तानाशाही जुइत स्वयाच्वंगु सरकार

वर्तमान सरकार तानाशाही जुया वनाच्वंगु आभास जुयाच्वंगु दु। सरकार गठननिसें कयाः आतकया दुने थ्व सरकार थीथी कथंया विवादय् लानाच्वंगु दु। सरकारं याःगु आपालं ज्या विवादय् लानाच्वंगु दुसा मेखे सरकार गनं तानाशाही जुइगु कुतः जकं यानाच्वंगु मखुला धइगु न्ह्यसः नं थन ब्वलनाच्वंगु दु। सरकारपाखें वंगु मंगलवाः जक संवैधानिक परिषद्सम्बन्धी अध्यादेश जारी यायेगु ज्या जुल । संसदया अधिवेशन न्ह्याकेमाःगु इलय् थुकथं सरकारं जारी याःगु अध्यादेशयात कयाः थीथी दल जक मखसें स्वयम सरकारया नेतृत्व यानाच्वंगु सत्तारुढ नेकपा दुने नं तःधंगु विवाद ब्वलंगु दु। सरकारं अध्यादेश जारी यायेवं प्रतिपक्ष दलं उकियात कयाः विरोध यायेगु ज्या याःगु दुसा सत्तारुढ पार्टीं नं उगु अध्यादेश लित कायेमाःगु खँ धाःगु दु ।

सरकार गठन जूसांनिसें बेलगाम जुइगु कुतः यानाच्वंगु खः । थ्व स्वयां न्ह्यः नं पार्टी तछ्यायेगु अध्यादेशया कारणं सरकार विवादय् लाःगु खःसा व स्वयां न्ह्यः गुथि विधेयकयात कयाः सरकारया आलोचना जूगु जक मखु तःधंगु हे आन्दोलन लिपा विधेयकतकं लित कायेमाःगु अवस्था वःगु खः । नेकपा दुने निम्ह अध्यक्षया विवाद तच्वया वंगु धइगु सरकारं पार्टीयात तकं मन्यँसें अध्यादेश वा विधेयक हयेगु यानाच्वंगु दु। थःगु फुक्कं कथंया कमि कमजोरी त्वपुइगु निंतिं यानाच्वंगु सरकारया थज्याःगु ज्यायात कयाः पार्टीं लगाम तयेगु ज्या याये मफुगु धइगु आःया संघीय लोकतान्त्रिक
गणतन्त्रया निंतिं छगूकथं हाथ्या हे खः ।

वर्तमान व्यवस्था धइगु अझ नं संसदीय व्यवस्था खः । संसदया बहुमत दुगु पार्टीं सरकार दयेकीगु विश्वन्यंकंया प्रचलन खः । थ्वहेकथं स्वब्वय् निब्व बहुमत दुगु नेकपां सरकार गठन याःगु खः । संसदीय दलया प्रमुख व्यक्ति सरकारया प्रमुख जुइगु याना वयाच्वंगु खः । अले उकियात पार्टीं नियन्त्रण याइगु खः । ता कि सरकार स्वच्छेचारी मजुइमा धइगु उकिया आशय खः । तर वर्तमान सरकार प्रमुखं आतक पार्टीयाके सरसल्लाह यानाः सरकार न्ह्याकेगु यानाच्वंगु मदु। अथे धइगु प्रधानमन्त्री ओली छगूकथं स्वच्छेचारी जुइगु कुतः यानाच्वंगु दु । तर पार्टीं उकियात कयाः छाय् लगाम तयेगु ज्या मयात धइगु न्ह्यसः नं ब्वलनाच्वंगु दु । नेकपाया सचिवालयया म्हिगः च्वंगु बैठकय् सरकारं जारी यायेगु अध्यादेश लित कायेत सहमत जूगु दु । सरकार अध्यादेश लित कायेत सहमत जूसां नं न्ह्यसः ब्वलनाच्वंगु दु। सरकार अध्यादेश हयेत छाय् हथाय् चाल ? पार्टीयात जक मखसें थःगु मन्त्रीमण्डल दुने तकं सहलह मयासें थुकथं हथासं विधयेक हयेमाःगुया कारण छु खः ?

सरकारं जारी यायेगु अध्यादेश लित कायेत सहमत जूगु दु । सरकार अध्यादेश लित कायेत सहमत जूसां नं न्ह्यसः ब्वलनाच्वंगु दु । सरकार अध्यादेश हयेत छाय् हथाय् चाल ? पार्टीयात जक मखसें थःगु मन्त्रीमण्डल दुने तकं सहलह मयासें थुकथं हथासं विधयेक हयेमाःगुया कारण छु खः ?

संसदया अधिवेशन सःतेमाःगु माग प्रतिपक्षं जक मखसें स्वय्म सत्तारुढ पार्टीं तकं यानाच्वंगु इलय् सरकारं हःगु अध्यादेश गनं पार्टीयात ख्यायेगु निंतिं जक मखुला ? पार्टी दुने थः कमजोर जुइवं पार्टी दुने बार्गे निब यायेकथं जक प्रधानमन्त्रीं थुकथं ज्या यानाच्वंगु मखुला ? संसदीय व्यवस्था दुगु देशय् सदन हे सर्वोच्च संस्था खः । अले गुगुं नं कथंया ऐन वा विधेयक हयेमाल धाःसा संसदया मू भूमिका जुइमाःगु खः । तर थन सरकारं सदनयात तकं बाइपास यायेगु ज्या यात, गुगु संसदीय व्यवस्थाया निंतिं दुर्भाग्य खः । खः आवश्यक जुल धाःसा अध्यादेश हये दइगु अधिकार सरकारयात दु। तर अज्याःगु अध्यादेश हयेगु निंतिं संविधानय् व्यवस्था यानातःगु दु। अथे धइगु देशय् गुगुं नं कथं संकट वल धाःसा वा छुं नं कथंया महामारी जुयाच्वन धाःसा अज्याःगु इलय् संसदया बैठक च्वने मफइगु खःसा निश्चित रुपं सरकारं अध्यादेश हयेफइगु अधिकार सरकारयात दु। तर देशय् अज्याःगु छुं नं कथंया संकट मवःगु इलय् थुकथं हथासं अध्यादेश हयेगु दुनेया मनसाय छु खः धइगु न्ह्यसः ब्वलनाच्वंगु दु ।

सरकारया कारणं हे यानाः विवादय् लानाच्वंगु मेगु छगू संस्था खः । राष्ट्रपति ! राष्ट्रपति छगू सम्मानित संस्था खः । तर सरकारया कारणं राष्ट्रपति विद्यादेवी भण्डारी आपालं विवादय् लायेधुंकूगु दुसा मेखे र स्वय्म राष्ट्रपतिया कारणं हे राष्ट्रपति विवादय् लानाच्वंगु दु। सरकारं अध्यादेशं हयेवं उकियात गुकथं राष्ट्रपति भण्डारीं स्वीकृत यायेगु ज्या जुल । थ्व तसकं दुर्भाग्यपूर्ण ज्या खः । राष्ट्रपतिं थःत चित्त बुझे मजुल धाःसा अज्याःगु अध्यादेश वा विधेयकयात लित छ्वये फइगु संवैधानिक व्यवस्था दु। तर आतक सरकारं हःगु अध्यादेशयात कयाः स्वयेगु खःसा राष्ट्रपतिं थःगु विवेक छ्यलाच्वंगु मदु। सरकारं गथे गथे धाल, अथे अथे हे उकियात स्वीकृत यायेगु ज्या गुगु राष्ट्रपति भण्डारीं यानाच्वन थ्व नं वर्तमान संसदीय व्यवस्थाया निंतिं दुर्भाग्य खः ।

राष्ट्रपति छुं गुगुं नं पार्टीया दुजः मखु । अथे धइगु राष्ट्रपति देशय् दुगु फुक्कं पार्टीलिसे सकल जनताया अभिभावक खः । तर राष्ट्रपतिं म्हिताच्वंगु भूमिकां धाःसा अज्याःगु आभास बियाच्वंगु दु। राष्ट्रपतिं मुक्कं पार्टी दुने ब्वलनाच्वंगु विवादयात कयाः छगू पक्षया जक पक्षपोषण यायेगु ज्या गुगु जुयाच्वन, निश्चय नं थ्व सकारात्मक पक्ष मखु। राष्ट्रपतिं म्हितिगु भूमिका हस्तक्षेपकारी जुइ मजिउ । तर आः राष्ट्रपतिं नालाच्वंगु गुगु भूमिका दु, उकिं भविष्यय् गलत नजीर स्थापित यायेफइगु सम्भावना अप्वया वनाच्वंगु दु। तर राष्ट्रपतिं स्वय्मं थःगु अधिकार व थःगु भूमिकायात थुइके मफुगु वा थुइकेगु कुतः याना मच्वंगु खँ धाःसा विडम्बना खः ।

राष्ट्रपति अनावश्यक रुपं क्यनाच्वंगु सक्रियताया कारणं यानाः हे पुलांम्ह प्रधानमन्त्री डा. बाबुराम भट्टराईं नं धयादीगु दु, ‘राष्ट्रपति थुकथं सक्रिय जुइगु इच्छा दुगु खःसा प्रत्यक्ष निर्वाचित कार्यकारी राष्ट्रपति निर्वाचन यायेगु पाय्छि जुइ । आलंकारिक राष्ट्रपति छगू पार्टी दुनेया विवादय् तक्यं वनेगु धइगु पाय्छि मखु ।’ थुगु खँयात कयाः नेकपा पार्टी स्वय्मं नं बिचा यायेमाःगु आवश्यकता थौं जुयाच्वंगु दु ।  संविधानकथं थीथी संस्थाया भूमिका स्पष्ट रुपं किटान यानातःगु दु । तर उकियात नालामकासे संस्थातय्सं म्हितीगु भूमिकां अन्ततः थ्व व्यवस्थायात ध्वस्त याइगु निश्चित दु ।

सम्बन्धित बुखँ

LEAVE YOUR COMMENTS