२७ वडाय् याःगु पीसीआर परिक्षणया रिपोर्ट वयेगु सुरु

येँ – येँ महानगरपालिकाया २७ वडाय् कोरोना संक्रमित मनूत नाप स्वापू दुपिनिगु पीसीआर परिक्षणया लिच्वः वयेगु सुरु जूगु दु । २७ वडाया वडाध्यक्ष चिनियामान वज्राचार्यया कथं थौं चान्हय् निसें रिपोर्ट वयेगु सुरु जूगु खः । वय्कःया कथं ३१२ म्ह मनूतय् स्वाब संकलन जूगु मध्ये आः तक ५० म्हेसिया रिपोर्ट वःगु दु । उपिं फुक्कसिया रिपोर्ट नेभेटिभ वःगु जानकारी नं वय्कलं बियादिल । येँया असंया ग्वसिपः व भमुलुइ कोरोना भाइरस संक्रमित लुइवं सोमवाः अन स्वाब संकलन याःगु खः ।

अथेहे तू क्यब (फलफूल गल्लिइ) पसः दुम्ह पसल्यायात संक्रमण जुइवं अन नापं पसः तयातःपि निम्हेसिया नं पीसीआर परिक्षण याःगु खः । उपिं निम्हेसियां रिपोर्ट नं नेगेटिभ वःगु दु ।