन्द्रया मां धयातःम्ह थ्व दागिंया लिउ लिउ उगु दँय् सीपिं मनूतय् थःथिपिं नं वनीगु खः ।

दागिंयात यंकिदह यंकेगु लागिं किपू व चन्द्रागिरि नगरपालिकां पहल याःगु खःसा उकी येँ महानगरपालिकां नं ग्वाहालि याःगु खः । दागिंयात येँय् चाःहिले धुनेवं बसय् तयाः यंकिदह यंकेत्यंगु खः । उकी वनेत इच्छुकपिं सकसियां लागिं गाडीया व्यवस्था जुइगु खँ धाःगु दु। यंकि दह यंकाः अन माःगु पुजा आजा यायेधुंकाः हानं गाडीइ तुं तयाः येँय् त्वःते हयेगु व्यवस्था जूगु खँ इन्द्रजात्रा व्यवस्थापन समितिपाखें सीदुगु दु ।

२५-३० दँ न्ह्यवंनिसें दिनाच्वंगु थ्व चलन हानं शुरु जुइत्यंगुलिं थुगुसीया यँयाः पर्वया लागिं लसताया विषय जुइगु खँ धाःगु दु ।