स्वनिगःया १८ गू नगरपालिका स् सुनां गुलि फोहर उत्पादन याइ ?
येँ (नेपालभाषा टाइम्स) – स्वनिगःपाखें न्हिं १,०४५ मेट्रिक टन फोहर उत्पादन जुइ । येँ महानगरपालिका वातावरण व्यवस्थापन विभागं औखरपौवाय् च्वंगु स्यानिटरी ल्याण्डफिल्ड साइटय् व्यवस्थापन याना वयाच्वंगु फोहरया परिणामया लिधंसाय् पिकाःगु तथ्यांक खः थ्व ।
उत्पादित फोहरमध्ये दकलय् अप्वः येँ महानगरपालिका क्षेत्रपाखें न्हिं ५१६ मेट्रिक टन व वयां लिपा यल महानगर क्षेत्रपाखें १३० मेट्रिक टन फोहर संकलन यानाः ल्याण्डफिल्ड साइट थ्यंकेगु यानाच्वंगु दु। स्वनिगःया झिंच्यागू नगरपालिकामध्ये ख्वप नगर क्षेत्रया बाहेक मेगु दक्वं नगर क्षेत्रय् उत्पादन जूगु फोहर व्यवस्थापनया निंतिं सिसडोल ल्याण्डफिल्ड साइटय् यंकेगु यानाच्वंगु दु ।
स्वनिगःया नगर क्षेत्रमध्ये गोकर्णेश्वर नगर स्वंगूगू अप्वः फोहर उत्पादन जुइगु नगर खः । थुगु नगरपाखें न्हिं ६० मेट्रिक टन फोहर उत्पादन जुइ । वयां लिपा नागार्जुन, तोखा, तारकेश्वर र भुइजःसि (बुढानिलकण्ठ) यानाः प्यंगू नगर क्षेत्रपाखें हरेकपाखे ३५-३५ मेट्रिक टन फोहर उत्पादन जुइगु यानाच्वंगु महानगरया तथ्यांकं क्यंगु दु ।
थुपिं नगरत फोहर उत्पादनया कोणं प्यंगूगु तःधंगु नगर खः । वयां लिपा येँया चन्द्रागिरि, यलया महालक्ष्मी व ख्वपया मध्यपुर थिमि नगर हरेक क्षेत्रपाखें ३०-३० मेट्रिक टन फोहर उत्पादन जुइगु यानाच्वंगु दु। थुपिं नगर फोहर उत्पादनया ल्याखं न्यागूगू थासय् लाः वः ।
यलया गोदावरी व ख्वपया सूर्यविनायक नगर क्षेत्रपाखें छसिकथं २५-२५ मेट्रिक टन, येँया कागेश्वरी-मनोहरा नगर क्षेत्रपाखें २० मेट्रिक टन, येँया हे दक्षिणकाली व ख्वपया चाँगुनारायण नगर क्षेत्रपाखें १५-१५ मेट्रिक टन फोहर संकलन जुइगु यानाच्वंगु दु । शंखरापुर नगर क्षेत्रपाखें ८ मेट्रिक टन व दकलय् म्हो किपू नगरपालिकापाखें न्हिं ६ मेट्रिक टन जक फोहर उत्पादन जुइगु यानाच्वंगु दु ।
येँ मनपा वातावरण व्यवस्थापन विभाग प्रमुख हरिकुमार श्रेष्ठयाकथं स्वनिगःया नगरबाहेकं नुवाकोट जिल्ला ककनी गाउँपालिका व धादिङ जिल्लाया धुनिवेँशी नगर क्षेत्रया फोहर नं ल्याण्डफिल्ट साइटय् हे यंकेगु यानाच्वंगु दु। ल्याण्डफिल्ड साइटय् व्यवस्थापन यायेत हइगु फोहर दक्वं थासं उलि हे व छगू हे प्रकृतिया धाःसा जुइमखु। बस्ती क्षेत्रय् जैविक फोहर अप्वः व व्यावसायिक थासय् अजैविक फोहर अप्वः उत्पादन जुइ ।
महानगरं पिकाःगु तथ्यांककथं औसतय् छम्ह महानगरवासीं छन्हुया दुने ४६५ ग्राम फोहर उत्पादन याइ । कुल फोहरयात औसतय् वर्गीकरण यायेबलय् करिब ६३ प्रतिशत जैविक फोहरया मात्रा खने दइ । अथे हे ११ प्रतिशत प्लाष्टिकजन्य, ९ प्रतिशत भ्वं अर्थात कागजजन्य, ५ प्रतिशत खाः अर्थात सिसाजन्य, ० दशमलव ५ प्रतिशत धातुजन्य फोहर खनेदु। थुपिं दक्वं फोहरयात हाकनं प्रयोग यानाः उपयोगय् हये फइ ।
LEAVE YOUR COMMENTS