भौपिं जक ब्वनीगु क्याम्पस !

येँ (नेपालभाषा टाइम्स)÷छगू इलय् झीथाय् नं इहिपा जुल मिस्तय् करिअर दयेकेगु अवसर समाप्त जुइ धकाः थुइकीगु खः । तर चितवनया मैंयादेवी कन्या क्याम्पसय् धाःसा इहिपा जुइधुंकाः क्याम्पस भर्ना जू वःपिं विद्यार्थीतय् ल्याः यक्व दया वःगुलिं यदि अवसर दत धाःसा मिस्तय्त इहिपां नं मपं जुयाच्वन धइगु खँ पुष्टि जूगु दु ।

थुगु क्याम्पसय् ब्वनीपिं विद्यार्थीत मध्ये थौंकन्हय् ७० प्रतिशत इहिपा जुइधुंकूपिं मिस्त जुयाच्वंगु दु । थौंकन्हय् १५०० म्ह विद्यार्थी आखः ब्वनाच्वंगु थ्व क्याम्पसय् ११ व १२ कक्षाय् भर्ना जू वइपिं अधिकांश विद्यार्र्थीत इहिपा जुइधुंकूपिं जुयाच्वंगु दु । न्हापा इहिपा जुइधुंकूपिं विद्यार्थीतय् ल्याः ४० प्रतिशत ति जक दुगु खः । आः थ्व ल्याः अप्वया वनाः ७० प्रतिशत थ्यंगु खँ क्याम्पस प्रमुख डा. विश्वराज सुवेदीं कनादिल । थ्व क्याम्पसय् शिक्षा, मानविकी, व्यवस्थापन व नर्सिङ विषयया पढाइ जुइ ।

विवाहित मिस्तय्सं थ्व क्याम्पसयात सुरक्षित महसुस याःगु व उमि छेँजःपिंसं नं थ्व क्याम्पसय् आखः ब्वंकेगु पाय्छि जू थें महसुस याःगुलिं इहिपा लिपा नं आखः ब्वनीपिं छात्रात अप्वःगु खँ नं क्याम्पस प्रमुख सुवेदीं कनादिल ।

मिस्तय् लागिं सुरक्षित व मिस्त जक ब्वनीगु जूगुलिं थन चितवन जक मखु जःखः तराईया आपालं जिल्लाया छात्रात नं ब्वं वयाच्वंगु दु । थौंकन्हय् थन २५ गू जिल्लाया मिस्त आखः ब्वनाच्वंगु दु ।

समाजसेवी मैंयादेवी श्रेष्ठं वि.सं २०५४ सालय् भरतपुर नपा वडा नंं. १० य् १२ कट्ठा जग्गा न्यानाः थ्व क्याम्पस सञ्चालन याके बिउगु खः । शुरुइ विद्यार्थी मदयाः दछि तक धइथें शिक्षकतय्त तलब नकेत तकं धौधौ जूगु थ्व क्याम्पसय् आः विद्यार्थी अप्वया वःगुलिं क्याम्पस प्रशासन उत्साहित जूगु दु । क्याम्पस प्रमुख सुवेदीं कनादीकथं मैंयादेवी धइगु नामं नं विद्यार्थी व अभिभावकतय्त आकर्षित यानाच्वंगु खनेदु । थ्व क्याम्पसया संस्थापक संरक्षक कथं नं वय्कः हे दी ।