कुत्सित राजनैतिक चाल

छम्ह धुरन्धर चतुर नेता सु? नां मकाये । थौंकन्हय् जित्तले नेतातय् नां मन्ह्यथनेगु सोचय् । इशारा, इशारां नेतातय् बारे न्ह्यथने । बुद्धिमानतय्त इशारा हे काफि जुइ । हलु धासेलिं कुतिं न्यानाच्वब्न माली मखु। सुयात किकाः खँ धयाच्वन, छिकपिंसं सिइके फइ । विश्वास काये, याये ।

छम्ह महान नेतां थःगु नुगःखँ खुलस्त यासें धाइ । धाइ, ‘जनयुद्ध जिं पृथ्वीनाराण शाहपाखें उत्प्रेरित जुयाः न्ह्याकागु खः ।’ जनयोद्धाया नायक, क्रान्तिकारी नेता माओवादी आन्दोलनया लिउने पृथ्वी नारायण शाहं उत्प्रेरित जूगु खँ प्वंकी । आम जनतां बिचाः काःगु खः क्रान्तिकारी माओवादी आन्दोलनया नेता माओया क्रान्तिकारी बिचार. उत्प्रेरित जुयाः न्ह्याःगु खः । जनपक्षीय मनूतय्स. थ्व आन्दोलनपाखें तःधंगु रुपान्तरणया आशा याःगु खः । वर्गीय विभेद अन्त जुइ, सामाजिक, आर्थिक, राजनैतिक न्याय प्राप्त जुइ । आम जनतां म्हगस खंकूगु खः । ‘जिमि जनआन्दोलनया गुरु पृथ्वी नारायण शाह खः । जब क्रान्तिकारी नेतां उद्घोषण याइ, राजनीतिक वृत्तिय् रहस्यया तरंग थनी । जनताया पुचलय् हुइना भुइना जुइ । नेताया क्यनेगु वा व नयेगु वा । नितां खनिं । किसितय् थें ।

क्रान्तिकराी दर्शन पिनेया वा । क्यनेगु। दुने न्ह्ययेगु वा ला पृथ्वीपथ दर्शन जुयाच्वन। कथित एकताया दर्शन। नेताया खुलासां इतिहासयात वर्गीय संघर्षया दृष्टिं खंकीपिं गुलिखे राजनैतिक द्रष्टात अन्योलय् लाइ । बडामहाराज पृथ्वी नारायण शाहया एकताया वर्गीय चरित्र छु? गज्याःगु? सीकेत उत्सुक जुइ । गम्भिर जुइ ।

अले ‘नेपाल पत्रिका’य् छम्ह प्राज्ञं चीनया महान क्रान्तिकारी नेता माओत्से तुंगया गुरु पृथ्वीनारायण शाह खः धकाः दावी यानाः च्वसु च्वइ । प्राज्ञं धाइ, ‘घरेलु उत्पादन यायेगु, विदेशी प्याखं मस्वयेगु, जडिबुटी पिने छ्वयेगु, नगद आर्जन यायेगु नीति पृथ्वीनारायण शाहं हल। उगु ईया पृथ्वीनारायण शाहया नक्कल माओत्से तुंगं यानाः थःगु क्रान्ति न्ह्याकूगु खः ।

अझ उम्ह प्राज्ञं धाइ– पृथ्वी नारायण शाहया कारणं हे तिब्बत, चीन, रुस, अंग्रेजी उपनिवेशवादया पन्जां बचे जूगु खः । गान्धीं भारत छोडो आन्दोलन न्ह्याकूगु हे पृथ्वी नाराण शाहया अंग्रेजी विरोधी नीतिं प्रेरित जुयाः खः । थ्व पृथ्वी नारायणया गुणगानया नामय् थौं कथित नेता, प्राज्ञतसें थुकथं छुचुंलय् खि तय्त स्वइ । थौं देशय् पृथ्वी नारायण शाहयात बरः तयाः गुगु राजनैतिक मुलधार न्ह्याकेत स्वयाच्वन, उकिं देशया भविष्य गन थ्यनी, गम्भिर जुइमाःगु ई वःगु दु। धाइ पृथ्वीनारायण शाहं देशयात एकीकरण यात, व एकताया प्रतीक । थज्याःगु हौवा थनाः देशय् थौं थःगु कुत्सित राजनैतिक स्वार्थ सिद्ध याइपिं नेतात सक्रिय खनेदइ ।

खः, देशय् एकता माः । देशयात छधी यानाः तयेमाः । तर देशयात विभाजित याइगु, खण्डित याइगु कथित एकता भ्रामक एकीकरणयात राजनैतिक छलछाम, दाउ कथडं छ्यलाः देश झं कुचा कुचा दनी । चुं चुं दनी । जिम्मेवारी नेतातय् उद्देश्य राजनैतिक शक्ति हड् पय् यायेगु, सत्ता शासनयात निरन्रता बीगु जक उद्देश्य जुइमजिउ। सही ढंगं जनतायात न्याय बियाः जनता दथुइ भावनात्मक एकता थनेत स्वयेमाः । एकताया नारा राजनैतिक हतियार कथं जक छ्यलां थःगु निन्हुया महत्वाकांक्षा पूर्ति यायेफइ । तर देशयात कलह, द्वन्द्वं मुक्त याये फइमखु। पृथ्वी नारायण शाहया एकीकरण, एकताया पाठ पञ्चायतकालं गाक्कं स्यनाथके धुंकल । थौं गणतन्त्र, जनतन्त्रया ई । हानं व हे पाठ छाय् पुनर्जीवित याना हयाच्वंगु दु ।

राजनैतिक ख्यलय् थ्व छगू रहस्यया न्ह्यसः जुयाः लुयाच्वंगु दु। हरेक राजनैतिक व्यवस्था, शासन, पद्धतिइ ‘एकता’, एकीकरण विषयय् थःथःगु अर्थ, मान्यता परिभाषा दइ । दयेमाः । सामन्ती शासक पृथ्वीनारायण शाहकालीन एकता, एकीकरणया प्रकृति गणतन्त्र, जनतन्त्र, जनवादी राजनैतिक व्यवस्थाया एकता, एकीकरणया प्रकृति उत्थें समान जुइ ला? देशय् गणतन्त्र शासन व्यवस्थाया ख्वाःपाः पुयाः पृथ्वीनारायण शाहया राजनैतिक दर्शनया भजन हालां जनतां न्याये काये फइ ला? माओवादी आन्दोलनया गुरु सामन्ती जुजु पृथ्वी नारायण खंकीगु राजनैतिक विवेकशीलता खः ला?

जनतायात थज्याःगु भ्रमय् तयाः नेताया थःगु राजनैतिक स्वार्थ पूर्ति जुइ । तर थुकिं देशय् भावनात्मक एकता लुइ ला? थौं राजनीतिज्ञतय् न्ह्याथे यानाःसां शक्ति उपभोग यायेगु आशक्ति जनताय् तीव्र धु्रवीकरण खने दयाच्वंगु दु। छखे पृथ्वी नारायण शाहयात बन्दूक कथं छ्यलाः जनतायात तहस नहस यानाः कुचा थलेगु, मेखेर व हे पृथ्वी नारायण शाहयात एकताया प्रतीक धकाः नारा थ्वयेकाः जनताया दिग्भ्रमित यायेगु। थ्व कुत्सित राजनैतिक चाल मखुला ?

सम्बन्धित बुखँ

LEAVE YOUR COMMENTS