प्रम ओलीं यकःति राजदूत सिफारिस यायेवं नेकपा दुने हाकनं विवाद तच्वल

येँ (नेपालभाषा टाइम्स) – नेपाल कम्युनिष्ट पार्टीया अध्यक्ष लिसे प्रधानमन्त्री केपी शर्मा ओलीं स्वंगू देय्या राजदूतयात सिफारिस यायेवं सत्तारुढ दल दुने असन्तुष्टि अप्वया वंगु दु। सरकारं याइगु महत्वपूर्ण निर्णय पार्टी लिसे सहलह यानाः यायेगु सचिवालयया न्याक्वःगु बैठकया निर्णय अःखः प्रम ओली राजदूत सिफारिस यायेवं पार्टी दुने हाकनं विवाद ब्वलनिगु अवस्था वःगु खँ नेकपाया नेतृत्वपिंसं धाःगु दु ।

म्हिगः च्वंगु मन्त्रिपरिषदया बैठकं मुख्य सचिवं लोकदर्शन रेग्मी बिउगु राजीनामा स्वीकृत यासें बेलायतया राजदूतय् सिफारिस याःगु खः । उकथं हे पुलांम्ह अर्थमन्त्री लिसे प्रधानमन्त्रीया सल्लाहकार युवराज खतिवडायात अमेरिकाया राजदूत सिफारिस याःगु दुसा निर्मल विश्वकर्मायात दक्षिण अफ्रिकाया राजदूत सिफारिस याःगु खः ।

उगु सिफारिसयात कयाः मेम्ह अध्यक्ष पुष्पकमल दाहालं पार्टी लिसे छुं हे कथं सहलह मयाःसे याःगु धासें असन्तुष्टि प्वंकूगु दु। मन्त्रिपरिषद पुनर्गठन यायेगु खँय् निम्ह अध्यक्षया दथुइ खँ मिले मजुयाच्वंगु इलय् ओलीं हाकनं न्हापा थें तुं यकःति निर्णय यायेत्यंगु दाहाल व वरिष्ठ नेतापिं माधवकुमार नेपाल व झलनाथ खनाल पुचलं याःगु दु ।

नां कने मयःम्ह स्थायी कमिटीया छम्ह सचिवालय सदस्य प्रम ओलीया निर्णय पार्टीया स्थायी कमिटी व सचिवालयया बैठकया अःखः जूगु द्वपं बियादीगु दु। वय्कलं धयादी, ‘मन्त्रिपरिषद पुनर्गठनया खँय् पार्टी दुने छगू मत मजुयाच्वंगु इलय् कुटनीतिक मामिला लिसे स्वापू दुगु राजदूत सिफारिस यायेगु निर्णय बारे पार्टी दुने सहलह जूगु मदुनि । मेखे गुपिंत राजदूतया निंतिं सिफारिस याःगु दु, व नं मापदण्ड खः । उकथं निर्णय याः धकाः पार्टीं धाःगु मदु ।’

प्रम ओलीया म्हिगःया निर्णय लिपा नेकपाया आपाल वरिष्ठ नेतापिसं ओली हाकनं न्हापा थें तुं थः याकचां निर्णय यायेत स्वःगु द्वपं बिउगु दु। दाहाल लिसे सतिम्ह छम्ह नेताया कथं ओलीं राजदूत नियुक्तियात कयाः दाहाललिसे गुगुं नं कथंया सल्लाह याःगु मदु। उम्ह नेता धयादी, ‘सरकारं याःगु नियुक्तियात कयाः अध्यक्ष दाहाल लिसे सहलह जूगु मदु, सरकारं थुकथं छाय् निर्णय यात धइगु बारे जिमिसं थुइकेगु ज्या यानाच्वनागु दु ।’

वंगु भदौ २६ गते च्वंगु स्थायी कमिटीया बैठकं सरकारं याइगु महत्वपूर्ण नियुक्ति पार्टी लिसे सल्लाह याना जक यायेगु खँ न्ह्यथनातःगु दु। तर स्थायी समितिया निर्णय प्रम ओली लछि हे मथ्यनेवं उल्लंघन याःगु धासें उकियात कयाः पार्टी दुने थप सहलह जुइगु खँ नं उम्ह स्थायी समितिया दुजलं कनादीगु दु ।