पूर्णिमा शाक्यया हाइकू मुना पिदन

यल – साहित्यकार पूर्णिमा शाक्य ‘पामिला’या हाइकु मुना ‘मतिनाया ख्वबि’ पिदंगु दु । शनिवाः छगू ज्याझ्वःया दथुइ मू पाहाँ च्वसापासाया नायः भूषणप्रसाद श्रेष्ठ, बागमति प्रदेशया सांसद शोभा शाक्य, नेवाः हाइकु ख्यःया कजि सुरेश प्रधान, इलोहं प्रकाशन प्रा.लिया नायः नरेशवीर शाक्य, नेपाल प्रज्ञा प्रतिष्ठानया प्राज्ञ धु्रव मधिकःमि व नेपालभाषा मंकाः खलः यलया पुलांम्ह नायः व च्वमि शाक्यया जहान किरण शाक्यं मंकाः कथं विमोचन यानादीगु खः ।

विमोचित सफूया समीक्षा मूपाहाँ श्रेष्ठं यानादीगु खःसा पाहाँपिंसं भिंतुना देछायादीगु खः । सफूया समीक्षा यानादिसें भाजु श्रेष्ठं हाइकू चिहाकःगु जूसां थुकियात तसकं मनन यानाः स्वयेमाः धयादिल । ‘तसकं खिउँबलय् चान्हय् सर्गतय् पल्पसा छकः झिलिक त्वइबलय् म्होचा इलय् नं सर्गः हे त्वयेक, क्वय् नं फुक्क खनेदयेक गुगु प्रभाव लाइगु खः, हाइकुं नं चिहाकः जूसां अज्याःगु हे प्रभाव लाकेमाः’ वय्कलं धयादिल ।

ज्याझ्वलय् विमोचित सफूया च्वमि शाक्य लिसे पत्रकार सिल्भिया राजोपाध्यायं सफूयात कयाः अन्तक्र्रिया नं याःगु खः । ज्याझ्वलय् न्ववानादिसें मय्जु शाक्यं ख्वबि हर्षय् नं वइ, विस्मातय् नं वइ, लसताय् नं वइ, दुःखय् नं वइ, थुकि हर्ष, लसता, दुःख, विस्मानया थःगु अनुभूतियात हाइकु पाखें व्यक्त यानागु खँ धयादिल ।

हाइजिन शाक्यया १३० पु हाइकु दुथ्याःगु थ्व हाइकु मुना इलोहं प्रकाशन पाखें पिथंगु खःसा थुकिया वितरणया भाला नेवाः हाइकु ख्यलं काःगु दु ।

सम्बन्धित बुखँ

LEAVE YOUR COMMENTS