ने. सं. ११४४ ञलाथ्व दशमी -

आनन्दकुटी विहार पुनःनिर्माण क्वचाल

येँ – देय्या हे दकलय् पुलांगु थेरवादी बौद्ध विहारया रुपय् दयाच्वंगु थनया स्वयम्भूस्थित आनन्दकुटी विहारया पुनःनिर्माण सम्पन्न जूगु दु । २०७२ बैशाख १२ गते गोरखाया बारपाक केन्द्रविन्दु जुयाः ब्वःगु भुखाचय् लानाः उगु विहारया छुं ब्व दुना वयाः क्षतिग्रस्त जूगु खः ।
नेपाल सरकारया प्राविधिक ग्वाहालिइ श्रीलंका सरकारया आर्थिक ग्वाहालिइ विहारया पुनःनिर्माण जूगु खः ।

श्रीलंकां सरकारया २० गू करोड लागतय् निर्माण सम्पन्न जूगु विहार पुनःनिर्माणया निंतिं स्वदँया ई काःगु दु । पुनःनिर्मित विहारय् भिक्षु आवास गृह, भोजन हल, सभाहल, भिक्षुपिनिगु निंतिं थीथी धार्मिक गतिविविध यायेगु कक्ष व मेमेगु यानाः ३० गू निर्माण याःगु दु ।

विहारया प्रमुख भिक्षु धम्ममूर्ति महास्थविरं बियाबिज्याःगु जानकारीकथं २०४३ सालय् विहारया निर्माण यायेधुंकाः उगु विहारय् राष्ट्रिय अन्तर्राष्ट्रियस्तरया आपालं धार्मिक ज्याझ्वःत जुया वयाच्वंगु खः । विहारया पुनःनिर्माणया ज्या क्वचाःसां विहार परिसरय् हे दुगु श्रीलंकन चैत्य राम चैत्यय् गजू छुइगु ज्या धाःसा ल्यं दनि ।

थुगु चैत्यय् गर्भय् शाक्यमुनि तथागत भगवान गौतम बुद्धया पवित्र अस्थिधातु तयेगु यानातःगु दु । थन तयातःगु अस्थिधातु स्वांयाःपुन्हिकुन्हु पित हयाः सर्वसाधारणयात दर्शन याकेगु याइ । श्रीलंका सरकारपाखें उपहारकथं प्राप्त जूगु बुद्धया अस्थिधातु उगु चैत्यया गर्भय् तयेगु यानातःगु खःसा स्वांयाःपुन्हिकुन्हु गर्भ पित हयाः नेपाःया निंतिं श्रीलंकाया राजदूतं थःगु छ्यनय् तयाः विहार परिसरय् हे दुगु अस्थिधातु प्रदर्शनस्थल तक यंकेगु याइ ।

विहार पुनःनिर्माणया झ्वलय् श्रीलंकन राम चैत्यया नं उत्खनन् याःगु इलय् बौद्ध धर्मलिसे सम्बन्धित हाकुचया आपालं ज्वलंत लुया वःगु खः । उगु चैत्य उत्खनन्या इलय् बोधिसत्व, बुद्धमूर्ति, ताराया मूर्तिलिसें आपालं चैत्यत लुया वःगु खः । थुगु चैत्यया शिलान्यास श्रीलंकाया भिक्षु नारद महास्थविरं याना बिज्याःगु खः ।

भिक्षु अमृतानन्द महास्थविरं स्थापना याना बिज्याःगु थुगु विहारं नेपाःया थेरवाद बौद्ध परम्पराय् बौद्ध शिक्षाया प्रवद्र्धन लिसें विकास, बौद्ध धर्मया चिन्तन मनन, अभ्यास, प्रचारप्रसारय् तःधंगु भूमिका म्हितूगु दु ।