न्हूगु भेरियन्ट मलूगु दावी
येँ (नेपालभाषा टाइम्स)÷स्वास्थ्य तथा जनसंख्या मन्त्रालयं कोरोना भाइरसया ओमिक्रोन भेरियन्टया सब भेरियन्ट बीएफ–७ नेपालय् मलूगु खँ धाःगु दु । म्हिगः छगू विज्ञप्ति पिकासें मन्त्रालयं उगु सब भेरियन्ट मलूसां नं सतर्कता नालेत इनाप याःगु दु ।
वंगु लछिया दुने थीथी थासं संकलन याःगु नमुनाया जिन सिक्वेन्सिङ लिपा म्हिगः जक राष्ट्रिय जनस्वास्थ्य प्रयोग शालां वःगु ४८ गू नमुनाय् ओमिक्रोन भेरियन्टया मेगु सब भेरियन्ट पुष्टि जूगु दु । तर जःलाखःला देय् चीनय् न्यनावंगु व विश्वया मेगु देशय् नं खनेदुगु बीएफ–७ धाःसा मलूगु खँ मन्त्रालयया सहप्रवक्ता डा. समीरकुमार अधिकारीं जारी याःगु विज्ञप्तिइ धयातःगु दु ।
डा. अधिकारीं जःलाखःला देशय् संक्रमणया लिपांगु अवस्थापाखे सुसूचित जुयाः सजग जुइमाःगु खँ धया–दीगु दु । विज्ञप्तिइ धयातःगु दु, ‘विश्व–व्यापी रुपय् स्वयेबलय् छुं देशय् संक्रमणया न्हूगु जोखिम अप्वया वनाच्वंगु दु । झीगु हे जःलाखःला देशय् संक्रमणया लिपांगु अवस्थां झी सुसूचित जुइगु आवश्यकता दु । न्हूगु भेरियन्ट न्यनावंगु अवस्थाय् मन्त्रायलं निगरानी अप्वयेकेगु लिसें सम्बन्धित देय्लिसे समन्वय यायेगु ज्या यानाच्वंगु दु ।’
LEAVE YOUR COMMENTS