कम्युनिष्ट कि नवसामन्तीवाद
नेकपाया वर्तमान नेतृत्वं नालाच्वंगु थीथी कथंया बानी व्यहोराया कारणं नेतृत्वपंक्ति विवादय् लायेगु यानाच्वंगु दु। वंगु छुं दिं न्ह्यः जक छपाः किपाः सार्वजनिक जुल । गुकी कृषिमन्त्री घनश्याम भुसालयात छम्हेसिनं कुसां कुइकाच्वंगु दु। थ्व स्वयां न्ह्यः नं थीथी नेतातय् अज्याःगु किपाः सार्वजनिक मजूगु मखु। अज्याःगु किपायात कयाः सर्वसाधारण जनतां न्ह्यसः मथंगु नं मखु। तर कम्युनिष्ट पार्टीया नेतातय् चेतना धुमिल जुया वनाच्वंगु अनुभव नं नेपाःमि जनतां यानाहःगु दु। कम्युनिष्ट पार्टी धइगु सर्वहारा जनताया निंतिं खः धकाः धायेगु यानाच्वंगु दु। तर उमिगु जीवनशैली स्वल धाःसा न्हापा थःपिंसं हे सामन्त धकाः नां बियातःपिं राजपरिवार स्वयां नं झन जक विलासी खनेदु ।
धाथें थ्व इलय् मार्क्सवाद, लेलिनवाद व माओवादया वकालत याइपिं कम्युनिष्ट नेतातय् जीवनशैली स्वयेगु खःसा स्वय्म कम्युनिष्ट आन्दोलनया योद्धात थौं वयाः थःपिंसं गज्याःगु कम्युनिष्ट पार्टीया परिकल्पना यानागु खः धकाः अलमल जुइ । थ्व स्वयां न्ह्यः झलनाथ खनाल, पुष्पकमल दाहाल, डा. बाबुराम भट्टराईलिसें आपालं कम्युनिष्ट आन्दोलनया नेतात साधारण खुसि छगू जक छीगु झ्वलय् नं कार्यकर्तां लुकुंछिनाः व कुबिया यंकाच्वंगु किपा सामाजिक संजालय् खनेदु। तर थ्वहे कम्युनिष्ट पार्टीया नेतातय्सं सामन्ती धकाः धाःपिं राजपरिवारयात स्वयेगु खःसा वास्तविक सामान्ती थ्वहे कम्युनिष्ट नेतात जकं मखुला धइगु न्ह्यसः ब्वलनी ।
मदुम्ह जुजु वीरेन्द्र व लानि ऐश्वर्य छगू ज्याझ्वलय् वंगु इलय् थःपिंसं हे कुसां कुयाः वंगु दृष्ययात स्वयेगु खःसा वास्तवय् थौंया नेतातय्गु ख्वाःपाः गथे च्वं धकाः उलाबी । अथे हे छगू ज्याझ्वलय् गणेशमान सिंहयात ह्याउँगु कार्पेटय् तयाः थम्हं ल्हाः ज्वना न्यासि वनाच्वंगु जुजु वीरेन्द्रया किपा नं थौंकन्हय् सामाजिक संजालय् चर्चा जुयाच्वंगु दु। तर आःया कम्युनिष्ट पार्टीया नेतातय्गु चालचलन स्वयेगु खः सा सामन्ती प्रथायात हाथ्या बियाच्वंगु खःला धइथें च्वं !
छगू इलय् राष्ट्रपति विद्यादेवी भण्डारीया म्ह्याय्पिनिगु लाकां राष्ट्रपति कार्यालयय् ज्या यानाच्वंपिं सेनायात ज्वंकूगु खं यानाः राष्ट्रपति भण्डारीया व्यापक आलोचना जूगु खः । तर नं राष्ट्रपतिं आतक नं थःत सुधार यायेगु कुतः मयाःगु द्वपं जनतां बीगु यानाच्वंगु दु । अथे ला पंचायतकालय् भूमिगत जुयाच्वंगु इलय् आम सर्वसाधारण दथुइ तसकं सामान्य जीवन हनाच्वंपिं नेतात थौं वयाः थुकथं विलासी जीवन हनेत आतुर जुयाच्वंगु कारण छु खः धकाः मालेमाःगु अवस्था वःगु दु। प्रजातन्त्र स्थापना न्ह्यः तक भूमिगत जीवन हनाच्वंपिं कम्युनिष्ट पार्टीया नेता व माओवादी जनयुद्धया झ्वलय् सामान्य जीवन हनाच्वंपिं नेतातय्सं थौ हनाच्वंगु जीवन गुलि पाः । न्हापा दरवार सामन्ती जुल धकाः उकिया विरुद्ध आन्दोलन यानाः देशं राजतन्त्र मदयेका छ्वःपिं नेतात न्हापा जुजुं हनाच्वंगु जीवनयापन स्वयां आपालं पाना वःगु कारण धइगु आर्थिक अनियमितता हे खः धइगु यच्चुक सी दयावःगु दु ।
पंचायतकालय् भूमिगत जुयाच्वंगु इलय् आम सर्वसाधारण दथुइ तसकं सामान्य जीवन हनाच्वंपिं नेतात थौं वयाः थुकथं विलासी जीवन हनेत आतुर जुयाच्वंगु कारण छु खः धकाः मालेमाःगु अवस्था वःगु दु ।
कम्युनिष्ट पार्टीया नेतातय्सं आः नाला वयाच्वंगु जीवनशैलीयात स्वयेगु खःसा धाथें न्हापा भूमिगतकालया नेता व आःया नेतातय् दथुइ
आपालं हिउपाः वयेधुंकूगु खँ स्पष्ट जुयाच्वंगु दु। अथे जुयाः जुइ थौंकन्हय् आम जनतां वर्तमान नेकपायात भाई कांग्रेस धायेगु यानाच्वंगु दु। अथे ला २०४६ सालया जनआन्दोलन लिपा अन्तरिम सरकारया प्रधानमन्त्री जूम्ह कृष्णप्रसाद भट्टराईया सामान्य जीवनशैलीयात नं आपालं जनतां लुमंकेगु याः । भट्टराई प्रधानमन्त्री जुइधुंकाः वा थःगु प्रधानमन्त्रीया कार्यकाल क्वचायेकाः लिहां वःगु इलय् नं भट्टराई सामान्य ट्यांका छगः व कुसा छपाः जक ज्वनाः प्रधानमन्त्री निवासं ट्याक्सीइ च्वनाः वंगु खः । भट्टराईया थ्व सादगी जीवनं आःया कम्युनिष्ट पार्टीया नेतातय्त म्वाय् चुइका बिउगु दु ।
विश्वया आपालं देय्या राजनीतिक नेता वा राष्ट्र प्रमुखपिं देय्या सर्वसाधारण जनतानाप भ्यलय् पुनेगु यानाच्वंगु बुखँ झीसं इलय् ब्यलय् ब्वनाच्वना । अज्याःपिं राष्ट्र प्रमुखपिनिगु कारणं हे जनतां इमिगु मूल्यांकन याइगु खः । तर झीथाय् या राजनीतिक नेतात स्वयेगु खःसा उकथं जनतानाप भ्यलय् पुनिगु चलन बुलुहुं त्वःता वनेगु क्रम अप्वया वनाच्वंगु दु। अझ धायेगु खःसा विशेष यानाः कम्युनिष्ट पार्टीया नेतात छगू चाकः दुने लानाः सर्वसाधारण जनतानाप तापायेगु क्रम शुरु जुइधुंकूगु दु। थुकिया दसु खः सिंहदरवारनिसें शितल निवासतक । अले झी कम्युनिष्ट नेतातय्सं गुगु थःगु धरातल ल्वःमंका वनाच्वन थुकिं स्पष्ट याः । आः थुपिं कम्युनिष्ट नेता मखुत । सामान्तवादया विरोध यानाः सत्ताय् थ्यंपिं नवसामान्तवादी खः ।
अले थुमिसं आः देय् व जनताया भिं याइ धकाः तायेकेगु मेगु छगू भ्रम जुइफु। आःया कम्युनिष्ट नेतातय्सं व्यापारी, ठेकदार व भूमाफियायात जक म्हसी ! सर्वसाधारण जनतायात मखु। मार्सि जापकि जा नये पल्के थूपिं कम्युनिष्टतय्सं देय् व जनताया विकास याइ धकाः थुइकेगु मेगु छगू भ्रम जुइफु। थुकिया दसु खः केपी ओली प्रधानमन्त्री जूगु निदँत्याया ई दुने गुलि भ्रष्टचार जुल ।
LEAVE YOUR COMMENTS