विचाः प्वंकीपिं दु

छगू दृश्य । मिखाय् लुयाच्वनी । छम्ह अवोध जवान मिसा । सुन्दरी । तर जरजर अशक्त । परित्यक्त । फल्चा बासय् लाइ । फल्चाय् द्यनी । च्वनी । चान्हय् जुइ । गुन्डात वइ । फल्चाय् च्वंम्ह मय्जुयात खंकी । लसपस याइ । थःगु प्याःचाः लंकी । वनी । गुन्डातय् यौन हिंसां मय्जु क्षतविक्षत जुइ । वयागु म्ह त्यानातःगु ला थें जुइ । घायल । रक्ताम्य ।

थौं देय्या हालत खनी । थ्व मिखाय् लुयाच्वंगु दृश्य । देय्या थौंया नाजुक स्थितिया बिम्ब जुयाबी । देय् थौं फल्चा बासय् । जरजरावास्थाय् म्वानाच्वंम्ह अबला मिसा थें । चान्हिं महत्वकांक्षी कथित नेतातय् करणीं पीडित । शोषित ।

थौं देय् गुगु रसातलय् ! देय्या थौंया दयनीय स्थितिया विश्लेषण यायेत विद्वान विश्लेषक हे जुइमाः धइगु मदु । सामान्य मनुखं नं सामान्य सुत्र छ्यलाः यायेफु । व थासय् हे लाइ । गलत जुइमखु । व सुत्र खः । थौं देय् हाँके यानाच्वंपिं नेतातय् दुष्चरित्र यात कयाः भयभरया गालिगालौज यायेगु हे सही राजनीतिक विश्लेषण ठहर जुइ । थुकी शंका मदु ।

थौं जनमानस देय्या राजनीतिक बेहालया कारणं निराशया अन्धकारं व्याप्त जुइधुंकूगु दु । जः लुइगु आशा शुन्य जुइधुंकूगु दु । छखेरं आम जनताया मनोविज्ञान न्हियान्हिथं निराशां ग्रस्त जुया वनाच्वंगु दु । मेखेरं देय्या नेतातय् व्यक्तिगत स्वार्थंग्रस्त महत्वकांक्षी चलखेल झं झं वृद्धि जुयाच्वंगु दु । गुकुन्हु थ्व देय्या राजनीतिक चलखेल गन वनाः न्याः वनीगु खः ? गुगु दुर्घटनां ग्रस्त जुइगु खः ? जनतां गुगु दुर्भाग्य फये मालीगु खः ? चिनताया विषय जुइ ।

थौं निम्ह प्यम्ह शक्ति पिपासु नेतातय्सं देय् व जनतायात भौचां छुँयात थें म्हितका च्वंगु दु । थौं अहंकारी नेतातय्सं स्वयं देश, जनता धइपिं फुक्क थःत खंकाच्वंगु दु । थौं थःगु स्वार्थ सिद्धियात हे देय् व जनताया कल्याण खंकाच्वंगु दु । देय् जनताया हितया नामय् थःथःगु महत्वकांक्षा पूवंकाच्वंगु दु । जनताया ध्यान गबलें गुखे गबलें गुखे यंकाः नेतातय्सं थःगु मतलब पूवंकाच्वंगु दु । नेता बाबुराम भट्टराई नं जनताया ध्यान राष्ट्रपतिइ शासन व्यवस्थापाखे साली । धाइ । देय्या राजनीतिक स्थिरताया निंतिं संसदीय व्यवस्था अफाप जुल । उकिं व्यवस्था हे परिवर्तन यायेमाल । आह्वान याइ । देय्, जनताया हित कल्याणया चिउताः स्वयां गबलें छु, गबलें छु खँ ल्हानाः धुलमुल नीति नालाः थःगु विद्वता क्यनेगु थ्व चतुर दाउ जक खः भट्टराईया ।

थःगु कमजोरीयात सुचुकेत जनतायात मेमेगु लँय् अलमलय् यायेगु धूर्तता खः, थ्व नेतातय् । देय्या संसदीय व्यवस्था जुइ बिउ वा राष्ट्रपतिय व्यवस्था । विद्यमान निकृष्ट नेतातय् उपस्थितिं गुगुं कथंया व्यवस्था नं सफल जुइ फइमखु । देशय् वःगु अस्थिरताया कारण संसदीय व्यवस्था छ्यनय् तयाः लाचार नेतातय्सं थः निर्दोष जुइगु छलछाम जक खः थ्व । थौं देय्या प्रमुख शक्तिपूजक नेतातय् कारणं न्यादँ तकया स्थिर सरकार गुुगुं व्यवस्था वःसां सम्भव जुइमखु । आन्तरिक व बाह्य शक्तिया दाउपेच छ्यलाःसां शक्ति हड्पे यायेगु ताक याना च्वनीपिं नेतातय्सं शक्तिया खेल निरन्तर म्हिताच्वनी । स्थिरताया चिउताः तइमखु ।

देशय् राजनीतिक अस्थिरता दुसां राज्य संचालनया यन्त्र, संस्थात घिसि धाःसा देशं सुशासनया गति काये फइ । देशय् नियमित विकास कार्यत सम्पन्न जुयाच्वनी । तर थौं देय्या राजनीतिक नेतातय्स्तरय् जक भाँडभैलो खनेदुुगु मखु, देय्या थां जुयाच्वंगु संस्थात नं विकृत अवस्थाय् लायेधुंकूगु दु । थौं सर्वोच्च अदालतय् जुयाच्वंगु ना·ा नाचं थ्व तथ्य पुष्टि जुइ । सर्वोच्चया प्रधानन्यायाधिशं राजीनामा यायेमाः । याये हे माः धकाः सर्वोच्चया जज, वकिलत पिहां वयाच्वंगु दु । निगू पक्ष दथुइ महाभारत जुयाच्वंगु दु । सरकारं पक्षं न्यायालयया समस्या सर्वोच्चं हे समाधान यायेमाः। सरकारं हस्तक्षेप याये मजिउ धकाः पवित्र वचन ल्हानाच्वंगु दु ।

तर । सर्वोच्चया समस्या हे सरकारया राजनीतिक स्वार्थ व साँठगाँठया परिणाम खः । सर्वोच्चया प्रधानन्यायाधिशं राजीनामा यायेमाः । तर सर्वोच्चय् जुयाच्वंगु अन्य विकृतित नं चिइकेमाः धकाः नं छगू पक्षं सः थ्वयेकाच्वंगु द्ु । सर्वोच्चया समस्या खास दलीय राजनीतिया हस्तक्षेप व संरक्षणं वःगु खः । भागबन्डाया लिच्वः खः । जज, वकिलतय् क्रियाकलापय् पेशागत स्वार्थ जक मखु थःथःगु दलीय स्वार्थ नं वइगुलिं सर्वोच्चया समस्या सर्वोच्चं हे हल याये फइगु अवस्था मदु । विचाः प्वंकीपिं दु ।

सम्बन्धित बुखँ

LEAVE YOUR COMMENTS