नेकपा विवादय् विदेशी ल्हाः

नेपाःया कम्युनिस्ट पार्टीया इतिहासय् झापा संघर्षया पृष्ठभूमिं विकसित जूगु मालेया धार व प्यक्वःगु महाधिवेशन यानाः वःगु धार सुरुंनिसें हे प्रतिस्पर्धी खः धइगु सकसिनं सिउ । भूमिगतकालय् पार्टीया नां मसिउसां खुल्ला जुयाच्वंपिं अखिल पाँचौँ व छैठौँ धाल कि खिचा व भौ बराबर खः धकाः राजनीतिइ चिउताः तइपिं न्ह्याम्हसिनं नं सिउ । राजनीतिइ चिउताः मतइपिं पंचायतकालय् कलेजय् आखः ब्वंपिं विद्यार्थीतसें नं सिउ । बुसांनिसेंया खिचा व भौ गुकथं २०७४ सालय् चुनाव जुइ न्ह्यः गठबन्धन यानाः मंकाः घोषणापत्र दयेकाः चुनाव ल्वात व हाकनं २०७५ साल जेठ ३ गते मदन भण्डारीयात स्याःगु दासढुंगा हत्याकाण्डया लुमन्ति न्हिकुन्हु नेकपा धइगु नां छुनाः पिहां वल – थ्व नेपाःया कम्युनिस्ट पार्टीया इतिहासय् हे दकलय् अजू चायापुगु खँ खः ।

न्हापान्हापा सिद्धान्तया खँयात कयाः काटामार याइपिं मनूत, आः सिद्धान्तया राजनीति मदयाः स्वार्थया राजनीति जक जूबलय् कम्युनिस्ट मखयाः लोभी बर्म्हूत जक जूगुलिं मिले जुइफुगु खः । स्वार्थया निंतिं मिले जूगु खः धाइपिं नं दु । गुलिसिनं स्वार्थवश हे मिले जूगु खःसां विदेशी शक्तिकेन्द्रतसें छाय् मिले याके बिल ? धइगु न्ह्यसः छुइपिं नं दु। अथे जूगुलिं थुपिं मिले जूगु दुसां विदेशी शक्ति केन्द्रया नं आशिर्वाद दुगु हे जुइमाः । इमिके नं अनुमोदन काःगु हे जुइमाः धकाः धाइपिं नं दु ।

एमाले व माओवादी जानाः नेकपा दयेकूगुलिइ समर्थन याना वयाच्वंम्हकथं खनेदुम्ह धाःसा भारतया एस.डी. मुनि छम्ह खनेदु। जवाहरलाल नेहरू विश्वविद्यालयय् डा. बाबुराम भट्टराईया गुरु धकाः नं म्हसिउम्ह मुनि नेपालय् नेकपाया पक्षय् व राजतन्त्रया विरोधय् खनेदुम्ह बुद्धिजीवी खः । वय्कःयात भारतय् भारतीय कांग्रेसलिसे सत्तीम्ह बुद्धिजीवी धकाः नं धाः । वय्कलं भारतय् भाजपाया सरकारया जुजु व हिन्दू राष्ट्र कायम यायेगु रुझानयात न्ह्याबलें विरोध यानाच्वंगु स्वयेबलय् मुनि अनया सोनिया गान्धीनाप सत्तीम्ह बुद्धिजीवी खः धकाः थुइकेत थाकु मजू । तर वैद्य माओवादीयात कुचा थलेगु ज्याय् तकं वय्कःया ल्हाः दुगु धइगु खँ पिहां वःगु स्वयेबलय् वय्कलं भारतया सत्तापक्षया रणनीतिकथं नं ज्या याः धइगु सीदु। भारतीय सत्तां नं वय्कःयाके थुकथं माल धाःसा ज्या काइगु व साउथ ब्लकं थःगु नेपाः सम्बन्धी रणनीति दयेकेत नं वय्कःया विचाः न्यनेगु याःगु खँ नं पिहां वःगु हे खँ खः । उकिं एसडी मुनि मार्फत नेकपा दयेकेगु ज्याय् भारतीय सत्तापक्ष वा साउथ ब्लकया समर्थन मदु धकाः धाये फइमखु ।

तर आः वयाः नेपाःया निंतिं पूर्व भारतीय राजदूत व अनया पूर्व विदेश सचिव श्यामशरणं धाःसा एमाले व माओवादीयात मिले यानाः नेकपा दयेकाबीगु ज्या चिनियातसें याःगु धकाः धाःगु दु। श्यामशरण धइम्ह नेपालय् ज्ञानेन्द्र शाहया शासन मदयेकाः लोकतन्त्र व गणतन्त्र हयेगु इलय्दु म्ह भारतीय राजदूत खः । नेपालय् लोकतन्त्र हयाः माओवादीयात मूलधारय् हयेगु ज्याया संयोजन थुम्ह मनुखं याःगु खः ।

राजदूत याब्छिं हे नेकपा गुगुं हालतय् नं विभाजन जुइ मजिउगु बल्कि थुकिया निंतिं केपी ओलीं प्रधानमन्त्री त्वःतेत तयार जुइमाः धकाः धाल हँ ! अले केपी ओली तम्वयाः भारतीय जासूसी संस्था ‘रअ’या नायः सामन्त गोयलयात सःताः नाप लात । ओलीं भारतीय संस्थापन पक्षया नेतातय्गु इच्छाकथं थःपिं जुजु हयेत नं तयार तर प्रचण्डयात चाहिँ सिधयेकेमाः धकाः धाल ।

न्हापा जुजु महेन्द्रं जक भारतया दबावयात पनेत चिनिया कार्ड क्यनेगु याः धाःथें प्रधानमन्त्री केपी शर्मा ओलीं नं उकथं हे राजनीति याःगु खनेदु।  हाकनं नेकपा दयेधुंकाः चिनिया कम्युनिस्ट पार्टीया मनूत वयाः थन क्लास नं काः वल । थ्व स्वयेबलय् नेकपा दयेकूगुलिइ चिनिया पक्षया ल्हाः नं दयेमाः धकाः अनुमान यायेछिं । तर नेपाःया राजनीति आपाः भारतपाखें हे प्रभावित जुयाच्वंगु स्वयेबलय् थुमिसं थःथः मिले जुयाः भारतीय आशिर्वाद काःगु तर लिपा वनाः चिनियातसें थुमित उपयोग यायेत स्वःगु नं खयेफु। विशेषतः नेपालय् अमेरिकी लगानीया एमसीसी वइगु खनेदुगुलिं चीन विशेष सतर्क जुइमाःगु खनेदु। नेकपाया प्रचण्ड, देव गुरुङ, कृष्णबहादुर महरा व अग्नि सापकोटापिं एमसीसीया विरोधी जूगु धइगु चिनियातय्गु प्रभाव हे खः । उकिं नं नेपालय् भारत व अमेरिकाया एक्सिसया ज्या मजुइकेत नेकपा दुनेया नेतात ल्हातय् कायेमाःगु व नेकपायात तछ्यानाः एमसीसी समर्थक नेकपायापिं जक सत्ताय् दइगु स्थिति वयेकेगु पक्षय् चीन खनेमदुगु खः । थ्व हे ल्याखं नेकपा दुनेया विवाद समाधान यायेत चिनिया राजदूत हाउ याब्छि सक्रिय जूगु खनेदु। आः वयाः राजदूत याब्छिं हे नेकपा गुगुं हालतय् नं विभाजन जुइ मजिउगु बल्कि थुकिया निंतिं केपी ओलीं प्रधानमन्त्री त्वःतेत तयार जुइमाः धकाः धाल हँ ! अले केपी ओली तम्वयाः भारतीय जासूसी संस्था ‘रअ’या नायः सामन्त गोयलयात सःताः नाप लात। ओलीं भारतीय संस्थापन पक्षया नेतातय्गु इच्छाकथं थःपिं जुजु हयेत नं तयार तर प्रचण्डयात चाहिँ सिधयेकेमाः धकाः धाल । नेतागिरी याइपिंसं धाःगु थ्व खँय् सत्यता मदु धकाः धायेमफु। तर पूर्व भारतीय राजदूत श्यामशरण धाःसा जुजु हयाः नेकपायात कमजोर वा विस्थापन यात धाःसा नेपालय् झन् अस्थिरता वइगु व पहिचानया निंतिं ल्वानाच्वंपिं मधेसवादीतसें नं आन्दोलन याइगु व भारतीय सीमानाय् अस्थिरता पिहां वइगु खँया वकालत याःगु दु। थ्व खँ बांलाःगु हे खँ खः ।

वंगु पुस ५ गते संसद विघटन जूबलय् एसडी मुनिं नं छगू ट्विट यासें केपी ओली सामन्ती तत्वत नाप हे सत्तिना वनेगु धइगु खःसा थुकिं नेपालय्रा जनीतिक धुर्वीकरण सुरु जुइगु व नेपाः अस्थिरतापाखे हे वनीगु धकाः चिन्ता प्वंकूगु खनेदु। आः वयाः श्यामशरणं नं नेपालय् जुजुपिंसं हे भारतविरोधी भावना न्यंकेगु ज्या याःगु खः धाःगु दु। नापं नेपालय् अमेरिका व चीनया दथुइ हानाथाप जुयाच्वंगु व भारत साक्षी किनाराय् लानाच्वंगु खँ नं न्ह्यथंगु दु। थुपिं निम्हं हे भारतय् लोकतन्त्र हयेगु ज्याय् संलग्न मनूत खः । थुमिगु खँयात भारतया संस्थापन पक्षं गुकथं काइ व स्वयेगु ल्यं हे दनि । रञ्जित राय थुज्वःपिं नेपालय् लिपा राजदूत जुयावःपिंसं ला केपी ओली भारतय् भ्वसू वःगु खँ न्ह्यथनाच्वंगु दु। नेपालय्जु जुवादी तत्वतसें जिपिं ला हिन्दू राष्ट्र छगू दयेमाल धकाः धयाच्वनेधुंगु खः, तर उत्तर प्रदेशया मुख्यमन्त्री आदित्यनाथ योगीया जोडबलं हानं जुजु हे वइगु जुल धकाः धयाहःगु दु। थथे हे खःसा संसद विघटन स्टेप १ जक खःसा आः स्टेप २ या रूपय् संकटकाल नं वइ । संकटकालया खँ नेतातसें हे न्ववानाहःगु दु । थ्व स्वयेबलय् नेपालय् जुजु हयेगु खेल सुरु जुइधुंकूगु दुसा गणतन्त्रवादीत नं छप्पँ जुयाः उकियात कार्यान्वयन जुइके मबीगु ल्याखय् न्ह्यचिला च्वंगु दु । एसडी मुनि व श्यामशरण नेपालय् जुजु हयेके मबीगु पक्षय् हे खनेदु। तर थुमिगु लेख भारतीय संस्थापन पक्षया धापू धाःसा मखु। चीन धाःसा केपी ओलीयात प्रधानमन्त्री कायम यानाः प्रचण्ड व माधवयात पार्टीया नेतृत्व माने याकेगु ज्याय् सना जूगु खनेदु। तर ओली धाःसा थुकिया सिकं न्ह्यः न्ह्याः वनेधुंकूगु व लिहां वइ मवइ ठेगान मदुगु अवस्था खनेदु ।

सम्बन्धित बुखँ

LEAVE YOUR COMMENTS