दाहालं थनिं निसें कांग्रेस व एमाले लिसें खँ ल्हाइगु

येँ (नेपालभाषा टाइम्स) – नेपाली कम्युनिष्ट पार्टीया संयोजक पुष्पकमल दाहालं थनिंनिसें नेपाली कांग्रेस व एमालेया नेतात लिसे प्रदेश सरकार नीस्वनेगु खँय् सहलह ब्याकीगु खँ धाःगु दु । श्रीलंकाया भ्रमणय् झायादीम्ह दाहाल म्हिगः नेपाः लिहां झाःगु खः ।

नेपाली कांग्रेस व एमाले दथुया विवादया कारणं न्हय्गुलिं प्रदेशया सरकार क्वःदलीगु अवस्था वयेवं कांग्रेस व एमालें न्हूगु सरकार दयेकेत नेकपायात थःगु पक्षय् हयेगु कुतः यानाच्वंगु दु । तर नेकपां फयांफछि सरकारय् मवनेगु रणनीति दयेकाच्वंगु खँ धाःगु दु । नेकपा प्रदेशय् सरकार हे नीस्वने मफइगु अवस्थाय् जक मिले जुयाः सरकारय् ब्वति कायेगु रणनीति दयेकूगु खँ धाःगु दु । नेकपाया प्रवक्ता प्रकाश ज्वालां संयोजक दाहालं दकलय् न्हापां थःगु पार्टी दुने सहलह यानाः जक मेगु पार्टीया नेतात लिसे सहलह याइगु जानकारी बियादीगु दु ।

नेकपां फयाफछि स्वंगुलिं तःधंगु दल जानाः सरकार दयेकेगु प्रस्ताव यानाच्वंगु दुसा नेपाली कांग्रेसया सभापति गगन थापां धाःसा प्रदेश सरकारय् प्रतिपक्ष विहीन दयेके मजिउ धासें स्वंगुलिं दल सरकारय् वनेगु उचित मजूगु खँ धायेगु यानाच्वंगु दु ।