महाकवि गिरिजाप्रसाद जोशीया समालोचना सफू पिदन

सक्व (नेपालभाषा टाइम्स) – महाकवि गिरिजाप्रसाद जोशीं ८४ क्वःगु बुन्हिया लसताय् ‘गिरिजाप्रसादया समालोचना सफू’ पितब्वज्या याःगु दु । महाकवि जोशीं थःगु जीवनकालय् थीथी च्वमिया कृतियात कयाः यानादीगु समालोचना संग्रह ‘गिरिजाप्रसादया समालोचना’ नांया सफू वंगु शनिवाः सक्वय् जूगु छगू ज्याझ्वःया दथुइ पितब्वज्या याःगु खः ।

सक्व कृषि फार्मय् फार्मया संचालक भाषासेवी ई. राजदास श्रेष्ठया सभापत्विय् जूगु ज्याझ्वलय् साहित्यकारलिसें समालोचक ध्रुव मधिकःमिं सफूया पितब्ज्या यानादीगु खः । ज्याझ्वलय् नवासें साहित्यकार मधिकःमिं थौंया इलय् वयाः गिरिजाप्रसादया समालोचना सफू ब्वने खंगु धइगु नं झीगु निंतिं तःधंगु सौभाग्य हे खःसां नं तःदँ तक वय्कःया कृति बारे जानकारी मदयाच्वंगु दुर्भाग्य खः धयादिल ।

महाकवि जोशीया तःधिकःम्ह काय कुञ्ज जोशीं महाकविया देनया बारे चर्चा यासें वय्कलं नेपालभाषा साहित्यया क्षेत्रय् थःगु जीवन व मृत्युलिपा नं आपालं चर्चा मुंकेत ताःलाःगुलिं थःपिंत गौरव महसुस जूगु धयादिल । वय्कलं थः अबु वामपन्थी विचारधाराया व्यक्तित्व जूगु व तात्कालीन पंचायती व्यवस्था विरुद्ध याःगु संघर्षया कारणं जेल च्वंगु इलय् याःगु दुव्र्यवहारया कारणं म्हो इलय् हे मृत्युवरण यायेमाःगु खः धयादिल ।

ज्याझ्वःया सभापति ई. श्रेष्ठं महाकवि जोशीया कृति पिथनेगु निंतिं थः तसकं लालयित जुयाच्वनागु धासें मेगु निगू सफू नं याकनं प्रकाशन यायेगुजानकारी बियादिल । लिसें वय्कलं थःगु अमेरिकाया यात्राया संस्मरण नं नेपालभाषा व खस् भासं पिथनेगु जानकारी नं बियादीगु खः ।

उगु हे ज्याझ्वलय् भाषा, संस्कृति, कला व पत्रकारिताया माध्यमं बियादीगु योगदानया कदर यासें सक्वया भाषासेवी रञ्जन श्रेष्ठ, उज्यालो एफएमया कुमार रंजित, नेपालमण्डल टेलिभिजनया सिल्भिया राजोपाध्याय, लावण्य सन्देश साप्ताहिक, संचारकःमि सजना तिमिल्सिनायात दांलिसें हनापौ देछानाः हनेज्या नं याःगु खः । ज्याझ्वलय् सक्वया भाषासेवीलिसें संस्कृतिविद प्रकाशमान सक्व, लक्ष्मीनारायण शाही, रामेश श्रेष्ठ लगायतं रचना व महाकविया म्येँ न्यंकादीगु खःसा नरेशवीर शाक्य, ज्ञानीराजा मानन्धर लगायतं नुगः खँ प्वंकादीगु खः ।