येँय् नं स्कुल चायेके दइगु जुल

येँ -येँ महानगरपालिकां महानगर क्षेत्र दुनेया ब्वनेकुथि संचालनया निंतिं लँपु चायेका बिउगु दु । येँ मनपा शिक्षा समितिया नकतिनि च्वंगु मुँज्यां ब्वनेकुथि चले यायेगु लँपु चायेका बिउगु खः ।

येँ महानगरपालिकाया प्रमुखलिसें समितिया अध्यक्ष विद्यासुन्दर शाक्यया अध्यक्षताय् च्वंगु समितिया मुँज्यां कोरोना भाइरस (कोभिड–१९)या महामारीया कारणं थगुने चैतनिसें बन्द जुयाच्वंगु ब्वनेकुथि संचालन यायेगु सम्बन्धय् स्वास्थ्य व शिक्षा मन्त्रालयपाखें जारी स्वास्थ्य सुरक्षा मापदण्ड पालना यानाः ब्वनेकुथि संचालन कार्य ढाँचा तयार यानाः कक्षा संचालनया व्यवस्था मिले यायेत दक्वं ब्वनेकुथियात जानकारी बीगु निर्णय याःगु खः ।

महानगर प्रमुखलिसें समितिया अध्यक्ष शाक्यं विद्यालय व्यवस्थापन समिति व अभिभावक संघया रेखदेख व अनुगमनय् विद्यालय संचालन याये फइगु निर्णय जूगु जानकारी बियादिसें शिक्षा, विज्ञान व प्रविधि मन्त्रालयं जारी याःगु वैकल्पिक प्रणालीपाखें विद्यार्थी सिकाइ सहजीकरण निर्देशिका–२०७७’ व स्वास्थ्य तथा जनसंख्या मन्त्रालयं जारी याःगु ‘स्वास्थ्य सुरक्षा मापदण्ड’यात पालना यायेमाःगु आवश्यक जूगु नं धयादीगु दु ।

महामारीया इलय् दक्वं ख्यःयालिसें आर्थिक गतिविधि नं ठप्प जूगुलिं ब्वनेकुथिं काइगु शैक्षिक लगायत मेमेगु शुल्कया बारे अध्ययन यायेत छगू समिति नं गठन याःगु दु । महानगरपालिकाया प्रवक्तालिसें येँ मनपा १५ वडाअध्यक्ष ईश्वरमान डंगोलया संयोजकत्वय् वडा नं. ५ या वडाअध्यक्ष रमेश डंगोल, कार्यपालिका सदस्य रश्मि खड्का, प्याब्सन येँया प्रतिनिधि, गुथि, धार्मिक व सहकारी विद्यालय, अभिभावक, सामुदायिक विद्यालयया प्रतिनिधि दुथ्याःगु समिति गठन याःगु दुसा समितियात स्वन्हुया दुने प्रतिवेदन बीत ई बियातःगु दु ।

थ्व हे झ्वलय् येँ महागरं तयार याःगु स्थानीय पाठ््यक्रम अन्तर्गत नेपालभाषाया सफू छापे यायेगु निंतिं नेपाल प्रज्ञा प्रतिष्ठानलिसे सहकार्य यायेगु नं बैठकं निर्णय याःगु दु ।

सम्बन्धित बुखँ

LEAVE YOUR COMMENTS