संकटया निकास आम निर्वाचन

बहुमत प्राप्त सरकारयात तकं देशी विदेशी शक्तिं ज्या याके मबियेगु षडयन्त्र सुरु जुइवं वंगु पौष ५ गते प्रधानमन्त्री केपी शर्मा ओलीं प्रतिनिधि सभा भंग यानादिल । छगू ल्याखं पौष ५ धइगु पौष १ जःखः लानाच्वंगु दिं जूगुलिं मनूतय्सं उकियात २०१७ साल पौष १ गतेया हाकूगु दिं लिसें नं तुलाना यानास्वःगु खनेदत । तर गथे राणातय्गु रोलक्रम भंग यानाः थःगु कथं रोलक्रम दयेकेवं थःपिनि दथुइ असन्तोष अप्वया राणा शासन ब्यवस्था समाप्त जूगु खः, थ्व इलय् नं उगु घटना लिथ्वये त्यंगु दु । थःपिं राष्टपति जुयेगु महत्वाकांक्षा पूमवनेवं वा कार्यकारी प्रधानमन्त्री निक्वः तक जुयेधुंकाः राष्टपति पद भित्ते राष्टपति जूवनेवं अब्लेनिसें पार्टी दुने प्रचण्डया असन्तोष जारी जुयाच्वंगु खः । उकिं सिद्धान्त न विचार न्ह्यःने खने दुपिं न्ह्याम्हं मनू व  न्ह्यागुं गूटलिसें नं पार्टी एकताया नामय् थःगु शक्ति संचय यायेगु ज्याय् प्रचण्ड लगे तुं जुयाच्वन । छखे पार्टीयात तःधं यानाः थः सदां उगु पार्टीया नायःतुं जुयाच्वनेगु महत्वाकांक्षां प्रचण्डं ज्या यानाच्वंगु खःसा मेखे तःधंगु क्रान्तिकारी शक्ति उकिं असन्तोष जुयाः अर्ध भूमिगत रुपं ज्या यानाच्वंगु खँ मोहन बैद्य अलग्ग जूगु व मेगु नं क्रान्तिकारी माओवादी पार्टी खडा यानाः पूर्ण भूमिगत पार्टी दयेकेवं मू पार्टी कमजोर जूगु नं मूल्यांकन यानाच्वन ।

थज्याःगु परिवेशय् बल्लागु कम्युनिष्ट धार निर्माण यायेगु ताःतया यःसां मयःसां छगू बल्लागु शक्ति नेकपा एमालेलिसें पार्टी एकताया प्रस्ताव प्रचण्डपाखें वःगु खः । थ्वहे झ्वलय् थः गब्लें दुई नम्बरय् च्वने चाहे मजूम्ह प्रचण्डं निम्हम्ह नायः कथं च्वनेत तयार जुइवं एकताया घोषणा जुल । तर पार्टी कार्यकर्तातय् दथुइ धाःसा अब्ले निसें असन्तोषया लहर सुरु जूगु खः । थज्याःगु आन्तरिक किचलोया दथुइ नं आम निर्वाचन व प्रदेशया निर्वाचन क्वचाल । बहुमत जक मखु कि दुई तिहाई बहुमत प्राप्त यानाः सरकार दयेकल । थ्व झ्वलय् न्यादँया जनादेश प्राप्त सरकारयात असफल यायेगु षडयन्त्र गनं बाह्य शक्तिं मखुसें पार्टी दुनेया नेतातय्पाखें हे जूगु खनेदु । उकिं नं पार्टी अध्यक्ष केपी शर्मा ओलीं बाध्य जुयाः संसद अन्तर्गतयागु प्रतिनिधि सभायात भंग यानाः वइगु बैशाख १७ व २७ गते निगू चरणय् निर्वाचन यायेगु तिथिमिति नापं क्वछित । स्वयेबलय् थ्व अपर्झट जूगु थें च्वंसां निर्वाचन आयोग, मानव अधिकार आयोग, महिला आयोग, दलित आयोग, अख्तियार दुरुपयोग अनुसन्धान आयोग नापं अनेकौं आयोगय् थःपिनि मनू स्वप्याये धुंकाः जक बल्लबल्ल थ्व पलाः ल्वंगु खँ उकुन्हु सार्वजनिक जूगु खबरं खनेदु । उकिया अर्थ कन्हय् गुकथं थःपिनि पलाः न्ह्याकेगु धइगु पूर्णरुपं गुरुयोजना दयेका जक केपी शर्मा ओलीं थुगु निर्वाचन घोषणा व प्रतिनिधि सभा भंगया पलाः ल्ह्वंगु खः धइगु क्यं ।

थज्याःगु परिवेशय् बल्लागु कम्युनिष्ट धार निर्माण यायेगु ताःतया यःसां मयःसां छगू बल्लागु शक्ति नेकपा एमालेलिसें पार्टी एकताया प्रस्ताव प्रचण्डपाखें वःगु खः । थ्वहे झ्वलय् थः गब्लें दुई नम्बरय् च्वने चाहे मजूम्ह प्रचण्डं निम्हम्ह नायः कथं च्वनेत तयार जुइवं एकताया घोषणा जुल ।

थज्याःगु परिवेशय् वर्तमान सत्तारुढ पार्टी दुनेया मेगु घटक प्रचण्ड माधव नेपाल पक्षं सतकय् च्वनाः निर्वाचन बहिस्कार यायेमाः, थ्व निर्वाचन जुइगु मखु धाःसां थ्व पलाः लिचिलिगु धाःसा खनेमदु । सर्वोच्च अदालत वा छुं नं निकायपाखें सदन पुनःस्थापना जुइगु कथं विघटन जूगु घोषणा मखु । निर्वाचित सरकारयात ज्या यायेगु मौका मबिसें देय्यात अन्यौलया बन्दी दयेकीगु इलय् अन्तिम हतियार प्रयोग यायेगु हक अधिकार प्रधानमन्त्रीयाके सुरक्षित दइ । उकिं नं धाइ, प्रजातान्त्रिक नेता वा प्रधानमन्त्रीयाके सदन भंग यायेगु थेंज्याःगु गोलीं जाःगु तुपः (बन्दूक) न्ह्याब्लें थःकेंतुं सुरक्षित जुयाच्वनी । सेना, प्रहरी, विशेष प्रहरी, अन्तर्राष्टिय समर्थन लगायत पार्टीया छगू सबल पक्ष थःगु पक्षय् सुरक्षित दुगु कारणं जक प्रधानमन्त्री वा पार्टी अध्यक्ष केपी शर्मा ओलीं थुकथंया पलाः ल्ह्वंगु खः । वास्तबय् निगू पार्टी छगू जूगु घोषणा लिपा निम्ह अध्यक्षया ब्यवस्था यासां थ्व संसारय् गनं मदुगु ब्यवस्था खः । वास्तवय् पार्टी अध्यक्ष केपी ओली जक खः । थः नं अध्यक्ष खः धकाः मनय्या लड्डू घ्यलिसें नयाच्वंगु धइगु ला प्रचण्ड थः अन्तर्राष्टिय जगतय् अपराधी जुइ धकाः पार्टी बिलय याना जूसां सुरक्षित अवतरण यायेगु बांलाःगु काइदा जक खः । छाय्की आः नं आपालं घाइते योद्धात युद्धयात त्वतूगु खँय् घोर असन्तोष जारी यानाच्वंपिं दनि । आपालं थःपिनि सिंचा (सिंदूर) हुयेत बाध्य याकः मिसा (बिधुवा)तय्गु मिखाय् ला प्रचण्ड अपराधी हे तिनि । सेना समायोजनय् योद्धातय्त वःगु एकमुस्त अरबौं दां अपचलन याःगु खँ सार्वजनिक जुयाच्वना तिनि ।

थज्याःगु थीथी कारणं अब्लेया सत्ता पक्ष एमाले व माओवादी शक्ति छथाय् च्वने फइगु स्थिति मदु । छाय्धाःसा स्वार्थी स्वार्थी दथुइया एकता विना स्वार्थ ताः ई तिके जुइफइमखु । उकिं नं छन्हु उपिं अलग्ग जुइपिं तिनि । आन्तरिक कलह अप्वःगु कारणं बरु उपिं भचा न्हापा लाक अलग्ग खनेदुगु दु । तर थुकिं देय् व जनतायात फाइदा धाःसा मदु । बरु केपी ओलीं धाःथें पार्टी एकता यायेगु ज्याय् केपी ओलीया छुं नं भूमिका मदु, जिपि जक निर्णायक खः धइगु मनसाय तयाच्वंपिं प्रचण्ड, माधव नेपाल व झलनाथ खनालयात नं चुनावया घोषणां मौका बियातःगु दु । तर गथे २०५१ सालया आम निर्वाचनय् एमालें अल्पमतया सरकार दयेकाः उगु इलय् गृहमन्त्री जुयाच्वंम्ह बामदेवया पालाय् बहुसंख्यक स्थानीय सरकार एमालें त्याकूगु इलय् थः अलग्ग पार्टी दयेकाः वना चुनाव जूगु इलय् देसय् छम्ह हे थः प्रतिनिधि सदनय् मथ्यनेवं सहाना व वामदेव हाकनं मूल पार्टीइ समाहित जुइमाःगु खः, प्रचण्ड व माधव नेपालया गूटं नं चुनाव लिपा उगु स्थिति थ्यन धाःसा हाकनं केपीया शरणय् मवइ मखुनि ।

प्रजातान्त्रिक ब्यवस्थाया मूल आधार धइगु नागरिकतय् अभिमत खः । उकिं जनतां बिउगु आदेश माने यायेगु नेतातय् कर्तब्य खः । उकिं नं थ्व इलय् वइगु बैशाख १७ व २७ गतेया चुनावय् फयां फत्ति अप्वः सहभागी जुयाः ताःलाकेगु व उकिं निर्वाचित जनप्रतिनिधियात सत्ता हस्तान्तरण यायेगु वर्तमान राजनीतिक अन्योलया निकास खः । सतकय् धर्ना च्वनाः, न्हूगु पार्टी दर्ता यानाः वा थःपिं बहुमत दु धकाः क्यनाः जुइगु व अबै धानिक रुपं प्रजातान्त्रिक मूल्य मान्यतायात हाचां गयाः अन्तर्राष्टिय ग्वाहालि कायेगु ज्यां कन्हय् झी थःगु देय्यात नोक्सान यायेपिं साबित जुइफु । छगू इलय् भूमिगत च्वनाच्वंगु पार्टी थौं थ्व इलय् सबल पार्टीलिसें एकता जुइधुंकाः स्वार्थया कारणं अलग्ग जुयाच्वनेगु पाय्छि मखु ।

सम्बन्धित बुखँ

LEAVE YOUR COMMENTS