पत्रकारयात दण्ड मबीत सहमति

येँ- नेपाल मिडिया काउन्सिल विधेयकय् प्रस्ताव यानातःगु दण्ड जरिवाना सम्बन्धी प्रावधान चीकेगु विषयय् सहमति जूगु दु । विधेयकयात कयाः राष्ट्रियसभा, विधायन व्यवस्थापन समितिइ जुयाच्वंगु दफावार सहलहया झ्वलय् समितिइ प्रतिनिधित्व याइपिं सांसदतय् दथुइ थ्व सहमति जूगु खः ।

मिडिया काउन्सिल विधेयकया सम्बन्धय् जिज्ञासा तसें समितिया सभापति परशुराम मेघी गुरुङं मिडिया काउन्सिल नियमनकारी निकाय जूगुलिं दण्ड जरिवाना यायेगु मखुसें आचारसंहिता उल्लंघन जू मजू स्वइगु निकाय जक खः उकिं दण्ड जरिवानाया प्रावधान चीकेगु निर्णय जूगु खँ कनादीगु दु ।

विधेयकय् प्रस्ताव यानातःगु दण्ड सजाय सम्बन्धी व्यवस्था खारेज यानाः मिडिया काउन्सिलं सञ्चार माध्यमयात आचार संहिता पालना यायेगु भूमिका बीमाः धइगु खँय् आपालं सांसद खनेदुगु खः । थ्व स्वयां न्ह्यः हःगु मिडिया विधेयकय् गलत समाचार च्वःगु द्वपनय् झिंन्यागू लाख तका तक जरिवाना व न्यादँ तक कुनेगु अधिकार मिडिया काउन्सिलयात बियातःगु खः । थ्व

विधेयकयात कयाः सत्तापक्षया पत्रकारलिसें आपालं पत्रकारतय्सं विरोध याना वयाच्वंगु खः । विधेयकया थ्व प्रावधान विरुद्ध पत्रकारत अदालत वने फइगु जूगुलिं थुकियात आः हे चीका छ्वयेगु खँय् सांसदत सहमत जूगु खः ।