ल्यासेपिं म्ह्याय्पिंत त्रिशुलं तियाः स्यात
एजेन्सी – भारतया आन्ध्रप्रदेशय् अन्धविश्वासया कारणं मांअबुं हे थः निम्ह जवान म्हयाय्पिंत त्रिशुलं तियाः स्यानाबिउगु दु। आन्ध प्रदेशया चित्तुर जिल्लाय् शिक्षक पुरुषोत्तम नायक व वया कलातं थः २२ दँ व २७ दँ दुम्ह म्ह्याय्पिंत स्यानाबिउगु खः । प्रहरीं मांअबु निम्हेसितं हिरासतय् कायेधुंकूगु दु ।
प्रहरीं थ्व घटनाय् सीम्ह चीधिकःम्ह म्ह्याय् साईं दिब्यां स्वन्हु न्ह्यः फेसबुकय् याःगु छगू पोस्टयात नं प्रमाण कथं काःगु दु। दिव्यां स्वन्हु न्ह्यः थःगु पोस्टय् च्वःगु खः, ‘शिव वल, आः ज्या पूवन ।’ प्रहरीया कथं हत्या जुइ छुं ई न्ह्यः उमिगु छेँय् पिनेयापिं मनूत नं वःगु खनेदु । अन्धविश्वासया शिकार जूपिं मांअबु निम्हं धाःसा समाजयात परिवर्तन यायेमाःगु ज्या शिक्षण पेशाय् लगे जुयाच्वंपिं खः । अबुम्ह पुरुषोत्तम सरकारी महिला डिग्री कलेजया उपप्रधानाचार्य खःसा वया कलाः पद्मजमा छगू निजी स्कूलया प्रिन्सिपल जुयाच्वंम्ह खः । उमि हत्या जूम्ह तःधिकःम्ह म्ह्याय् स्नातक ब्वनातयेधुंकूम्ह खःसा चिधिकःम्ह म्हयाय् बीए यानातःम्ह खः ।
छुं महिना न्ह्यव जक न्हूगु छेँय् सरे जुया वःपिं उपिं थःगु छेँय् अप्वः धयाथें पुजा यानाच्वनीगु खँ स्थानीय मनूतय्सं धाःगु दु। हत्या जूगु आइतवाः चान्हय् उमिगु छेँय् पुजा जुयाच्वंगु खः । उमिसं चिधिकःम्ह म्ह्याय् दिव्यायात त्रिशुलं तियाः स्याःगु खःसा तःधिकःम्ह म्ह्याय्यात डम्बलं छ्यानाः स्याःगु खः । उमिगु हत्या लिपा अबुम्हेसिनं हे प्रहरी व थःलिसे ज्या याइपिंत जानकारी बिउगु खः । प्रहरी घटनास्थलय् थ्यंबलय् तक निम्ह म्ह्याय्पिं सीधुंकूगु खःसा चिधिकःम्ह म्ह्याय् म्हेसिया सीम्ह पुजा क्वथाय् व तःधिकःम्ह म्ह्याय्या सीम्ह न्हापांगु तँय् लुइकूगु खः ।
LEAVE YOUR COMMENTS