नेपालभाषा टाइम्सयात फाेनिज राष्ट्रिय पत्रकारिता सम्मान ल:ल्हात

येँ (नपालभाषा टाइम्स)/ नेपालभाषा टाइम्स न्हिपाैयात फाेनिज राष्ट्रिय पत्रकारिता सम्मान ल:ल्हा:गु दु । प्रदेश नं १ या राजधानी विराटनगरय् जूगु नेपाल आदिवासी जनजाति पत्रकार महासंघया २४ क्व:गु स्थापना दिवसया हना ज्याझ्वलय् संघीय मामिला व सामान्य प्रशासनमन्त्री अमनलाल माेदीं सम्मान ल:ल्हा:गु ख: । मांभासं निरन्तर पत्रिका पिथना: आदिवासी जनजातिया स: तयावयाच्वंगुलिं थुगु सम्मान बिउगु ख: । मन्त्री माेदी हनापाै ल:ल्हानादीगु ख:सा फाेनिजया नाय: गजुर्धन राइं नीन्याद्व: दांया चेक ल:ल्हानादीगु ख: ।

ज्याझ्वलय् दिलिप थापामगरयात फाेनिज राष्ट्रिय पत्रकारिता सम्मान, किसन राई (मरणोपरान्त), देव पचभैया मगर, जीवन लामा व उन्नति चौधरीयात फोनिज राष्ट्रिय पत्रकारिता पुरस्कार ल:ल्हा:गु ख: । अथेहे विदुर खवास, सुजाता लिम्वुयात फाेनिज प्रदेश १ पाखें पहिचान पत्रकारीता पुरस्कार ल:ल्हागु ख: । ज्याझ्वलय् मन्त्री माेदीं फाेनिजया स्थापना दिवसया लसताय् पिथंगु सफू नं विमाेचन या:गु ख: । सफुलिइ पत्रकार महासंघया नाय: सत्यनारायण बहादुर श्रेष्ठयात कया: थीथी लेखत नं दुथ्याकात:गु दु ।

ज्याझ्वलय् न्ववानादिसें फाेनिजया केन्द्रीय नाय: राईं नेपाल पत्रकार महासंघं शुद्धीकरण अभियान न्ह्याकेगु नामय् आदिवासी जनजाति पत्रकार जूगु कारणं जक नं महासंघया दुज: मदेयेकूगु धयागु खँ वयाच्वंगुलिं यदि धाथें थथे जुयाच्वंगु ख:सा फाेनिजं थुकिया सशक्त प्रतिकार याइ धयादिल ।

फाेनिज नाय: राइया सभापतित्वय् जूगु ज्याझ्वलय् मन्त्री माेदी लिसें थीथी व्यक्तित्वपिसं फाेनिजया २४ क्व:गु स्थापना दिवसया भिंतुना बियादीगु ख: ।