निक्वःगु वार्ताय् ट्रम्प व किमया हाथ्या

बारबरा प्लेट उसर/बीबीसी

अमेरिकाया राष्ट्रपति डोनाल्ड ट्रम्पं थम्हं उत्तर कोरियाया नेता किम जोंग उनयात वइगु २७–२८ फेबु्रअरीइ नापलायेगु घोषणा यानादीधुंकूगु दु । भियतनामय् निम्ह नेतात नापलायेगु झ्वलय् परमाणु मुद्दायात कयाः खँल्हाबल्हा जुइ । थ्वयां न्ह्यव निम्ह नेतातय् दथुइ वंगु जून २०१८ य् सिंगापुर नं खँल्हाबल्हा जुइधुंकूगु दु ।

निक्वःखुसी नापलायेत्यंपिं निम्ह नेतातय् न्ह्यःने तःगू कथंया हाथ्या दु । थुपिं मध्ये छुं प्रमुख हाथ्या ः

ठोस पलाःया आवश्यक
डोनल्ड ट्रम्प व किम जोंग उन दथुइ २०१८ य् जूगु न्हापांगु शिखर सम्मेलनयात कयाः तःधंगु कौतुहल व चर्चा जूगु खः । निम्हं नेतातय्सं थ्व आडम्बपूर्ण भेटवार्ताया लबः कायेगु पूवंक हे कुतः यात । थ्व ऐतिहासिक भेटवार्तां निगू देय् दथुइ स्वत्तुस्वयाच्वंगु स्वापूया गथः फ्यनेगु कुतः ला जुल, तर थ्व बैठक गुलि आशा यानातःगु खः, वकथं न्ह्याः मवन ।

उत्तर कोरियायात परमाणु हतियारमुक्त यायेगु अमेरिकलिक्ष्य कथं छुं ठोस लिच्वः पिहां वःगु खनेमदु । अथेहे उत्तर कोरिया थ्व खँय् निराश दु कि अमेरिका थःपिंत तयातःगु प्रतिबन्धय् छुं कथं छुट बीत तयार हे मदु ।उकिं आः निगुलिं पक्षयात थ्व खँय् दबाब दु कि छुं ठोस खँ जुइ हे माः ।

तर समस्या छु दु धाःसा निम्हं नेतातय्सं परमाणु मुद्दायात व्यक्तिगत दयेकाबिउगु दु । ट्रम्प व किम निम्हं तप्यंक हे खँ ल्हाये चाहे जुयाच्वंगु दु, उकिं निम्ह नेता दथुइ तप्यंक पौ छ्वयाः जोशपूर्ण खँया आदान प्रदान जयाच्वंगु दु ।अमेरिकायात थ्व खँय् चिन्ता दु कि थ्व तरिका ट्रम्पयात स्वयां किम जोंग उनया निंतिं फाइदाजनक जुयाच्वंगु दु ।

थुकिया समाधान थ्व हे खःकि निम्ह नेतातय् दथुइ शिखर सम्मेलन जुइ न्ह्यव अधिकारीस्तरय् निं सहलह यायेगु । न्हापा थज्याःगु ज्या मजू, तर थ्व पालय् धाःसा निगू देय्या अधिकारीतय् दथुइ नं खँल्हाबल्हा जुयाच्वंगु दु । आः जुइगु वार्ताया झ्वलय् विशेषज्ञस्तरय् न्ह्याः वनेगु खँय् सहमति यायेफत धाःसा जक वास्तविक उपलब्धि जुइ ।

लँपु छगू हे जुइमाः
ट्रम्प व किम दथुइ सिंगापुर जुइगु वार्ताया झ्वलय् निगुलिं देय् कोरियाली प्रायद्वीपय् पूवंक परमाणु हतियार मुक्त यायेगु खँय् सहमत जूगु खः । निम्ह नेतातय् छु आशय खः, व गनं वंगु मदुनि । तर आः न्ह्यसः थ्व दु कि छु थुकिया निंतिं छुं सम्झौता जुइ ला ?

अमेरिकाया निंतिं परमाणु हतियार मुक्त यायेगु मतलब थ्व खः कि उत्तर कोरियां यकःति रुपं थःगु फुक्क परमाणु हतियार चीकेगु व अन्तर्राष्ट्रिय जाँचकर्तातय्त थुकिया पुष्टि यायेत अनुमति बीमाः । उत्तर कोरियाया निंतिं थुकिया मतलब खः अमेरिकां थुकिया पलेसा अमेरिकां नं थःपिनि क्षेत्रय् परमाणु हतियार चीकेमाः ताकि उकिं थःपिंत खतरा मदयेमा ।

विश्लेषकतय्सं थ्व धयाच्वंगु दु कि उत्तर कोरियाया शासकं गुबलय् तकः थःत सुरक्षित महसुस याइमखु, उबलय् तक परमाणु हतियार चीकेगु लँय् छुं प्रगति जुइगु सम्भावना मदु । उकिं उमिगु सुझाव दु– किम जोंग उनयात थ्व थुइकेगु कुतः यायेमाः कि सत्ताय् च्वनाच्वनेगु निंतिं वयात परमाणु हतियार आवश्यक मदु ।

थुकी अमेरिका अप्वः धयाथें खँय् बार्गेनिङ्ग याये चाहे मजू । अमेरिकी सेनाया प्रमुख हे मजू चायेक राष्ट्रपति ट्रम्पं धायेधुंकूगु दु कि थःत दक्षिण कोरियाय् तैनाथ यानातःपिं अमेरिकी सेना लित यंकेगु चाहना दु । तर ट्रम्पं थुकियात कयाः आःया निंतिं छुं योजना मदु धकाः नं स्पष्ट याःगु दु । न्ह्यागु जूसां किम जोंग उनं परमाणु हतियार चिइकेगु बारे आःतक लिखित रुपं बचं बिउगु मदुनि ।

विशेषज्ञतय्सं धाःसा उनयात थुकियानिंतिं दबाब बीमाः, अले थ्व उपलब्धी चूलाकेगु निंतिं विस्तारं खाका दयेकाः उकी सहमति यायेमाः ।
थ्व छगू वास्तविक चुनौति खः । अमेकिी विदेश मन्त्रालयय् उत्तर कोरियाया निंतिं प्रतिनिधि स्टिफन बीगनं वंगु वालय् धाःगु दुकि परमाणु हतियार मुक्त यायेगु लक्ष्य चूलाकेगु लँपुइ यक्व पंगः दु । लिसें वय्कलं थ्व नं धाःगु दु कि वइगु इलय् उत्तर कोरियालिसे छगू सम्झौता जुइ ।

परमाणु हतियारयात कयाः पलाः ल्ह्वनेगु
निगुलिं पक्षपाखें गुगु संकेत वयाच्वंगु खः, उकिं ट्रम्प व किम दथुय बैठक जुइबलय् छुं महत्वपूर्ण पलाः ल्ह्वनीगु आशा अप्वया वःगु दु । बीगनया कथं उत्तर कोरियां ट्रम्प प्रशासन थःपिनिगु ज्याया पलेसा ‘छुं यायेगु’ बचं बिल धाःसा परमाणु बमया इन्धन तयार याइगु फुक्क संयन्त्र नष्ट यायेत तयार दुगु प्रस्ताव छ्वयाहःगु दु ।

किम जोग उनं थुकिया पलेसा अमेरिकां तयातःगु प्रतिबन्ध छ्वासुकेमाःगु व सुरक्षा ग्यारेन्टी बीमाः धयागु चाहना यानाच्वंगु दु । गथेकि कोरियाली युद्ध क्वचाःगु औपचारिक घोषणा जुइमाः ।आः अमेरिका नं परमाणु हतियार चीकेगु निंतिं वास्तविक पलाः ल्ह्वनेगु निंतिं थःपिनिगु मागय् भचा नरम जुयावःगु खनेदु ।

किम जोंग उन थःम्हं छपलाः न्ह्याकेबलय् अमेरिकां नं छपलाः न्ह्याकेमाः धयागुपक्षय् दु । अमेरिका नं थ्व हे लँय् न्ह्याःवःगु खनेदु ।
थ्वहे दथुइ उत्तर कोरियाया परमाणु व मिसाइल हतियार दयेकेगु बन्द यायेगु स्थितिइ वयात तयातःगु छुं प्रतिबन्ध चीकेत अमेरिका तयार दुगु खँ नं पिहां वःगु दु ।

लुमंकेबह जू कि थौंकन्हय् उत्तर कोरियां परीक्षण जक दिकाच्वंगु खः, उत्पादन धाःसा बन्द याःगु मदुनि । थ्व धुंकाः उत्तर कोरियायात थःपिंके दुगु परमाणु हतियार नष्ट यायेत ठोस पलाः न्ह्याकेबीगु निंतिं हाथ्या दु । तर आःया चिन्ता मेगु छु दु धाःसा ट्रम्पं परमाणु हतियार खतम यायेत ठोस पलाः ल्ह्वनेगु पलेसा छगू अन्तरिम समझौता जक यायेफु ।

सत्ययात थुइकेगु
अमेरिकाय् सकसिकें छगू हे जक सोच दु कि किम जोंग उनं गुगुं हालतय् नं थःगु परमाणु हतियार कार्यक्रम बन्द याइमखु । अमेरिकाय् नेशनल इन्टेलिजेन्सया निर्देशक डेन कोट्सं वंगु वालय् सिनेटया छगू कमिटीइ धाःगु दु कि उत्तर कोरियाया नेताया बिचाः थ्व दु कि थःगु शासन कायम हे यानातयेगु खःसा परमाणु हतियार तसकं आवश्यक दु ।

विशेषतः अज्याःगु स्थितिइ गुबले अमेरिकां वयात सत्तां चिइकाछ्वयेगु कुतः याइ ।मेखे विशेषज्ञतय् बिचाः थ्व दु कि किम जोंग उनं उत्तर कोरियायात नं परमाणु हतियार सम्पन्न देय्या मान्यता बीकेगु निंतिं कुटनीतिक माहौल दयेकेगु कुतः यानाच्वंगु दु । वंगु न्यू इयरबलय् थःगु भाषणय् उनं थुलि हे जक धाःगु दु कि परमाणु हतियार चिइकेगु थःगु बचं कथं उत्तर कोरियां न त परमाणु हतियार दयेकी, न वया सम्वद्र्धन याइ ।

उकिं पेन्टागनया पुलांपिं अधिकारीतय्सं धयाच्वंगु दु कि आः तुरुन्त परमाणु हतियार पूवंक खतम यायेगु धायेगु पलेसा बरु हतियार नियन्त्रणयात कयाः खँल्हाबल्हा याःसा तर्कसंगत जुइ । गुलिखे विश्लेषकतय्सं थ्व धयाच्वंगु दु कि उत्तर कोरियाया शासकं गुबलय् तकः थःत सुरक्षित महसुस याइमखु, उबलय् तक परमाणु हतियार चीकेगु लँय् छुं प्रगति जुइगु सम्भावना मदु । उकिं उमिगु सुझाव दु– किम जोंग उनयात थ्व थुइकेगु कुतः यायेमाः कि सत्ताय् च्वनाच्वनेगु निंतिं वयात परमाणु हतियार आवश्यक मदु ।

सम्बन्धित बुखँ

LEAVE YOUR COMMENTS