खुयाः अमेरिका थ्यंपिं निम्ह द्यः लिहां वइगु जुल

येँ – नेपालं खुया यंकातःगु निगू प्राचीन मूर्ति अमेरिकां लित बीगु जूगु दु । ११ व १३ औं शताब्दीया थ्व निगू मूर्ति वइगु चैतया स्वंगूगु वाःपाखे नेपाः लिथ्यंकः वइगु खँ पुरातत्व विभागं धाःगु दु । अमेरिकाया न्यूयोर्कय् च्वंगु मेट्रोलिटन कला संग्रहालयं लित छ्वया हयेत्यंगु मूर्तित उमामहेश्वर व बुद्धया मूर्ति खः । थ्व मूर्ति सन् १९८० या दशकय् नेपालं खुया यंकातःगु खः ।आः लित छ्वया हयेत्यंगु छगू मूर्ति यलया टंगालय् च्वंगु उमामहेश्वरया मूर्ति खः । थ्व मूर्ति १२ निसें १३ औं शताब्दीपाखे दयेकूगु अनुमान यानातःगु दु । अथेहे मेगु छगू मूर्ति येँया यटखा त्वालय् च्वंगु बुद्धया पूर्ण कदया मूर्ति खः । थ्व ११ औ शताब्दीइ दयेकूगु खँ पुरातत्व विभागं धाःगु दु ।

पुरातत्व विभागया कथं नेपालं खुया यंकातःगु पुलांपुलांगु मूर्ति लित हयेगु क्रम जारी जुयाच्वंगु दु । आः लित छ्वया हयेत्यंगु मूर्ति नं नेपाःया हे खः धइगु पुष्टि जुइवं अमेरिकास्थित नेपाली दूतावास मार्फत लित छ्वया हयेत्यंगु खः ।मूर्ति लित छ्वया हये न्ह्यः न्यूयोर्कया संग्रहालयं थुकिया आधिकारिकता बारे पौ छ्वयाहःगु खः । पुरातत्व विभागं नेपाःया हे मूर्ति जूगु दावी यानाः प्रमाण छ्वयेधुंकाः नेपाली दूतावास मार्फत लित छ्वया हयेत्यंगु खः ।आः मूर्ति लिथ्यनेवं उकियात छाउनीइ च्वंगु राष्ट्रिय संग्रहालयय् प्रदर्शनीया निंतिं तइगु खँ धाःगु दु ।