
आर्थिक दँ २०७३÷७४ या तथ्यांक कथं स्वनिगःया येँ, यल व ख्वपय् यानाः न्याद्वलं मल्याक सहकारी संस्था दर्ता जुयाच्वंगु दु । अले थुपिं सहकारीइ जक साढे ४१ अर्बं मल्याक लगानी जुयाच्वंगु दु ।सहकारी विभागया कथं २०७४ असार मसान्त तकया दुने ५६४७ गू सहकारी संस्था दर्ता जुयाच्वंगु खः । बचत तथा ऋण, बहुउद्देश्यीय, कृषि, दुग्ध, उपभोक्ता, विद्युत, तरकारी तथा फलफूल, चिया, मौरीपालन, संचार, स्वास्थ्य व मेमेगु यानाः थुलि संस्था दर्ता जुयाच्वंगु खः ।
मुक्कं सहकारीया ल्याखय् येँ हे दकलय् अप्वः सहकारी संस्थात दु । येँय् जक फुक्क कथंया सहकारी यानाः ३८३२ गू सहकारी संस्था दर्ता जुयाच्वंगु दुसा यलय् ११५३ गू व ख्वपय् ६६२ गू सहकारी संस्था दर्ता जुयाच्वंगु दु ।तथ्यांक कथं दकलय् अप्वः बचत तथा ऋण सहकारी दु । येँ, यल व ख्वपय् यानाः ७१.२९ प्रतिशत अथे धयागु ४०४५ गू बचत तथा ऋण सहकारी दु । येँ बचत तथा ऋण सहकारीया ल्याः २९९७ गू दुसा यलय् ५७५ गू व ख्वपय् ४७३ गू दु । बचत तथा ऋण धुंकाः छसिकथं दकलय् अप्वः बहुउद्देश्यीय, कृषि, दुग्ध व उपभोक्ता सहकारी खनेदु ।
विभागया तथ्यांक कथं स्वनिगलय् जक ४१ अर्ब, ५९ करोड, ९० लाख ७२ हजार तका दां शेयर लगानी जुयाच्वंगु दु । थुकी दकलय् अप्वः बचत तथा ऋण सहकारीइ हे लगानी जुयाच्वंगु दु । येँ, यल व ख्वपय् यानाः बचत तथा ऋण सहकारीइ जक ३५ अर्ब, ३२ करोड, ४५ लाख, ९४ हजार तका शेयर लगानी जुयाच्वंगु दु । सहकारी संस्थात येँय् दकलय् अप्वः दुसां लगानी धाःसा दकलय् अप्वः ख्वपय् जुयाच्वंगु दु । ख्वपया बचत तथा ऋण सहकारीतय् पूँजी जक २१ अर्ब ८ करोड,२८ लाख ३५ हजार दु । येँय् थ्यंमथ्यं थुकिया बछि ११ अर्ब, ३२ करोड, ६७ लाख ३५ हजार दु ।
यलय् दकलय् म्हो २ अर्ब ९१ करोड, ५० लाख २४ हजार जक दु । येँ, यल व ख्वपय् यानाः १ खर्ब ६५ अर्ब ५९ करोड बराबरया बचत परिचालन जुयाच्वंगु दु । थुकी दकलय् अप्वः येँ जक सहकारी संस्थातय्सं १ खर्ब ८ अर्ब ९२ करोड ३४ लाख निक्षेप मुंकातःगु दुसा ख्वपय् १८ अर्ब २७ करोड ५० लाख दु, अथेहे यलय् ३८ अर्ब, ३९ करोड, ६६ लाख निक्षेप मुंकातःगु दु । वंगु असार मसान्त तकया तथ्यांक कथं त्यासा लगानी पाखे येँ, यल व ख्वपय् यानाः १ खर्ब १८ अर्ब, ६२ करोड, १५ लाख बराबरया जुयाच्वंगु दु । येँय् जक ८५ अर्ब, १९ करोड, ९३ लाखया, ख्वपय् १५ अर्ब, ३५ करोड, ७१ लाख बराबरया जुयाच्वंगु दुसा यलय् १८ अर्ब, ६ करोड, ५० लाखया जुयाच्वंगु दु ।
स्रोत ः सहकारी विभाग
LEAVE YOUR COMMENTS