शुक्रवाः निसें हस्तकला मेला

येँ – वइगु सकिमिला पुन्हि (मंसिर ३ गते ) निसें स्वन्हु यंकं हस्तकला ब्वज्या जुइगु जूगु दु । नेपाल हस्तकला महासंघं सोमवाः छगू पत्रकार सम्मेलन यासें महासंघया ग्वसालय् जुइत्यंगु झिंच्यागू हस्तकला मेला व झिंखुक्वःगु कला प्रतियोगिताया निंतिं माःगु तयारी फुक्क पुरा जूगु जानकारी बिउगु दु ।

महासंघया ग्वसालय् शुक्रवाः निसें आइतवाः तक येँया बौद्धय् च्वंगु होटल हयाटय् हस्तकला ब्वज्या जुइत्यंगु खः । पत्रकार सम्मेलनय् बिउगु जानकारी कथं ब्वज्याय् सछि व नीगुलिं मल्याक व्यापारिक स्टल दइ ।

प्रधानमन्त्री शेरबहादुर देउवा उलेज्या यानाः सुरु जूगु ब्वज्याया झ्वलय् हस्तकला सम्बन्धी अनलाइन पोर्टल इकलाडटकम, ह्यान्डिक्राफ्ट ट्रेड डाइरेक्ट्रिया लिसें हस्तकला सम्बन्धी प्राचीन सफूया नेपाली अनुवाद ‘साधना माला’ विमोचन नं प्रधानमन्त्रीं याइ । ब्वज्याय् राष्ट्रिय अभिलेखालयया ग्वाहालिं कला सम्बन्धी महत्वपूर्ण अभिलेखत नं प्रदर्शन याइगु जानकारी बिउगु खः ।

पत्रकार सम्मेलनय् न्ववानादिसें ब्वज्याया संयोजक रवीन्द्र शाक्यं थुगुसी जुइगु ब्वज्याय् छगू लाखं मल्याक स्वकुमित वइगु व स्वंगू निसें न्यागू करोड तका तकया कारोवार जुइगु अनुमान दुगु खँ धयादीगु खः ।

अथेहे कला प्रतियोगिताया संयोजक राजमान वज्राचार्यं थुगुसी परम्परागत विधा अन्तर्गत जडाऊ कला व समसायिमक विधाय् प्राकृतिक रेशा सम्बन्धी कलाया धेंधेंबल्लाः जुइगु जानकारी बियादिल । थ्व धेंधेंबल्लाखय् न्हाप, ल्यू व लियांल्यू लाःपिंत हरेक विधाय् छसिकथं ५० द्वः, ३० द्वः व २०द्वः तका सिरपाः बी ।

पत्रकार सम्मेलनय् न्ववानादिसें राष्ट्रिय अभिलेखालयया निमित्त महानिर्देशक शौभाग्य प्रधानाङ्गं थौंकन्हय् कलाकारतय्सं परपम्परागत कलाय् तकं शास्त्रीय विधिविधान ल्वःमंकाः कला सृजना याना वयाच्वंगु खँ न्ह्यथँसें प्रतिमा विज्ञान, शास्त्रीय विधिविधानया जानकारी बीगु ताः तयाः थुगुसी न्हापांखुसी प्राचीन अभिलेखत ब्वज्या यायेत्यनागु जानकारी बियादील ।

हस्तकला ब्वज्याया झ्वलय् उत्कृष्ट स्टल, उत्कृष्ट उद्यमी, उत्कृष्ट कलाकार, शीर्ष निर्यातकर्ताया लिसें ७० दँ स्वयां च्वय्यापिं झिम्ह कलाकारपिंत नं सम्मान याइगु ज्याझ्वः दु ।