बाइडेनया अग्रता, छगू राज्यय् त्याःसा गात
एजेन्सी- अमेरिकाय् राष्ट्रपतिया चुनाव सुनां त्याकी धयागु खँ बिहिवाः बहनी तकं स्पष्ट जुइफुगु मदुनि । न्हापा जूसां चुनाव क्वचाःगु चान्हय् कुन्हु हे स्पष्ट रुपं सु त्याइ धयागु लिच्वः वयेधुंकीगु खः, तर थुगुसी न्हिछिचछि बीधुंकाः नं स्पष्ट रुपं सु त्याइ धयागु धायेफयाच्वंगु मदुनि ।
अमेरिकाय् राष्ट्रपतिया ल्यज्याः थीथी राज्यपाखें वइगु इलेक्ट्रोल मतपाखें जुइगु खः । ह्वाइटहाउस तक थ्यंकीगु म्याजिकल नम्बर २७० खः, अर्थात सुनां २७० इलेक्ट्रोल मत कायेफत व राष्ट्रपति जुइखनी । तर म्हिगः बहनी तक राष्ट्रपतिया प्रत्याशी जो बाइडन व डोनाल्ड ट्रम्प मध्ये सुनां २७० इलेक्ट्रोल मत हइ धयागु स्पष्ट मजूनि । आःतक क्वचाःगु मतगणना कथं धाःसा जो बाइडन न्ह्यःने लानाच्वंगु दु । म्हिगः बहनी तक ५० राज्य मध्ये ४६ राज्यया लिच्वः वयेधुंकूगु खःसा थुकी वाइडेनयात २६४ व ट्रम्पयात २१४ इलेक्ट्रोल मत वःगु दु ।
आः नेभाडा, पेन्सिलभेनिया, नर्थ क्यालोरिना, जर्जिया व अलास्काया लिच्वः मवःनि । थुपिं मध्ये नेभाडाय् जो बाइडन न्ह्यःने लानाच्वंगु दुसा पेन्सिलभेनिया, नर्थ क्यालोरिना, जर्जिया व अलास्काय् ट्रम्प न्ह्यःने दु । बाइडेन न्ह्यःने लानाच्वंगु नेभाडाया ६ इलेक्ट्रोल मत दु । थ्व राज्य छगू जक त्यात धाःसा आः बाइडेनयात ह्वाइट हाउसय् यंकी ।
मेखे ट्रम्प न्ह्यःने लानाच्वंगु पेन्सिलभेनियाय् २०, नर्थ क्यालोरिनाय् १५, जर्जियाय् १६ व अलास्काय् ३ इलेक्ट्रोल मत दु । थ्व प्यथाय्या इलेक्ट्रोल मत व ट्रम्प आः त्याकेधुंकूगु २१४ मत जोडे यायेबलय् मुक्कं २६८ जक थ्यनी । यदि आः ट्रम्प हाकनं ह्वाइट हाउसय् हे च्वनेगु खःसा बाइडेनं अग्रता कयाच्वंथासय् ट्रम्पं त्याकेमाःगु जुइ । तर आः जुयाच्वंगु मतगणना कथं थ्व भचा थाकुइफुगु खँ सर्वेक्षणं क्यनाच्वंगु दु । थ्व ल्याखं थ्व पालय् जो बाइडेन राष्ट्रपतिइ वइगु खनेदु ।
मेखे राष्ट्रपति ट्रम्प मत्याइगु जुइवं वय्कःया समर्थकतय्सं मतगणनाय् धाँधली जूगु धकाः प्रदर्शन सुरु याना हःगु दु । ट्रम्पया चुनाव अभियानयापिं नं पेन्सेल्भिनिया, मिसिगन व जर्जिया मतगणनाय् धाँधली जूगु धासें अदालत वनेधुंकूगु दु ।
LEAVE YOUR COMMENTS